FEBRUARY 13, 2023 | WAPILUZILEKO VIMWI PA: NOVEMBER 6, 2023
Russia

ILYASI ILIPYA PE VINO WACISILE APIWU | Indupwa Zitatu mu Yaroslavl Wakuzicuzya pa Mulandu wi Suwilo

LIZYANI

Pa 30 October, 2023, Icilye ca mu Citungu ca Dzerzhinsky ica mu Yaroslavl cazumilizizyeko katici kwe apiwu ya Wanawitu wa-a, e Pyotr Filiznov nu Andrey Vyushin. Wawanyosezizyeko imyaka yino wawapinguzile ukunyepwa, ukuwafumya pa myaka 6 ni myezi 6 ukuwatwala pa myaka yiwili ni myezi 6. Ukuwa vino wapinguzile Umwanawitu e Aleksandr Kuznetsov nu wakwakwe e Mariya, vyeni vicili awulyanye.

Pa 3 August, 2023, Icilye ca mu Citungu ca Dzerzhinsky ica mu Yaroslav capinguzile Umwanawitu Pyotr Filiznov; Umwanawitu Aleksandr Kuznetsov ne wakwakwe e Mariya Kuznetsova; nga nu Mwanawitu Andrey Vyushin. Wonsinyene wa-a walindililanga ukuwapingula ukunyepwa. E Andrey ne Pyotr, weni wawapinguzile ukunyepwa imyaka 6 ni myezi 6. E Aleksandr nu Mariya weni wawapinguzile ukunyepwa imyaka yiwili ni myezi 6. Wasakuya ku cifungo pe yo-o impindi.

Amalyasi Amafupi

Aleksandr Kuznetsov

Umwaka Wuno Wakwasilwe: 1982 (Moscow, Moscow Region)

Imilimo Yino Akawomba: Wasambilizyanga Icizungu ni Nsamusi

Watalisile ukusambilila Baibolo mu April 2000. Wivwile icete sana ukulola vino Inte zya kwe Yehova wakundana. Wabatizizwe mu 2002

Watwite e Mariya mu 2017. Walinji mu cifungo ukulindilila ukupingulwa. Walile wakufuma vye mu cifungo wa dokota wizile awamuzana ni ndwala ye kansa

Vino Walanzile

Cani cikamyavwa ukutwalilila ukusecelela asa mulandu nukumicuzya ni ndwala yino mwalwala?

Ilivule nkafupuka, ne limwi nkakwivwa uwuwi icakuti nkalola ngati ntalikwanisya ukusipicizya. Lelo lyonsinye nga cawa wo-o, e Yehova akanjavwa ukulola ‘apakufumilamo.’ (1 Wakorinte 10:13) Cinji cino cikanjavwa sana akupepa kwe Yehova nu kumunena wulyanye vino nkuyivwa. Cinji acakuti, nga nimbila indwimbo, nawazya Baibolo, nga nelenganya pi suwilo litu, nkaleka ukusakamikwa. Nene ne wakwane twiza twazana ukuti ukuwomelezya awanawitu nakonye kukatwavwa sana. Pano tukuwomelezya wanji tukaleka ukuwika amano ku ntazi zitu, nukutalika ukuwika amano pa ntazi zye wanji. Tukakwivwa icete sana ukulola vino Yehova akawomvya umuzimu wakwe uwutele pakututeka umwezo nukutwavwa ukuwa nu mutende.

Mariya Kuznetsova

Umwaka Wuno Wakwasilwe: 1988 (Sharypovo, Krasnoyarsk Territory)

Imilimo Yino Akawomba: Akayiwombela

Wakulizile mu lupwa lwa Nte zya kwe Yehova. Awakwasi wakwe wonsinye wowili, awa Nte. Wakunzile sana ukuwazya pa masesemo ya mu Baibolo. Wabatizizwe mu 2002

Watwaline ne Aleksandr mu 2017

Vino Walanzile

Aliwaliko ci lino likakuwomelezya sana?

Iwaliko lino nakunda sana we, Awakolose 1:11 pano pakati: “Muwawomeswa namaka yonsi yano yakafuma muwukankala wakuchindamikwa kwakwe, alyakuti muwazizimichizya kwakwe vyonsi nuwuchimyamya.” Vino nkapitamo vikanjavwa ukumanya ukuti nga nasuwila nkaninye e Yehova nukumulenga ukuti ampe amaka yakusipicizya, atalitela apotwe ukunjavwa. Akalanjizya ulukundo lwakwe luno lusisila ku wawomvi wakwe awacisinka munzila imvule, swinya alitwalilila ukuwalanjizya uluse.

Andrey Vyushin

Umwaka Wuno Wakwasilwe: 1975 (Yaroslavl, Yaroslavl Region)

Imilimo Yino Akawomba: Awino wasunganga e mama wakwe ne nyinakulu. Akawombela kukwavwilizya nukuzifya e netiweki ya ma Kompyuta. Akasakamala ne mama wakwe wino walemala

Wizile amanya Inte zya kwe Yehova kwe ciwuza wakwe wino watalisile ukusambilila Baibolo. Wa Nte wasusile amawuzyo yonsinye yano wakweti, swinya wizile alola nukuti wa Nte wakacita vino wakasambilizya. Wabatizizwe mu 1995

Watwite e Anastasiya mu 2013. Wapapa umwana wenga umwanaci

Vino Walanzile

Uzye mukawomvya wuli vino mukapitamo pakuwomelezya wanji?

Ukulola vino umwanawitu e Dennis Christensen wasipicizizye intazi akuno kwawomizye nene ne wakwane. Pa wanawitu wonsinye, umwanawitu Christensen awino watalicizile ukunyepa mu cifungo, lelo watwalilizile ukusipicizya nukuwa wulyanye vino walinji. Icakulolelako cakwe catwavwizye ukulola ukuti naswenye tungacita icili conganye. Yo-o impindi, tukati nga twasunkanya awanawitu nanti wankazi wano wali ni ntete, tukakwelezya na maka yitu yonsinye ukuwawomelezya. Nukuwanena ukuti vino wakutiina asa vino cili nu kuwa. Tukawawuzya ukuti watafwile wakwelenganya vino waliwawacuzya nanti vino walicula. Lelo wafwile walola ukuwacuzya ukuti anzila yakuwomezyamo isuwilo.

Tusakuvwilika ukuti, nasweswenye ‘tungasuwila mwe Yehova swinya pasi nanti cimwinye cino cingatuyingania’ ndi vino wanye awanawitu 4 wacita.—Amalumbo 125:1.

Iciputulwa ca Mpindi

April 13, 2021

Wawawika mu cifungo pa mpindi intici pa nsizi yakukonkola mu mang’anda yawo
April 15, 2021

Wawatuma ku cifungo pano wakulindilila ukulolecela ku koti
July 14, 2021

Wawafumya mu cifungo, nukuwapa amasundo pe vino wafwile ukupita
September 9, 2022

Watalika ukuwaluwulusya

UKUFUMYA VINO VIKUCITIKA