Tá xi̱ta̱a̱n ña̱ lunes 10 tí octubre ña̱ ku̱i̱ya̱ 2022, na̱ ñuu Rusia sa̱kóyona bomba sa̱tá sava ñuu ña̱ íyo chí Ucrania. Ña̱yóʼo ku̱uña saáchi xa̱a̱ u̱vi̱ ki̱vi̱ tá ya̱chi̱ na̱ ñuu Ucrania sa̱ndíʼi-xa̱ʼa̱na puente ña̱ ndáchitáʼan Crimea xíʼin Rusia. Tá kúma̱níka kuu ña̱yóʼo sava na̱ chíñu ni̱ka̱ʼa̱nna ña̱ kixaa̱ ña̱ Armagedón.

•    “Ni ndeéníva ni̱xi̱yo tiempo tá xa̱ʼndachíñu ta̱ Kennedy ta̱ xi̱kuu presidente chí Estados Unidos ta saátu tá ni̱ko̱yo bomba chí Cuba, vitin kúú ña̱ xa̱a̱ ku̱yatinníka ña̱ Armagedón. [...] Xa̱ʼa̱ ña̱ xíniñúʼuna bomba ña̱ ndeéní, ña̱ kixaa̱ kúúva Armagedón” (ta̱ Joe Biden, ta̱ presidente ña̱ Estados Unidos, 6 tí octubre ña̱ ku̱i̱ya̱ 2022).

•   “Yi̱ʼi̱ túvii̱ ña̱ Armagedón kúú ña̱ xa̱a̱ ki̱xaa̱ vitin; i̱yoní ña̱yóʼo, saáchi iníísaá ñuyǐví kivi sandíʼi-xa̱ʼa̱ña” (ña̱yóʼo kúú ña̱ ni̱ka̱ʼa̱n ta̱ Volodímir Zelenski, ta̱ presidente ñuu Ucrania, tá ni̱nda̱ka̱tu̱ʼunnara xa̱ʼa̱ tu̱ndóʼo ña̱ kivi kuu xa̱ʼa̱ ña̱ xíniñúʼuna bomba; BBC News, 8 tí octubre ña̱ ku̱i̱ya̱ 2022).

 ¿Á kivi kixaa̱ ña̱ Armagedón xa̱ʼa̱ ña̱ xíniñúʼunína bomba? ¿Ndáaña káʼa̱n Biblia xa̱ʼa̱ ña̱yóʼo?

 Va̱ásaví. Iin yichi̱ kuití va̱xi tu̱ʼun Armagedón nu̱ú Biblia ta va̱xiña nu̱ú Apocalipsis 16:16. Ta va̱ása káʼa̱nña xa̱ʼa̱ ña̱ kánitáʼan iin ñuu xíʼin inka ñuu, chi ña̱ káʼa̱nña xa̱ʼa̱ kúú ña̱ kanitáʼan Ndióxi̱ xíʼin ndiʼi “na̱ rey na̱ íyo nu̱ú ñuʼú” (Apocalipsis 16:14). Ti̱xin ña̱ Armagedón, Ndióxi̱ sandíʼi-xa̱ʼa̱ra ndiʼi na̱ chíñu na̱ íyo nu̱ú ñuʼú yóʼo (Daniel 2:44).

 Ña̱ va̱ʼa kunda̱a̱ka-iniún xa̱ʼa̱ ña̱ kuu nu̱ú ñuʼú yóʼo tá ná kixaa̱ ña̱ Armagedón, kaʼvi artículo ña̱ naní “¿Ndáaña kúú Armagedón?”.

 Va̱ásaví. Sana kivi kuniñúʼuva na̱ chíñu bomba chí nu̱únínu ña̱ kuni̱na sandíʼi-xa̱ʼa̱na ñuʼú yóʼo soo va̱ása taxi Ndióxi̱ ña̱ kuu ña̱yóʼo. Biblia káchiña:

•    “Ñuʼú ndiʼi tiempo kooña” (Eclesiastés 1:4).

•    “Na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Salmo 37:29).

 Soo profecía ña̱ va̱xi nu̱ú Biblia xíʼin ndiʼika ña̱ kúu vitin náʼa̱ña ña̱ ndóoyó iin tiempo ña̱ ndáyáʼviní (Mateo 24:3-7; 2 Timoteo 3:1-5). Tá kúni̱ún kunda̱a̱-iniún ndáaña káʼa̱n Biblia xa̱ʼa̱ ña̱ kuu chí nu̱únínu koto ndáaña sánáʼa̱ Biblia.