Kǒo sándakoondi̱ ña̱ kutáʼanndi̱ xíʼin na̱ ku̱xíka nu̱ú Jehová, xa̱ʼa̱ ña̱ sa̱ndákoona ña̱ natúʼunna xíʼin na̱ yiví xa̱ʼa̱ra á ña̱ ku̱ʼu̱nna reunión. Chi ña̱ kéʼéndi̱ kúú ña̱ chíka̱a̱ndi̱ ndee̱ ña̱ chindeétáʼanndi̱ xíʼinna ña̱ ndikó tukuna nu̱ú Ndióxi̱, tasaá xa̱a̱na kutáʼan vií tukuna xíʼinra.

 Tá iin na̱ testigo na̱ xa̱a̱ nda̱kuchi ni̱ki̱ʼvina iin ku̱a̱chi ndee̱, kivi tavána na̱yóʼo ti̱xin congregación. Soo su̱ví xa̱a̱ ndi̱ku̱n távána na̱yóʼo. Tá na̱ yiví yóʼo ni̱ya̱ʼandosóna ña̱ káʼa̱n tu̱ʼun Ndióxi̱ ta kǒo ndíkó-inina xa̱ʼa̱ ña̱ kéʼéna saá kúú ña̱ távána na̱yóʼo, ta na̱ congregación va̱ása kítáʼankana xíʼinna. Ña̱ Biblia káxiní káʼa̱nña ña̱yóʼo: “Tavándó ta̱a ta̱ kéʼé ña̱ kini ta̱ ndíka̱a̱ xíʼinndó” (1 Corintios 5:13).

 ¿Ndáaña kúu tá iin ta̱a ki̱tara ti̱xin congregación, soo ñá síʼíra xíʼin na̱ va̱lí se̱ʼera kúúkana testigo Jehová? Ni na̱sama ki̱ʼva ña̱ kítáʼanra xíʼin Ndióxi̱ soo viíkava kítáʼanra xíʼin na̱ veʼera, chi viíva kítáʼanra xíʼin ñá síʼíra ta saátu xíʼin na̱ va̱lí se̱ʼera.

 Ta na̱ ke̱e ti̱xin congregación kivikava ku̱ʼu̱nna reunión, ta saátu tá kúni̱na kivi chindeétáʼan na̱ anciano ti̱xin congregación xíʼinna ña̱ kutáʼan va̱ʼa tukuna xíʼin Ndióxi̱. Ña̱ va̱ʼa ndikó tuku na̱yóʼo koona testigo Jehová. Tá na̱ ki̱ta yóʼo sándakoona ña̱ keʼéna ña̱ va̱ása va̱ʼa ta kíxáʼa tukuna kéʼéna ña̱ káʼa̱n tu̱ʼun Ndióxi̱, kivi ndikó tukuna ti̱xin ña̱ congregación.