Ukutalika pa 1 ukufika pa 3 September 2023, awanawitu na wankazi wano wakalanda iciRomania wivwile icete ukulongana ponga Ukulonga kwa Citungu ukwa mu 2023 kuno kwatinji “Twalililani Ukutekanya”! Nanti acakuti awanawitu wakalongana icitungu mu vitundu vinji ivya ciRomany, wo-o walinji amuku wakutalicilapo ukulonga icitungu mu ciRomania. Wano wazanilweko walinji 1,353 ukufuma ku Austria, Belgium, France, Germany, Great Britain, Italy, Moldova, na ku Romania wano walonganizile mu Cikulwa Cakulonganila Ukulongana ku Kulu mu Turda, Romania. Awali 26 awano wabatizizwe.

Umwanawitu e Gage Fleegle, uwa Mwiwumba Lino Likatungulula walandanga ilyasi ilyakulecelezyako cilawanda. Umwanawitu e Fleegle walanzile sana pakulemenkana kuno kwawavye pa wawomvi wa kwe Yehova mwe ya-a manda swinya wawomelezizye iwumba ukutwalilila ukuwa awatekanye swinya awalemenkane pano wakuwombela Yehova. Ukulunda pe wano walongine pe ko-o ukulongana, kwalinji nawanji 900 wano wateyelezyangako ilyasi lyakulecelezya ukuwomvya intaneti wano walongine kali ukulongana kwa citungu ukwa mu ciRomania, na mululimi lwa ciwulu ulwa ciRomania

Umwanawitu wumwi wino akalanda iciRomania walanzile ukuti: “Tutalitela twiwilile ko-o ukulongana! Tukusalifya nkaninye e Yehova pa kukwata ukulongana kwa citungu mu citundu citu!” E kangalila wa muputule wino akalanda iciRomania uwizina lyakuti Iraklis Exarcheas watili: “Ukwasowa nu kuvwilika, ko-o ukulongana kwafisile awanawitu na wankazi awavule pa mwezo wano wakalanda co-o icitundu. Ko-o ukulongana kutwavwizye sana ukumanya ukuti e Yehova akasakamala awantu wakwe. E Yehova atupile ulongo ulukulu nkaninye!”

Tukunzile kaninye wo-o vino awanawitu na wankazi wakulongana ponga mukulumbanya Yehova nu kusambisiliziwa naweliwe peko ukulongana kwa citungu mu ciRomania.​—Amalumbo 26:12.