Ley ña̱ ta̱xi Ndióxi̱ ndaʼa̱yó ña̱ va̱ʼa kundaayó miíyó, ndíchiní íyoña
Tá kúma̱ní si̱lóʼo tiempo ña̱ ki̱ʼvi na̱ ñuu Israel ti̱xin ñuʼú ña̱ ni̱ka̱ʼa̱n Ndióxi̱ taxira ndaʼa̱na. Ni̱ka̱ʼa̱nra xíʼinna ña̱ kundaara miína xíʼin kue̱ʼe̱ ña̱ ni̱xi̱yo chí ñuu Egipto, ta xa̱a̱ íyo 3,500 ku̱i̱ya̱ ku̱u ña̱yóʼo (Deuteronomio 7:15). Iin ki̱ʼva ña̱ xi̱ndaarana kúú ña̱ ni̱ka̱ʼa̱nra xíʼinna ndáaña keʼéna ña̱ va̱ʼa va̱ása kiʼin kue̱ʼe̱ miína. Tá kúú:
Ni̱xi̱yo Ley ña̱ xi̱ka̱ʼa̱n xíʼin na̱ ñuu ña̱ xíniñúʼu kuchina ta ndakatana ti̱ko̱to̱na (Levítico 15:4-27).
Ndióxi̱ ni̱ka̱ʼa̱nra xíʼinna ndáaña xíniñúʼu keʼéna tá ná tatána: “Xíniñúʼu koo iin lugar nu̱ún, nu̱ú kǒo na̱ yiví chí sa̱tá ña̱ campamento, ta kán kúu nu̱ú kivi tatáún. Ta xíniñúʼu kuniʼún iin yitu̱n tú xi̱ín nu̱ú ku̱ʼu̱n xíʼún. Ta tá ná tatáún xíniñúʼu kaún iin ya̱vi̱ xíʼin tú yitu̱n yóʼo, ta tándi̱ʼi ndakasiún sa̱tá ña̱yóʼo” (Deuteronomio 23:12, 13).
Na̱ yiví na̱ xi̱kuumií iin kue̱ʼe̱ xíkun, xi̱niñúʼu chika̱a̱na na̱yóʼo cuarentena á koo xíkána nu̱ú na̱ yiví. Tá xi̱ndaʼa na̱ yiví na̱ xi̱kuumií kue̱ʼe̱ yóʼo xi̱niñúʼu ndakatana ti̱ko̱to̱na ta kuchina tá kúni̱na koo yéʼe̱na tasaá va̱ʼa ndikóna campamento nu̱ú ni̱xi̱yona (Levítico 14:8, 9).
Tá iin na̱ yiví xi̱tiinna na̱ ni̱xi̱ʼi̱, xi̱niñúʼu kundika̱a̱na cuarentena á kuxíkána nu̱ú inkana (Levítico 5:2, 3; Números 19:16).
Ni xa̱a̱ ku̱a̱ʼání tiempo ni̱ya̱ʼa ña̱ ta̱xi Ndióxi̱ Ley ndaʼa̱ na̱ ñuu Israel xa̱ʼa̱ ndáa ki̱ʼva kundaana miína, iin kítáʼan ña̱yóʼo xíʼin ña̱ káʼa̱n na̱ doctor tiempo vitin.
Inka lugar kǒo níxi̱kiʼinna kuenta xa̱ʼa̱ ndáa ki̱ʼva kundaana miína. Tá kúú:
Xi̱xatana ña̱ʼa ña̱ yaku̱a̱ chí calle. Xi̱xatana ti̱kui̱í tá yaku̱a̱ á inkaka ña̱ʼa ña̱ xa̱a̱ ndi̱ʼi-xa̱ʼa̱ ta xa̱ʼa̱ ña̱yóʼo ku̱a̱ʼání na̱ yiví ki̱ʼin kue̱ʼe̱ ta saátu ku̱a̱ʼání na̱ va̱lí ni̱xi̱ʼi̱.
Na̱ doctor na̱ ni̱xi̱yo xi̱naʼá kǒo níxikunda̱a̱-inina ndáa ña̱ʼa kúú ña̱ kivi tavá kue̱ʼe̱ xíʼin na̱ yiví. Na̱ ñuu Egipto xi̱xiniñúʼuna ni̱i̱ tí lagarto, si̱ʼví tí saa, ti̱ín tí xa̱a̱ ni̱xi̱ʼi̱, ta̱lása á tíaxa ta saátu si̱táva̱ʼa ña̱ xa̱a̱ ndi̱ʼi-xa̱ʼa̱ chi xi̱ndakanixi̱nína ña̱ kivi sandáʼa ña̱yóʼo miína. Saátu xi̱xiniñúʼuna si̱ʼví na̱ yiví ta saátu si̱ʼví tí kití.
Na̱ ñuu Egipto xi̱kiʼinna kue̱ʼe̱ xa̱ʼa̱ ña̱ xi̱xiʼina ti̱kui̱í yaku̱a̱ tá yu̱ta Nilo. Ta saátu ku̱a̱ʼání na̱ va̱lí na̱ ñuu Egipto ni̱xi̱ʼi̱na chi ki̱ʼinna kue̱ʼe̱ ña̱ kúun-ini á xa̱ʼa̱ ña̱ xi̱xina ña̱ʼa ña̱ yaku̱a̱.
Soo na̱ ñuu Israel, va̱ʼaníva ni̱xi̱yo na̱yóʼo nu̱úka na̱ inka ñuu ta kǒo níkiʼinna kue̱ʼe̱ chi xi̱ndiku̱nna ña̱ káʼa̱n Ley Ndióxi̱ xa̱ʼa̱ ndáa ki̱ʼva kundaana miína.
