CAMPAÑA ÑA̱ CONMEMORACIÓN
Tá ná kaʼndachíñu ta̱ Jesús va̱ása kooka na̱ kéʼé ña̱ va̱ása va̱ʼa
Ta̱ Jesús kúnda̱a̱va-inira ndáa ki̱ʼva kúniyó tá íxandi̱va̱ʼana xíʼinyó chi saátu i̱xandi̱va̱ʼanína xíʼin miíra ni kǒo ni iin ña̱ va̱ása va̱ʼa níkeʼéra. Ka̱ninara, ni̱ka̱ʼa̱nna ña̱ vatá xa̱ʼa̱ra, va̱ása nda̱kú níndatiinna ku̱a̱chi xíʼinra ta sa̱xóʼvi̱nínara tá xa̱ʼnínara. Ni kǒo ku̱a̱chi níxikuumiíra, ka̱ndíxara kuvira “xa̱ʼa̱ na̱ yiví ña̱ ndacháʼvira xa̱ʼa̱na” (Mateo 20:28; Juan 15:13). Vitin, kúúra rey ti̱xin Reino Ndióxi̱, ta ndáa loʼoní tiempo kúma̱ní ña̱ sandíʼi-xa̱ʼa̱ra ndiʼi ña̱ʼa ña̱ va̱ása va̱ʼa ña̱ íyo nu̱ú ñuʼú yóʼo ta nda̱kúní ndatiinra ku̱a̱chi (Isaías 42:3).
Siaʼa káʼa̱n Biblia koo nu̱ú ñuʼú yóʼo chí nu̱únínu:
“Si̱lóʼo tiempo kúma̱ní, ta na̱ yiví na̱ kéʼé ña̱ va̱ása va̱ʼa ndiʼi-xa̱ʼa̱na, ta ni ná kotoún nu̱ú xi̱ndoona kǒokana kuniún. Soo na̱ vitá-ini kúú na̱ kundoo nu̱ú ñuʼú yóʼo ta si̱íní kundoona nu̱úña chi kǒoka ku̱a̱chi koo” (Salmo 37:10, 11).
¿Ndáa ki̱ʼva kivi na̱ʼa̱yó ña̱ chíndayáʼviyó ndiʼi ña̱ ke̱ʼé ta̱ Jesús xa̱ʼa̱yó ta saátu ña̱ keʼéra chí nu̱únínu? Nu̱ú Lucas 22:19 ni̱ka̱ʼa̱n ta̱ Jesús xíʼin na̱ xi̱ndiku̱n sa̱tára ña̱ ná ndakaʼánna xa̱ʼa̱ ña̱ ni̱xi̱ʼi̱ra. Xa̱ʼa̱ ña̱kán, ndiʼi ku̱i̱ya̱ na̱ testigo Jehová ndákutáʼanna ña̱ ndakaʼánna xa̱ʼa̱ ña̱yóʼo. Ña̱kán kánandi̱ yóʼó ña̱ ku̱ʼún xíʼinndi̱ ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús, ki̱vi̱ domingo 24 tí marzo ña̱ 2024.