NÁ KUNDOO TU̱ʼVAYÓ
Xa̱a̱ ni̱xi̱nu iin ku̱i̱ya̱ ndíkaa̱ guerra chí Ucrania | ¿Ndáaña káʼa̱n Biblia xa̱ʼa̱ ña̱yóʼo?
Ki̱vi̱ viernes 24 tí febrero ña̱ ku̱i̱ya̱ 2023, ni̱xi̱nu iin ku̱i̱ya̱ ña̱ ku̱u iin ña̱ suchíní-ini, ta ña̱yóʼo kúú guerra ña̱ ndíkaa̱ chí Ucrania. Íyo na̱ káʼa̱n ña̱ 300,000 na̱ soldado na̱ ñuu Ucrania xíʼin na̱ soldado ñuu Rusia ni̱xi̱ʼi̱na ta savana tu̱kue̱ʼe̱na, ta káchina ña̱ ni̱xi̱ʼi̱ inka 30,000 na̱ yiví. Soo sana ku̱a̱ʼákava na̱ yiví ni̱xi̱ʼi̱.
Ta náʼa̱ ña̱ va̱ása ndiʼi ya̱chi̱ví ña̱ guerra yóʼo.
“Xa̱a̱ ni̱xi̱nu iin ku̱i̱ya̱ ña̱ ni̱ki̱ʼvi na̱ soldado ña̱ ñuu Rusia chí Ucrania, ta náʼa̱ ña̱ va̱ása ndiʼi ya̱chi̱ví ña̱ guerra yóʼo. Saátu náʼa̱ ña̱ va̱ása kuchiñu nda̱a̱ ni iinna xíʼin ña̱ guerra yóʼo ta saátu náʼa̱ ña̱ u̱vi̱ saá na̱yóʼo va̱ása xíínna kindo̱ona iin ña̱ va̱ʼa xíʼin táʼanna” (NPR [radio pública nacional de Estados Unidos], 19 tí febrero ña̱ ku̱i̱ya̱ 2023).
Ku̱a̱ʼání na̱ yiví ndíʼi̱ní-inina xa̱ʼa̱ ña̱ ndeéní sáxo̱ʼvi̱ ña̱ guerra yóʼo na̱ yiví na̱ íyo iníísaá nu̱ú ñuʼú yóʼo ta sákusuchíníña-inina. ¿Ndáaña va̱ʼa kúú ña̱ káʼa̱n Biblia koo chí nu̱únínu? ¿Á kixaa̱ iin ki̱vi̱ ña̱ va̱ása kooka guerra?
Iin guerra ña̱ sandíʼi-xa̱ʼa̱ ndiʼi guerra ña̱ kúu nu̱ú ñuʼú yóʼo
Ña̱ Biblia káʼa̱nña xa̱ʼa̱ iin guerra ña̱ sakǎku na̱ yiví. Ña̱ guerra yóʼo kúú ña̱ naní Armagedón, ta iin libro ña̱ va̱xi nu̱ú Biblia ña̱ naní Apocalipsis káʼa̱nña xa̱ʼa̱ ña̱yóʼo ña̱ kúúña iin guerra ña̱ koo ki̱vi̱ káʼnu Ndióxi̱ ta̱ kúúmií ndiʼi ndee̱ (Apocalipsis 16:14, 16). Ta Ndióxi̱ kuniñúʼura guerra yóʼo ña̱ sandíʼi-xa̱ʼa̱ra ndiʼi na̱ chíñu na̱ íyo nu̱ú ñuʼú yóʼo, chi ku̱a̱chi na̱yóʼo kúú ña̱ íyoní guerra ta ku̱a̱ʼání ña̱ʼa ndíʼi-xa̱ʼa̱. Tá kúni̱ún kunda̱a̱-iniún ndáa ki̱ʼva ndakundoo viíyó tá ná kixaa̱ ña̱ Armagedón, kaʼvi artículo ña̱ naní: