Ndi̱ʼi̱ na̱ testigo Jehová chíka̱a̱níndi̱ ndee̱ ña̱ vií kutáʼanndi̱ xíʼin na̱ veʼendi̱ ta saátu na̱ íyo yatin xíʼinndi̱. Ndáyáʼviní na̱ familia nu̱úndi̱ saáchi mií Jehová kúú ta̱ ni̱ka̱ʼa̱n ña̱ saá koona (Génesis 2:21-24; Efesios 3:14, 15). Nu̱ú Biblia va̱xi ña̱ káʼa̱n Ndióxi̱ xíʼin ndiʼi na̱ yiví na̱ ndóo iníísaá nu̱ú ñuʼú ña̱ va̱ʼa si̱í koona xíʼin na̱ ti̱ndaʼa̱ xíʼinna ta va̱ása koo ku̱a̱chi nu̱úna.

 Iin ña̱ kéʼéndi̱ kúú ña̱ chíka̱a̱ndi̱ ndee̱ ña̱ kundiku̱nndi̱ ña̱ káʼa̱n Biblia, ña̱yóʼo va̱ʼaní chíndeétáʼanña xíʼinndi̱ ña̱ vií koondi̱ xíʼin na̱ ti̱ndaʼa̱ xíʼinndi̱ ta saátu xíʼin se̱ʼendi̱ (Proverbios 31:10-31; Efesios 5:22–6:4; 1 Timoteo 5:8). Biblia chíndeétáʼanña xíʼin ndiʼi na̱ familia ña̱ vií kutáʼan ndiʼina ni va̱ása inkáchi íyo ña̱ kándíxana (1 Pedro 3:1, 2). Ná kotoyó ña̱ káʼa̱n sava na̱ yiví na̱ ti̱ndaʼa̱ xíʼin na̱ ni̱xa̱a̱ ku̱u testigo Jehová:

•   “Tá sa̱kán i̱ñu̱ ku̱i̱ya̱ ti̱ndaʼa̱ndi̱ ndiʼi tiempo xi̱kanitáʼandi̱ ta va̱ása va̱ʼa níxi̱kunindi̱. Tá ni̱xa̱a̱ ñá Ivete ndu̱uñá testigo Jehová, va̱ʼaní ki̱xáʼa íyo-iniñá xíʼi̱n ta kúee íyo iniñá, ña̱ na̱samañá ña̱ kéʼéñá chi̱ndeétáʼanña xíʼinndi̱ ña̱ va̱ása sandákootáʼanndi̱” (ta̱ Clauir, Brasil)

•   “Tá ki̱xáʼa yiíi̱ ta̱ Chansa sákuaʼara xíʼin na̱ testigo Jehová, va̱ása níkunii̱ ña̱ sakúaʼara saáchi xi̱ndakanixi̱níi̱ ña̱ xi̱ndataʼvína familia. Soo tá ni̱ya̱ʼa tiempo ki̱ʼi̱n kuenta Biblia va̱ʼaní chíndeétáʼanña xíʼinndi̱ ña̱ koondi̱ xíʼin táʼanndi̱” (Ñá Agness, Zambia)

 Ta saátu tá nátúʼunndi̱ xíʼin na̱ yiví xa̱ʼa̱ Ndióxi̱, sánáʼa̱ndi̱ na̱ íyo yatin xíʼinndi̱ ndáa ki̱ʼva chíndeétáʼan Biblia xíʼinna ña̱ keʼéna ña̱yóʼo:

•   Vií ndaka̱xinna na̱ tindaʼa̱ xíʼinna

•   Tá sa̱kán ti̱ndaʼa̱na ndáa ki̱ʼva kundeé-inina ya̱ʼana nu̱ú tu̱ndóʼo

•   Vií kutáʼanna xíʼin si̱sona

•   Vií kuniñúʼuna xu̱ʼún

•   Va̱ása ka̱ʼa̱n kúáchina xíʼin táʼanna

•   Ixakáʼnu-inina xa̱ʼa̱ táʼanna

•   Vií sanáʼa̱na se̱ʼena

 Sava yichi̱ kúúva ña̱yóʼo, saá íyo ña̱ ni̱ka̱ʼa̱n ña̱ empresa ña̱ nándukú xa̱ʼa̱ ña̱yóʼo ña̱ nani Sofres tá ku̱i̱ya̱ 1998, ti̱xin o̱ko̱ na̱ ti̱ndaʼa̱ iin kúú na̱ ndo̱ʼo ña̱yóʼo xa̱ʼa̱ ña̱ ndu̱una testigo Jehová ni̱xi̱yo ku̱a̱chi nu̱úna.

 Ta̱ Jesús ni̱ka̱ʼa̱nra ña̱ na̱ ndíku̱n miíra koo tu̱ndóʼo nu̱úna xíʼin na̱ veʼena (Mateo 10:32-36). Ta̱ historiador Will Durant káʼa̱nra ña̱ tá xi̱xaʼnda chíñu na̱ ñuu Roma “xi̱chika̱a̱ ku̱a̱china na̱ cristiano ña̱ xi̱ndataʼvína na̱ familia” a ta saátu kéʼéna tiempo vitin ku̱a̱ʼá yichi̱ chíka̱a̱na ku̱a̱chi na̱ testigo Jehová ña̱ keʼéna ña̱yóʼo. Soo, ¿á na̱ testigo kúú na̱ sákanitáʼan na̱ familia?

 Na̱ Tribunal Europeo de Derechos Humanos ni̱ka̱ʼa̱nna ña̱yóʼo, ña̱ ku̱a̱ʼá yichi̱ su̱ví na̱ testigo Jehová kúú na̱ kíxáʼa xíʼin ku̱a̱chi, saáchi “na̱ veʼena na̱ va̱ása kúú testigo kúú na̱ va̱ása kándíxa ta va̱ása íxato̱ʼóna derecho ña̱ kúúmií na̱ veʼena ña̱ ndaka̱xinna religión ña̱ kundiku̱nna”. Na̱ Tribunal yóʼo ni̱ka̱ʼa̱nkana: “Saátu íyo ña̱ ndóʼo inka na̱ familia na̱ va̱ása inkáchi religión ndíku̱n, ta su̱ví iinlá na̱ testigo Jehová kúú na̱ ndóʼo saá”. b Soo ni saá kúu, na̱ testigo Jehová chíka̱a̱na ndee̱ ña̱ kundiku̱nna consejo yóʼo: “Va̱ása keʼéndó xíʼinna nda̱a̱ táki̱ʼva kéʼéna xíʼinndó. [...] Tá kívika, chika̱a̱níkandó ndee̱ ña̱ vií kutáʼanndó xíʼin ndiʼi na̱ yiví”. (Romanos 12:17, 18).

 Ndi̱ʼi̱ na̱ testigo Jehová kándíxandi̱ ña̱ káʼa̱n Biblia ña̱ tindaʼa̱ndi̱ xíʼin na̱ kúú “discípulo ta̱ Jesús”; ña̱yóʼo kúni̱ kachiña ña̱ inkáchi íyo ña̱ kándíxandi̱ (1 Corintios 7:39). Ña̱ ni̱ka̱ʼa̱n Ndióxi̱ va̱ʼaní chíndeétáʼanña xíʼinyó. Tá kúú iin artículo ña̱ ka̱na nu̱ú revista Journal of Marriage and Family tá ku̱i̱ya̱ 2010 káchiña: “Na̱ xa̱a̱ ti̱ndaʼa̱ na̱ inkáchi religión kúúmií ta saátu ña̱ kéʼéna xíʼin ña̱ kándíxana va̱ʼaka íyo na̱yóʼo”. c

 Soo na̱ testigo Jehová va̱ása káʼa̱nna xíʼin ni iinna ña̱ ná sandákoona na̱ ti̱ndaʼa̱ xíʼinna tá va̱ása kúú na̱yóʼo testigo. Biblia káchiña: “Tá iin ta̱ ñaniyó íyo ñá síʼira ñá kǒo kándíxa tátayó ta kúni̱vañá kooñá xíʼinra, ná kǒo sandákoorañá. Tá iin ñá ñaʼá íyo yiíñá ta̱ kǒo kándíxa tátayó ta kúni̱vara koora xíʼinñá, ná kǒo sandákooñára” (1 Corintios 7:12, 13). Ta ndi̱ʼi̱ ndíku̱nvandi̱ ña̱ káʼa̱n Biblia.