Vitin ña̱ kíxáʼa ku̱i̱ya̱ 2023 ña̱ kúni̱yó kúú ña̱ vií ná kundoo miíyó ta saátu na̱ veʼeyó. ¿Ndáaña kivi chindeé miíyó ña̱ kandíxayó ña̱ vií kundooyó chí nu̱únínu?

 Va̱ʼaní sándi̱ko Biblia iniyó, saáchi nu̱ú ña̱yóʼo káʼa̱nña xíʼinyó ña̱ su̱ví ndiʼiví tiempo koo tu̱ndóʼo ña̱ kúúmiíyó, chi kixaa̱va ki̱vi̱ ña̱ ndiʼi-xa̱ʼa̱ña. Ta saátu káʼa̱nña “ndiʼi ña̱ ni̱ka̱ʼyi̱ xi̱naʼá ni̱ka̱ʼyi̱ña ña̱ va̱ʼa sanáʼa̱ña miíyó, chi tu̱ʼun Ndióxi̱ chíndeétáʼanña xíʼinyó [...] ta sándi̱koña-iniyó ña̱ va̱ʼa kundatuyó ña̱ taxi Ndióxi̱ ndaʼa̱yó chí nu̱únínu” (Romanos 15:4).

•    Ña̱ va̱ʼa kunda̱a̱ka-iniún xa̱ʼa̱ ña̱ káʼa̱n Biblia koo chí nu̱únínu, kaʼvi artículo ña̱ naní “La esperanza real de un mañana mejor”.

 Ña̱ káʼa̱n Biblia koo chí nu̱únínu “chíndeétáʼanña xíʼinyó ña̱ va̱ʼa kutakuyó ta íyoña nda̱a̱ táki̱ʼva íyo iin ka̱a ña̱ tíin iin barco” (Hebreos 6:19). Ña̱yóʼo chíndeéña miíyó ña̱ va̱ʼa kundeé-iniyó nu̱ú tu̱ndóʼo ña̱ íyo vitin, ña̱ kǒo ndakava-iniyó ta saátu ña̱ ndixa si̱í kooyó. Tá kúú ña̱yóʼo:

•    Ña̱ káʼa̱n Biblia xa̱ʼa̱ ña̱ koo chí nu̱únínu chi̱ndeéña iin ta̱a ta̱ xi̱xiʼiní ndixi ña̱ va̱ʼa sandákoora keʼéra ña̱yóʼo. Koto video ña̱ naní Ni̱xa̱i̱ xi̱kundasíi̱ ña̱ xi̱keʼíi̱.

•    Ña̱ káʼa̱n Biblia xa̱ʼa̱ ña̱ koo chí nu̱únínu kivi chindeéña miíyó tá xíʼi̱ iin na̱ kúni̱níyó xíniyó. Koto video ña̱ naní Kúsuchíní-iniyó tá xíʼi̱ iin na̱ kúni̱níyó xíniyó.

 Ku̱a̱ʼání na̱ yiví ndákanixi̱nína ña̱ sana va̱ʼakava kundooyó chí nu̱únínu, soo va̱ása kúnda̱a̱ káxi inina á ndixa kuu ña̱yóʼo. Soo kiviva kundaa-iniyó ña̱ káʼa̱n Biblia. ¿Nda̱chun? Saáchi mií Jehová kúú ta̱ ni̱ka̱ʼa̱n ndiʼi ña̱ va̱xi nu̱ú Biblia, ta “Ndióxi̱ a ni loʼoví va̱ása káʼa̱nra ña̱ vatá” (Tito 1:2). Iinlá Jehová kúú ta̱ kivi saxínu ndiʼi ña̱ káʼa̱nra, ta kiviva keʼéra nda̱a̱ ndáaka ña̱ʼa (Salmo 135:5, 6).

 Kiviva kandíxaún ña̱ ndixa xi̱nu ña̱ káʼa̱n Biblia koo chí nu̱únínu. Ta ña̱ va̱ʼa kandíxaún ña̱yóʼo, káʼa̱nndi̱ xíʼún ña̱ viíní ná kaʼviún Biblia (Hechos 17:11). Ña̱kán, kiviva sakúaʼakaún xa̱ʼa̱ ña̱ káʼa̱n Biblia ta va̱ása chaʼviún. Vitin ña̱ kíxáʼa ku̱i̱ya̱ 2023 yóʼo, va̱ʼaní ná koo ña̱ kundatún ndakiʼún.