NÁ KUNDOO TU̱ʼVAYÓ
Ku̱a̱ndaaní ya̱ʼvi ña̱ʼa iníísaá ñuyǐví | ¿Ndáaña káʼa̱n Biblia xa̱ʼa̱ ña̱yóʼo?
Ta̱ ndísochíñu xíʼin ña̱ Grupo del Banco Mundial ni̱ka̱ʼa̱nra ña̱yóʼo tá junio 2022: “Tuku yo̱ʼvi̱níka ni̱ʼíyó ña̱ xíniñúʼuyó tiempo vitin”. Ta ka̱chikara: “Ku̱a̱ndaaní ya̱ʼvi ña̱ʼa ña̱ xíniñúʼuyó tiempo vitin, ta saátu loʼoní xu̱ʼún kúúmií na̱ yiví ta va̱ása kívi chaʼvina ña̱yóʼo”.
Na̱ Fondo Monetario Internacional káchina: “Kamaní ku̱a̱ndaa ya̱ʼvi ña̱ kuxuyó ta saátu inkaka ña̱ʼa ña̱ xíniñúʼuyó, ta na̱ xóʼvi̱ka xa̱ʼa̱ ña̱yóʼo kúú ñuu nu̱ú ndáʼviníka na̱ yiví”.
Biblia chíndeétáʼanña xíʼinyó ña̱ kunda̱a̱-iniyó nda̱chun kúu ña̱yóʼo, ndáaña kivi keʼéyó ña̱ ya̱ʼayó nu̱ú ña̱yóʼo ta saátu ndáana kivi chindeétáʼan xíʼinyó chí nu̱únínu ta va̱ása xo̱ʼvi̱kayó xa̱ʼa̱ ña̱yóʼo.
Ku̱a̱ndaaní ya̱ʼvi ña̱ʼa “ki̱vi̱ nu̱ú ndíʼi”
Tu̱ʼun Ndióxi̱ káʼa̱nña ña̱ ndóoyó “ki̱vi̱ nu̱ú ndíʼi” (2 Timoteo 3:1).
Ta̱ Jesús ni̱ka̱ʼa̱nra ña̱ kuniyó ña̱ʼa ña̱ ndeéní yi̱ʼvíyó xíʼin tiempo vitin (Lucas 21:11). Xa̱ʼa̱ ña̱ ku̱a̱ndaaní ya̱ʼvi ña̱ʼa yíʼviní na̱ yiví. Na̱ yiví yíʼvina xa̱ʼa̱ ña̱ kuu chí nu̱únínu ta saátu ndíʼi̱-inina chi va̱ása xíni̱na á kivi taxina ña̱ xíniñúʼu na̱ veʼena.
Tutu ña̱ Apocalipsis káʼa̱nña ña̱ yaʼviní koo ña̱ kuxuyó tiempo vitin. “Xi̱niso̱ʼi̱ ña̱ ni̱ka̱ʼa̱n iinna, ta ka̱china: ‘Iin litro trigo ya̱ʼviña iin denario’” (Apocalipsis 6:6).
Ña̱ va̱ʼa kunda̱a̱ka-iniún xa̱ʼa̱ ña̱ káʼa̱n xa̱ʼa̱ “ki̱vi̱ nu̱ú ndíʼi” xíʼin profecía ña̱ va̱xi nu̱ú Apocalipsis koto video ña̱ naní Tá ku̱i̱ya̱ 1914 na̱samaní ña̱ kúú nu̱ú ñuʼú yóʼo xíʼin artículo ña̱ naní “¿Qué representan los jinetes del Apocalipsis?”.
Kixaa̱ iin tiempo ña̱ koo ndiʼi ña̱ xíniñúʼuyó
“Keʼéna veʼe, ta miína koo iniña; ta chiʼina uva ta miína kaxirí. Kǒo keʼéna veʼe ta inkana koo iniña, va̱ása chiʼina ña̱ʼa ta inkana kaxíña. Chi na̱ ñui̱ ku̱a̱ʼákaví tiempo koona táki̱ʼva xíyo iin yitu̱n, ndiʼi chiñu keʼéna kusi̱í-inina xíʼinña” (Isaías 65:21, 22).
“Nu̱ú ñuʼú ku̱a̱ʼání ña̱ʼa koo kuxuna, ta chí yuku̱ ku̱a̱ʼáníkaña koo” (Salmo 72:16).
“‘Xa̱ʼa̱ ña̱ xítoi̱ xóʼvi̱ na̱ yiví ta saátu xa̱ʼa̱ ña̱ xítoi̱ xóʼvi̱ na̱ ndáʼvi, chindeétáʼanvai̱ xíʼinna’, káchi Jehová” (Salmo 12:5). a
Si̱lóʼo kúma̱ní sandíʼi-xa̱ʼa̱ Ndióxi̱ tu̱ndóʼo ña̱ kúúmiíyó xa̱ʼa̱ xu̱ʼún. Ta su̱ví iinlá ñuu keʼéra ña̱yóʼo chi keʼéraña nu̱ú iníísaá ñuyǐví. Ña̱ va̱ʼa kunda̱a̱ka-iniún xa̱ʼa̱ ña̱yóʼo kaʼvi artículo ña̱ naní “¿Es realista esperar un sistema económico justo?”.
Biblia chíndeétáʼanña xíʼinyó tiempo vitin ña̱ kunda̱a̱-iniyó ndáaña keʼéyó ni ku̱a̱ndaaní ya̱ʼvi ña̱ʼa. ¿Ndáa ki̱ʼva chíndeétáʼanña xíʼinyó? Táxiña consejo ndaʼa̱yó ña̱ viíní kuniñúʼuyó xu̱ʼún (Proverbios 23:4, 5; Eclesiastés 7:12). Ña̱ va̱ʼa kunda̱a̱ka-iniún xa̱ʼa̱ ña̱yóʼo kaʼvi artículo ña̱ naní “Cuide su economía” xíʼin ña̱ naní “Cómo vivir con menos”.
a Ki̱vi̱ Ndióxi̱ kúú Jehová (Salmo 83:18).