Sava na̱ yiví ku̱a̱ʼání ndixi xíʼina tá ndíʼi̱ní-inina, tá kúni mitúʼunna á tá kǒo ña̱ʼa keʼéna. Ta, ¿yóʼótu? ¿Á ku̱a̱ʼáka ndixi xíʼún vitin nu̱ú tá xi̱xiʼún tá ya̱chi̱? ¿Ndáaña kivi keʼún ña̱ va̱ʼa kiʼún kuenta nda̱saa ndixi koʼún, tasaá va̱ása xa̱ún kutóoníún koʼúnrá? Yóʼo kivi ndani̱ʼún sava consejo ña̱ kivi chindeétáʼan xíʼún.

•  ¿Nda̱saa ndixi koʼún?

•  ¿Ndáaña náʼa̱ ña̱ ku̱a̱ʼání ndixi xíʼii̱?

•  U̱ʼu̱n ña̱ kivi keʼún ña̱ va̱ʼa loʼo ndixi koʼún

 Ña̱ káʼa̱n Biblia: “Va̱ása kutáʼún xíʼin na̱ xíʼi ku̱a̱ʼání vino” (Proverbios 23:20).

 Ndakanixi̱ní xa̱ʼa̱ ña̱yóʼo: Tu̱ʼun Ndióxi̱ va̱ása káʼa̱nña ña̱ iin ku̱a̱chi ndeé kúú ña̱ koʼoyó loʼo ndixi (Eclesiastés 9:7). Soo káʼa̱nvaña nda̱chun síín íyo ña̱ koʼoyó loʼo ndixi, ña̱ koʼoyó ku̱a̱ʼá ndixi ta saátu ña̱ xi̱niyó xíʼin ndixi (Lucas 21:34; Efesios 5:18; Tito 2:3). Ni va̱ása xa̱a̱víyó xi̱niyó xíʼin ndixi soo tá ná koʼoyó ku̱a̱ʼánírá kivi tavárá kue̱ʼe̱ xíʼinyó, va̱ása viíka kutáʼanyó xíʼin inkana ta va̱ása vií koo ña̱ ndaka̱xinyó keʼéyó (Proverbios 23:29, 30).

 Na̱ xíni̱ va̱ʼa xa̱ʼa̱ ña̱yóʼo kúnda̱a̱-inina ndáaña kúni̱ kachi ña̱ koʼoyó loʼo ndixi á ña̱ koʼoyó ku̱a̱ʼárá. ¿Ndáa ki̱ʼva kéʼéna ña̱yóʼo? Ndákaʼvina nda̱saa copa ndixi xíʼi iin na̱ yiví iin ki̱vi̱, ta nda̱saa ki̱vi̱ xíʼina ti̱xin iin semana. a Xa̱a̱ síín síín ndóʼo na̱ yiví tá xíʼina ndixi, ta sava yichi̱ ña̱ va̱ʼaka kúú ña̱ ná va̱ása koʼona nda̱a̱ ni loʼorá. Na̱ Organización Mundial de la Salud káʼa̱nna ñayóʼo:

 Sava yichi̱ va̱ása xíniñúʼu koʼún nda̱a̱ ni loʼo ndixi:

•   Tá kávaún carro á inkaka ña̱ʼa.

•   Tá ñúʼu se̱ʼún á tá sáchichíún se̱ʼún.

•   Tá xíʼún ta̱tán.

•   Tá kúúmiíún sava kue̱ʼe̱.

•   Tá va̱ása xíni̱ún ka̱ʼnu̱-iniún ña̱ loʼo ndixi koʼún.

 Ña̱ káʼa̱n Biblia: “Ná kotoyó ndáa ki̱ʼva íyo ña̱ kéʼéyó” (Lamentaciones 3:40).

 Ndakanixi̱ní xa̱ʼa̱ ña̱yóʼo: Kiviva kundaún miíún nu̱ú tu̱ndóʼo ña̱ táxi ndixi tá ná kotoún nda̱saará xíʼún, tasaá kiʼún kuenta ña̱ sana xíniñúʼu nasamaún ña̱ kéʼún. Ña̱ va̱xi yóʼo na̱ʼa̱ña á ku̱a̱ʼání ndixi xíʼún:

•   ¿Á xíniñúʼu koʼún ndixi ña̱ va̱ʼa kusi̱í-iniún? Á túviún ña̱ xíniñúʼu koʼúnrá ña̱ va̱ʼa va̱ása kundi̱ʼi̱ka-iniún, ña̱ va̱ʼa kutáʼún xíʼin inkana á ña̱ va̱ʼa kusi̱í-iniún. Á xíʼún ndixi tá yáʼún nu̱ú tu̱ndóʼo.

•   ¿Á ku̱a̱ʼáka ndixi xíʼún vitin nu̱ú tá xi̱xiʼún tá ya̱chi̱? Á ni̱ʼika xíʼún ndixi tá xa̱ti̱ka á tá ndeéka. Á xíniñúʼu ku̱a̱ʼákará koʼún vitin nu̱ú tá xi̱xiún tá ya̱chi̱, tasaá va̱ʼa kuniún.

•   ¿Á xa̱ʼa̱ ña̱ xíʼún íyo tu̱ndóʼo nu̱ún? Sana ti̱xin veʼún á nu̱ú káchíñún. Tá kúú, á ku̱a̱ʼání xu̱ʼún xíniñúʼún ña̱ va̱ʼa satáún ndixi koʼún.

•   ¿Á va̱ása vií íyo ña̱ ndáka̱xiún keʼún tá xíʼún? Sana kúni̱ún kavaún carro á inkaka ña̱ʼa, á kúni̱ún ki̱ʼviún ini ti̱kui̱í á su̱tíaún.

•   ¿Á xa̱a̱ káʼa̱nna xíʼún ña̱ ndíʼi̱-inina xa̱ʼún xa̱ʼa̱ ña̱ ku̱a̱ʼání ndixi xíʼún? Tá káʼa̱nna xíʼún xa̱ʼa̱ ña̱ xíʼún ndixi á kama kíxáʼún káʼún xíʼinna ña̱ su̱ví ña̱ ndeéví kúúña. Sana xíʼi se̱ʼún ndixi ta va̱ása káʼún ña̱ nda̱a̱ xa̱ʼa̱ nda̱saa ndixi xíʼún.

•   Va̱ása kúchiñún sandákoúnrá. Sana xa̱a̱ kúni̱ún va̱ása ku̱a̱ʼáka ndixi koʼún á sandákoo va̱ʼúnrá, soo ta̱ʼán kuchiñún sandákoúnrá.

 1. Ndakanixi̱ní xa̱ʼa̱ ña̱ keʼún.

 Ña̱ káʼa̱n Biblia: “Na̱ ndákani vií xi̱ní xa̱ʼa̱ ña̱ keʼéna viíní kanaña” (Proverbios 21:5).

 Ña̱yóʼo keʼún: Ndakanixi̱ní ndáa ki̱vi̱ ña̱ semana kúú ña̱ koʼún. Ta ndaka̱xiún nda̱saa ndixi koʼún ki̱vi̱ kán. Ta ndaka̱xiún u̱vi̱ ki̱vi̱ ña̱ va̱ása koʼún ndixi ti̱xin semana kán.

 Iin organización ña̱ íyo chí Reino Unido ña̱ chíndeétáʼan xíʼin na̱ yiví ña̱ loʼo ndixi koʼona, káchina: “Ña̱ chindeétáʼan xíʼin iin na̱ yiví ña̱ va̱ása xa̱a̱na kutóonína koʼona ndixi, kúú ña̱ ndaka̱xinna ku̱a̱ʼá ki̱vi̱ ña̱ va̱ása koʼona ndixi”.

 2. Keʼé ña̱ nda̱kaxiún.

 Ña̱ káʼa̱n Biblia: “Sandíʼindó chiñu ña̱ xa̱a̱ ki̱xáʼandó kéʼéndó” (2 Corintios 8:11).

 Ña̱yóʼo keʼún: Kiʼún kuenta nda̱saa ndixi chíka̱ún ini vaso. Ta saátu xíniñúʼu kotoún sa̱tá botella nda̱saa alcohol kúúmiírá, ña̱ va̱ʼa kunda̱a̱-iniún á kúúra ndixi tá xa̱ti̱ka á tá ndeéka. ¿Á íyo inka ndutá tá kútóún koʼún tá va̱ása kúúmií alcohol? Tá saá, táyóʼo kivi koʼún.

 Na̱ Instituto Nacional sobre el Abuso del Alcohol y el Alcoholismo na̱ íyo chí Estados Unidos, káchina: “Va̱ása xa̱a̱víún kuumiíún tu̱ndóʼo xa̱ʼa̱ ña̱ xíʼún ndixi tá loʼo tá loʼo ná nasamaún ña̱ kéʼún”.

 3. Ndakú koo iniún.

 Ña̱ káʼa̱n Biblia: “Tá káʼa̱nndó keʼéndó iin ña̱ʼa, keʼéndóña, soo tá káʼa̱nndó ña̱ va̱ása keʼéndóña, va̱ása keʼéndóña” (Santiago 5:12).

 Ña̱yóʼo keʼún: Tá káʼa̱nna xíʼún koʼún loʼo ndixi soo xa̱a̱ chi̱ka̱a̱-iniún ña̱ va̱ása koʼokaún, káxi ka̱ʼún xíʼinna ña̱ va̱ása koʼúnrá soo vií ka̱ʼún.

 Na̱ Instituto Nacional sobre el Abuso del Alcohol y el Alcoholismo na̱ íyo chí Estados Unidos, káchina: “Tá kama ná ka̱ʼún xíʼinna ña̱ va̱ása koʼún, va̱ása xa̱a̱víún keʼún ña̱ káʼa̱nna”.

 4. Ndakanixi̱ní xa̱ʼa̱ ña̱ va̱ʼa ndakiʼún.

 Ña̱ káʼa̱n Biblia: “Va̱ʼaníka kúniyó tá sándiʼiyó kéʼéyó iin ña̱ʼa nu̱úka ña̱ kíxáʼayó xíʼinña” (Eclesiastés 7:8).

 Ña̱yóʼo keʼún: Kaʼyí iin lista nda̱chun kúú ña̱ kúni̱ún kiʼún kuenta xíʼin ndixi xíʼún; tá kúú, sana va̱ʼaka ku̱su̱ún, va̱ása kiʼin kue̱ʼe̱ yóʼo, taxiva̱ʼún xu̱ʼún ta va̱ʼaníka kutáʼún xíʼin inkana. Tá ná natúʼún xíʼin inkana xa̱ʼa̱ ña̱ kúni̱ún keʼún, ka̱ʼa̱n xíʼinna xa̱ʼa̱ ña̱ va̱ʼa ndakiʼún ta su̱ví xa̱ʼa̱ ña̱ ixayo̱ʼvi̱ xíʼún.

 5. Ka̱ʼa̱n xíʼin Ndióxi̱ ná taxira ndee̱ ndaʼún.

 Ña̱ káʼa̱n Biblia: “Ndiʼi ña̱ʼa va̱ʼa kéʼíi̱ña chi Ndióxi̱ táxi ndee̱ ndaʼíi̱” (Filipenses 4:13).

 Ña̱yóʼo keʼún: Tá kíʼún kuenta ña̱ ku̱a̱ʼání ndixi xíʼún, ka̱ʼa̱n xíʼin Ndióxi̱ ná chindeétáʼanra xíʼún; ndukú ndee̱ nu̱úra ta ná chindeétáʼanra xíʼún ka̱ʼnu̱-iniún. b Tavá tiempo ña̱ kaʼviún tu̱ʼunra ña̱ va̱ʼa ndani̱ʼún consejo ña̱ kivi chindeétáʼan xíʼún. Kuchiñuvaún kiʼún kuenta nda̱saa ndixi koʼún tá ná chindeétáʼan Ndióxi̱ xíʼún.