Imyaka 75 ayino yipisilepo ukufumilila pano Inte zya kwe Yehova watalisile ukupiliwula amabuku mu ci Papiamento. Ici Papiamento acitundu muno mwasanzinkana ici Dutch, ici Portuguese, ni ciSpanish. Wonye wo-o vino tukulanda, awantu 350, 000 wano wikala mu vilila vya Aruba, Bonaire, na ku Curaçao awano wakalanda co-o icitundu. Vyo-o ivilila vitatu wakavita ukuti ABC.

Umulimo wa kuwizya watalisile kwe vyo-o ivilila kukusila kwe 1920. Pano cafikanga mu 1946, ku Curaçao watumileko wa mishonari wano wafumile kwi sukulu lya Gilead. Pe yo-o impindi, lyo amawungwe amavule yapangwa pe co-o icilila. Nomba intazi yino yalinjiko ayakuti, watakweti amabuku ayali yonsinye yano yapiliwuzilwe mu ci Papiamento. Fwandi pakutungulula ukulongana cawanga wo-o, watungulililanga mu Cizungu na mu ci Papiamento ukuwomvya amabuku ya mu ci Dutch, Icizungu ni ciSpanish. Kweni awanawitu wamanyile ukuti amabuku ya mu ciPapiamento yalondekwanga sana, lelo kwalinji ivivule vino vyalesyanga ukuti wo-o umulimo wutawombwa. Vimwi avyo-o, kutalinji ama dikishonari ayali yonsinye mu ci Papimamento. Kutalinji na masundo yakukonka pakulemba co-o icitundu. Fwandi catazile nkaninye ku wanawitu wano watalisile ukupiliwula co-o icitundu. Pe wamwi wano wavwilizizyeko umulimo wakupiliwula palinji nu Mwanawitu Bill Yeatts wino walinji we mishonari wakutalicilapo ukumutuma kwe vyo-o ivilila. Ukulingana na vino walanzile mwe Yearbook ya Nte zya kwe Yehova iya mu 2002, watili: “Pakupiliwula amabuku mu ci Papiamento, twalandanga, nukulemba amazwi yano awantu wasitela wawomvyepo, nanti akuyalembanye wasite wayalembepo. Citapepusile nanti katicinye ukutalika ukupanga amasundo pe vyo wumwi afwile ukukonka pa kulemba co-o icitundu nukuvwamba amazwi yano twalondanga.” Asa mulandu na vyonsinye vyo-o, awanawitu watwalilizile vye ukuwomba wo-o umulimo.

Ibuku lino lyatalicizilepo ukupiliwulwa mwe co-o icitundu, akalibuku kano twatinji The Joy of All the People. Ka-a akalibuku wakamazile ukukapiliwula mu 1948. Mukupita kwa mpindi wapiliwuzile amabuku na yanjinye, pano palinji nu Lupungu lwa kwe Malonda nu Awake! Pa-a pano tukulanda e Baibolo ye New World Translation ikufuma katici katici ukulingana ni buku lino wamala. Ibuku lino watalicizilepo ukupiliwula alye Ruti. Lyafumile pa October 1, 2021.

Ivizima vikuloleka mwe ko-o ukuwombesya konsinye. Pa mulandu wakuti amabuku yakafuma mu ci Papiamento, amawungwe yakuya yakuvulilako. Ku cakulolelako, mu 1956 pano iwungwe lyakutalicilapo mu ci Papiamento lyapanzilwe, kwalinji vye wakawizya 16. Nomba pe yo-o impindi kuli wakawizya ukucila 1,600 wano wakapepela Yehova ponga mu mawungwe ya ci Papiamento 25. Mu 2023 mutupunye, watunguluzile amasambililo ukucila 1,200.

Tusuwizile ukuti e Yehova wandi atwalilile ukupaala awanawitu na wankazi awavule mu ci Papiamento wano wakuwombesya mu mulimo wakuwizya pano wakulenga uluswepo lwawo ukuwala, pakuti e Yehova acindikwe.​—Mateyu 5:16.