Ndiʼi ku̱i̱ya̱, na̱ testigo Jehová távána video ña̱ va̱ʼa kotonaña ti̱xin asamblea regional ña̱ kúúmiína. Ku̱a̱ʼání ña̱ video yóʼo kánaña tu̱ʼun inglés, soo saátu xíyo asamblea ku̱a̱ʼáníka nu̱ú tu̱ʼun. Ña̱kán, ¿ndáaña kéʼéna ña̱ va̱ʼa kunda̱a̱-ini ndiʼina xíʼin ña̱ video yóʼo? Ña̱ kéʼéna kúú ña̱ sándaya̱ʼana ña̱ video yóʼo inka nu̱ú tu̱ʼun ña̱ káʼa̱n na̱ yiví. ¿Ndáaña ndóʼo na̱ yiví na̱ xíto ña̱ video yóʼo?

Ná kotoyó ndáaña ni̱ka̱ʼa̱n sava na̱ yiví na̱ káʼa̱n inka tu̱ʼun na̱ xi̱to ña̱ video yóʼo ti̱xin asamblea chí ñuu México xíʼin Centroamérica:

• “Ku̱tóoníi̱ ña̱ video yóʼo saáchi su̱ví kuití níkunda̱a̱-inii̱ xíʼinña, saáchi nda̱a̱ miíi̱ ndo̱ʼo ña̱ ni̱ya̱ʼa nu̱úña túvii̱. Ta ndiʼi ña̱yóʼo nda̱a̱ níma̱i̱ ni̱xa̱a̱ña” (ña̱ ni̱ka̱ʼa̱n iin na̱ ni̱xa̱ʼa̱n asamblea ña̱ ni̱xi̱yo tu̱ʼun popoluca chí Veracruz, México).

• “Nda̱kanixi̱níi̱ ña̱ íyoi̱ ñui̱ ta nátúʼi̱n xíʼin iin migoi̱ na̱ va̱ʼaní kítáʼan xíʼi̱n. Va̱ʼaníka ni̱xi̱yo ña̱yóʼo nu̱úka ña̱ ku̱ʼu̱nyó iin cine, saáchi ku̱nda̱a̱-inii̱ xíʼin ndiʼi ña̱ xi̱toi̱” (ña̱ ni̱ka̱ʼa̱n iin na̱ ni̱xa̱ʼa̱n asamblea ña̱ ni̱xi̱yo tu̱ʼun náhuatl chí Nuevo León, México).

• “Xa̱ʼa̱ ña̱ xi̱toi̱ video yóʼo tu̱ʼun miíi̱, nda̱kanixi̱níi̱ ña̱ miíi̱ káʼa̱n xíʼin na̱ yiví na̱ yáʼa kán túvii̱” (ña̱ ni̱ka̱ʼa̱n iin na̱ ni̱xa̱ʼa̱n asamblea ña̱ ni̱xi̱yo tu̱ʼun chol chí Tabasco, México).

• “Iinlá na̱ religión yóʼo kúú na̱ ndíʼi̱ní-ini xa̱ʼa̱ na̱ yiví ña̱ va̱ʼa sakúaʼana xa̱ʼa̱ Ndióxi̱ tu̱ʼun miína. Kǒo inka religión na̱ kéʼé táʼan ña̱yóʼo” (ña̱ ni̱ka̱ʼa̱n iin na̱ ni̱xa̱ʼa̱n asamblea ña̱ ni̱xi̱yo tu̱ʼun cakchiquel chí Sololá, Guatemala).

Na̱ testigo Jehová va̱ása ndúkúna na̱ yiví na̱ xíni̱ní keʼé chiñu ña̱ audio ni na̱ actor ña̱ voz ña̱ va̱ʼa sandáya̱ʼana video ña̱ távána inka nu̱ú tu̱ʼun, ta savatu yichi̱ kéʼéna grabación ña̱ video yóʼo ñuu ña̱ ndáʼviní, ña̱ xíkání kíndo̱o, nu̱ú kǒo ku̱a̱ʼá ña̱ʼa ña̱ kivi kuniñúʼuna ña̱ keʼéna ña̱yóʼo. Tá saá, ¿ndáaña kúú ña̱ kéʼéna ña̱ va̱ʼaní íyo video ña̱ távána?

Tá ku̱i̱ya̱ 2016, ti̱xin Betel ña̱ kúúmií na̱ testigo Jehová chí Centroamérica sa̱ndáya̱ʼana video ña̱ kotona ti̱xin asamblea regional tu̱ʼun sáʼán ta saátu sa̱ndáya̱ʼanaña inka 38 nu̱ú tu̱ʼun. Ta ki̱ʼva 2,500 na̱ yiví ke̱ʼé ña̱ chiñu yóʼo ta kǒo xu̱ʼún níkiʼinna. Ta sava na̱ káchíñu xíʼin audio ta saátu na̱ sándaya̱ʼa ña̱ video yóʼo inka nu̱ú tu̱ʼun ke̱ʼénaña ti̱xin Betel, savatuna ke̱ʼénaña oficina ña̱ traducción xíʼin inkaka lugar. Ta ki̱ʼva 20 lugar ke̱ʼéna grabación ña̱ video yóʼo chí Belice, Guatemala, Honduras, México xíʼin Panamá.

Ta sava lugar chi̱ka̱a̱nína ndee̱ ña̱ va̱ʼa viíní ixava̱ʼana iin lugar nu̱ú kivi keʼéna grabación ña̱ video yóʼo. Ta xi̱niñúʼuna ña̱ʼa ña̱ íyo nu̱úna ña̱ va̱ʼa keʼéna ña̱yóʼo, tá kúú manta xíʼin colchón tasaá va̱ása ki̱ʼvi inkaka ruido ti̱xin ña̱ video yóʼo.

Ña̱ va̱ʼa tavána ña̱ video yóʼo inka nu̱ú tu̱ʼun, sava na̱ xi̱kuu actor ña̱ voz xi̱kuma̱ní xu̱ʼún á inkaka ña̱ʼa ndaʼa̱na, soo ni saá chi̱ka̱a̱nína ndee̱ ña̱ va̱ʼa ku̱ʼu̱nna nda̱a̱ lugar nu̱ú keʼéna grabación ña̱ video yóʼo. Savana ki̱ʼva 14 hora xi̱niñúʼu ku̱ʼu̱nna ña̱ va̱ʼa xa̱a̱na nda̱a̱ lugar kán. Tá kúú, iin ta̱ ta̱a xíʼin se̱ʼera ni̱xa̱ʼa̱n xáʼána ki̱ʼva 8 hora ña̱ va̱ʼa xa̱a̱na lugar nu̱ú keʼéna grabación ña̱ video.

Tá ni̱xi̱yo loʼo ñá Naomi, xi̱chindeétáʼanñá xíʼin na̱ veʼeñá ña̱ va̱ʼa ndasaviína iin lugar loʼo nu̱ú kivi keʼéna grabación ña̱ video. Ñá Naomi káchiñá: “Xi̱kuni̱níndi̱ ña̱ ná kixaa̱ semana ña̱ keʼéna grabación ña̱ video. Yivái̱ xi̱chika̱a̱níra ndee̱ ña̱ va̱ʼa ndasaviíra lugar nu̱ú keʼéna grabación. Sava yichi̱, siʼíi̱ xi̱keʼéñá comida ña̱ kuxu 30 na̱ xi̱xa̱ʼa̱n xi̱keʼé ña̱ grabación”. Vitin ñá Naomi kúúñá voluntaria ta káchíñuñá oficina ña̱ traducción ña̱ íyo México. Ñáyóʼo káʼa̱nkañá: “Kúsi̱íní-inii̱ xa̱ʼa̱ ña̱ xíniñúʼi̱ tiempoi̱ ña̱ va̱ʼa chindeétáʼi̱n xíʼin inka na̱ yiví ña̱ va̱ʼa xa̱a̱na sakúaʼana xa̱ʼa̱ ña̱ káʼa̱n Biblia tu̱ʼun miína. Iin chiñu ña̱ liviní kúú ña̱yóʼo”.

Ku̱i̱ya̱ tá ku̱i̱ya̱, na̱ testigo Jehová kúúmiína asamblea ña̱ xíyo iníísaá ñuyǐví. Ndiʼi na̱ kúni̱ ku̱ʼu̱n ña̱ asamblea yóʼo, kiviva ku̱ʼu̱nna. Tá kúni̱ún kunda̱a̱ka-iniún xa̱ʼa̱ ña̱yóʼo, ki̱ʼvi nu̱ú káʼa̱nña ASAMBLEA.