Imvula yatonyile vye amanda yawili ukutalika pa September 7 ukufika pa 8, 2023. Yanzile kwawa wa mulamba mu nsi ya Hong Kong. Mu maawala vye 24 imvula yino yatonyile yafisile amasentimita 60 centimeters (24 in.) ukufuma pa musili pansi. Yakuzileko nga akulinganya kwe vino ikatonya mu mwaka. Cino cawifile acakuti, pano yoo imvula yatonyanga lyo papita vye sabata ukufumilila pano kwapitizile icimuza iciwipe cino witanga ukuti, Super Typhoon Saola. Imvula yino yatonyile yalenzile kwawa wa mulamba ni misili yadilikanga, cino calenzile amang’anda ni vikulwa ukononeka nkaninye mu Hong Kong. Awavule wacisisile ne wamwi wasyazile vye ukwasowa nu mwakwikala.

• Ku cawulanda, umwanawitu wenga wafwile

• Ing’anda yonga yononesileko katici

• Pasi Ing’anda ya Wufumu iyili yonsinye yino yononesile

• Waeluda wakwavwa awanawitu na wankazi ku ncende kuno kwatonyile yoo imvula, wakuwavwa mwe vino wakulonda swinya wakuwawomya ni suwilo

Tuli nu wulanda nkaninye ukusovya umwanawitu mumfwa. Tukulolecesya vye kunkolelo pano e ‘Leza wa cinsansamusi consi’ aliyiza afumyepo amasanso nukutunyosezya vino twasovizye.​—2 Wakorinte 1:3.