Tukapenda vye Inte zya kwe Yehova, wano wakawizya ilyasi lizima cila mwezi. (Mateyu 24:14) Pe wa-a pawa wawo wano wabatizwa nga nawalyanye wano watani wabatizwe, lelo wawazumilizya ukuwizizya ponga ni wungwe.

 Awe. Imisangulo asayino yingalenga ukuti wumwi wamupende ukuwa Inte ya kwe Yehova swinya asamulandu nu mulimo wuno akawomba mwi wungwe litu. (Imilimo 8:18-20) Nga kukonka vye, imisangulo imivule yino wakasangula yisimanyikwa nawano wasanguzile. Cila Nte akapavye impindi yakwe, amaka na vino wakwata ku kutunjilila umulimo wuno wukawombwa insi yonsi ukulingana na vino ivintu vili muwumi wakwe.​—2 Wakorinte 9:7.

 Cila mwezi, e Nte wenga nawenga akalemba amaawazi ye vino wawomvile umulimo nukupa waeluda wano wawa pi wungwe lyakwe. Ya-a ama lipoti yakawa ayakuyikundila.

 Cila liwungwe likapenda amalipoti nukuyatuma ku musambo wa mwe yoyo insi. Ne umusambo wukayapenda nukuyatuma ku maofesi makulu.

 Pansilo ya mwaka wamulimo, a apano impendwa ya Nte zya kwe Yehova mu nsi yonga na yonga yikakwiza mukumanyikwa. Zyo-o impendwa wakakwiza mukuziwika ponga pakuti wamanye impendwa ya Nte zya kwe Yehova ukuzinguluka insi yonsinye. Amalipoti ye cila nsi, wakayawika pa webusaiti yitu pano pakati “Insi Yonsinye.” Ya-a amalipoti yakatuwomelezya nkaninye wulyanye vino cawanga na ku wina Klistu wakutalicila.​—Imilimo 2:41; 4:4; 15:3.

 Kweni nanti acakuti tusipendela kumwi wamusango wo-o, tukawapocelela mwi wungwe. Swinya awavule pe wa-a wakazanwako ku Cizusyo ca Mfwa ya kwe Yesu, acino weni wakapendelwa ponga na wonsinyene mwi wungwe. Mu 2023, wano wazanilweko ku cizusyo walinji 20,461,767.

 Awavule wano wasizanwako mukulongana, wakakwivwi icete sana ukusambilila Baibolo nasweswe. Mu mwaka wa 2023, twatunguluzile amasambililo 7,281,212 cila mwezi. Swinya yamwi pe ya-a, yatungululwanga na wantu awapusane pusane.

 Uwuteko weni wukamanya impendwa ya kucalici ukupitila mukukolowozya kuno wakapepa. kucakuloleko, wa U.S. Census Bureau walanzile ukuti ukuvwambilizya kwawo kwalinji vye ‘akwakumanya vye wano wawa kwi wumba limwi ilya mapepo,’ impendwa yino uwuteko wukakwata isisimpwa pa visinka lelo ape vino umuntu umweneco “akuyivwa.” Nomba sweswe, tukapendavye Inte zya kwe Yehova wano wakawizya ilyasi ilizima nukutuma lipoti ye vino wakuwomba. Asa wano wakalanda ukuti wakapepa ku Nte zya kwe Yehova.