¿Á kúúmií na̱ testigo Jehová Biblia miína?

KUNISO̱ʼOÑA TU̱ʼUN

Na̱ testigo Jehová xa̱a̱ ku̱a̱ʼání nu̱ú Biblia xíniñúʼuna ña̱ va̱ʼa káʼvinaña. Ta ña̱ ndáyáʼvika nu̱úna kúú ña̱ Traducción del Nuevo Mundo ta ku̱a̱ʼání nu̱ú tu̱ʼun íyoña, saáchi xíniñúʼuña ki̱vi̱ Ndióxi̱ ta saátu káxiní káʼa̱nña ta va̱ása nása̱maña.

Va̱xi ki̱vi̱ Ndióxi̱ nu̱úña. Su̱ví ndiʼi na̱ sa̱ndáya̱ʼa Biblia ka̱ʼyí ki̱vi̱ Ndióxi̱ nu̱úña. Tá kúú, iin ña̱ sa̱ndáya̱ʼana inka tu̱ʼun, yáʼaka setenta ki̱vi̱ na̱ yiví na̱ chi̱ndeétáʼan xíʼin ña̱yóʼo va̱xi nu̱úña, soo nda̱a̱ ni iin yichi̱ kǒo ki̱vi̱ ta̱ xíʼin kuentaña va̱xi nu̱úña: Jehová.

Ñuú ña̱ Traducción del Nuevo Mundo, va̱xiva ki̱vi̱ Ndióxi̱ nu̱úña, nu̱ú ni̱ka̱ʼyi̱ña tá ya̱chi̱, soo kǒo ki̱vi̱ na̱ comité na̱ sa̱ndáya̱ʼa ña̱yóʼo va̱xi nu̱úña.
Va̱ása nása̱maña. Íyo sava Biblia ña̱ sa̱ndáya̱ʼana inka tu̱ʼun na̱samana ña̱ káʼa̱nña chi va̱ása inkáchi íyoña xíʼin ki̱ʼva ña̱ ni̱ka̱ʼyi̱ña tá ya̱chi̱. Tá kúú ña̱ va̱xi nu̱ú Mateo 7:13 ta siaʼa káchiña: “Ki̱ʼvindó chí yéʼé táñu. Saáchi yéʼé ndíka̱ xíʼin yichi̱ ndíka̱ ku̱a̱ʼa̱nña ndayá á xi̱tu̱n”. Tu̱ʼun ña̱ ni̱ka̱ʼyi̱ña tá ya̱chi̱ va̱ása káʼa̱nña xa̱ʼa̱ “ndayá á xi̱tu̱n”, chi ña̱ ni̱ka̱ʼa̱nña xa̱ʼa̱ kúú ña̱ “ndiʼi-xa̱ʼa̱na”. Na̱ sa̱ndáya̱ʼa tu̱ʼun yóʼo xi̱ndakanixi̱nína ña̱ ku̱ʼu̱n na̱ kéʼé ña̱ va̱ása va̱ʼa ndayá á xi̱tu̱n ña̱ xo̱ʼvi̱na ndiʼi tiempo. Soo ña̱ Traducción del Nuevo Mundo va̱ása káʼa̱nña xa̱ʼa̱ ña̱yóʼo chi ña̱ káʼa̱nña xa̱ʼa̱ kúú ña̱ ndiʼi-xa̱ʼa̱vana nda̱a̱ táki̱ʼva ni̱ka̱ʼyi̱ña tá ya̱chi̱.
Káxi káʼa̱nña. Ña̱ sandáya̱ʼana Biblia xíniñúʼu káxi kooña ta va̱ása ixayo̱ʼvi̱ña xíʼinna ña̱ kunda̱a̱-inina xíʼinña. Ná ka̱ʼa̱nyó xa̱ʼa̱ iinña. Ku̱a̱ʼání Biblia sa̱ndáya̱ʼana Mateo 5:3 nda̱a̱ táki̱ʼva va̱xiña yóʼo: “Kúsi̱íní-ini na̱ espíritu ndáʼvi”. Na̱ yiví na̱ íyo tiempo vitin va̱ása káxi íyoña nu̱úna. Xa̱ʼa̱ ña̱kán ña̱ Traducción del Nuevo Mundo siaʼa sa̱ndáya̱ʼana ña̱ versículo yóʼo: “Si̱íní íyo na̱ kúnda̱a̱-ini ña̱ xíniñúʼuna Ndióxi̱”.

Ña̱ Biblia yóʼo íxato̱ʼóña ki̱vi̱ Ndióxi̱ ta kǒo násamaña ña̱ káʼa̱nña ta̱ káxi káʼa̱nña. Xáxana ña̱ Traducción del Nuevo Mundo nu̱ú na̱ yiví ta kǒo xu̱ʼún kíʼinna xa̱ʼa̱ña ta xa̱ʼa̱ ña̱ kéʼéna ña̱yóʼo ku̱a̱ʼání na̱ yiví kivi kaʼvinaña tu̱ʼun miína ni kǒo xu̱ʼún kúúmiína ña̱ satána á kueenna ña̱yóʼo.