NÁ KUNDOO TU̱ʼVAYÓ
Na̱ científico káʼa̱nna ña̱ xa̱a̱ ku̱yatinní ndiʼi-xa̱ʼa̱ ñuyǐví | ¿Ndáaña káʼa̱n Biblia xa̱ʼa̱ ña̱yóʼo?
Tá 24 tí enero ña̱ ku̱i̱ya̱ 2023, na̱ científico ni̱ka̱ʼa̱nna ña̱ xa̱a̱ ku̱yatinní ndiʼi-xa̱ʼa̱ ñuyǐví, ta chítáʼanna ña̱yóʼo xíʼin iin reloj a ña̱ xa̱a̱ ku̱yatin xa̱a̱ ma̱ʼñú ñuú.
“Tá martes, na̱ científico na̱samana hora reloj ña̱ ndána̱ʼa̱ ña̱ xa̱a̱ ku̱yatin ndiʼi-xa̱ʼa̱ ñuyǐví, ta vitin xa̱a̱ ku̱yatin xa̱a̱ña ma̱ʼñú ñuú. Ta ke̱ʼéna ña̱yóʼo xa̱ʼa̱ ña̱ íyo guerra chí Ucrania, xa̱ʼa̱ ña̱ yíʼvina ndiʼi-xa̱ʼa̱ ñuyǐví xíʼin bomba ta saátu ña̱ yíʼvina ndiʼi-xa̱ʼa̱ ñuʼú yóʼo xa̱ʼa̱ ña̱ niʼníní, ña̱ vi̱xinní á xa̱ʼa̱ ña̱ ndeéní kúun sa̱vi̱” (Servicio internacional de noticias de la agencia AFP).
“Tá martes, na̱ científico na̱samana hora reloj ña̱ ndána̱ʼa̱ ña̱ xa̱a̱ ku̱yatin ndiʼi-xa̱ʼa̱ ñuyǐví, ta vitin ndáa 90 segundo kúma̱ní ña̱ xa̱a̱ña ma̱ʼñú ñuú, ña̱yóʼo kúni̱ kachiña ña̱ xa̱a̱ yatinní ndiʼi-xa̱ʼa̱ iníísaá ñuyǐví” (ABC News).
“Na̱ científico na̱ íyo iníísaá ñuyǐví ni̱ka̱ʼa̱nna ña̱ vitin kúú ña̱ xa̱a̱ ku̱yatinní ndiʼi-xa̱ʼa̱ ñuyǐví” (The Guardian).
¿Á xa̱a̱ ku̱yatin ndiʼi-xa̱ʼa̱ ñuʼú yóʼo xíʼin na̱ yiví? ¿Á xíniñúʼu yi̱ʼvíyó xa̱ʼa̱ ña̱ kuu chí nu̱únínu? ¿Ndáaña káʼa̱n Biblia xa̱ʼa̱ ña̱yóʼo?
Ña̱ ndátuyó koo chí nu̱únínu
Biblia káʼa̱nña xa̱ʼa̱ ñuʼú yóʼo ña̱ “ndiʼi tiempo kooña” ta ndiʼi tiempo kundoo na̱ yiví nu̱úña (Eclesiastés 1:4; Salmo 37:29). Ña̱kán va̱ása kuchiñuví na̱ yiví sandíʼi-xa̱ʼa̱na ñuʼú yóʼo.
Soo íyova ña̱ ndiʼi-xa̱ʼa̱ káchi Biblia, tá kúú káʼa̱nña ña̱ “na̱ ñuyǐví yóʼo na̱ ndiʼi-xa̱ʼa̱va kúúna” (1 Juan 2:17).
Tá kúni̱ún kunda̱a̱ka-iniún ndáaña kúni̱ kachi Biblia tá káʼa̱nña xa̱ʼa̱ ña̱ ndiʼi-xa̱ʼa̱ ñuyǐví, kaʼvi artículo ña̱ naní “¿Se acerca el fin del mundo? ¿Qué es el apocalipsis?”.
Ña̱ va̱ʼa kunda̱a̱-iniún ndáaña káʼa̱n Biblia xa̱ʼa̱ ña̱ʼa ña̱ kuu chí nu̱únínu, kaʼvi artículo ña̱ naní “¿Cuándo será el fin del mundo?”.
Va̱ása kundi̱ʼiní-iniún
Ña̱ káʼa̱n Biblia chíndeétáʼanña xíʼinyó ña̱ va̱ása kundi̱ʼiní-iniyó ni ku̱a̱ʼání ña̱ va̱ása va̱ʼa kúu nu̱ú ñuʼú yóʼo. ¿Ndáa ki̱ʼva chíndeétáʼanña xíʼinyó?
Nu̱ú Biblia va̱xi consejo ña̱ va̱ʼaní ña̱ kivi chindeétáʼan xíʼinyó (2 Timoteo 3:16, 17). Tá kúni̱ún kunda̱a̱-iniún ndáa ki̱ʼva kivi chindeétáʼan Biblia xíʼún ña̱ kǒo kundi̱ʼiní-iniún ni kúúmiíún ku̱a̱ʼání tu̱ndóʼo, kaʼvi artículo ña̱ naní “Qué puedo hacer para no preocuparme tanto”.
Nu̱ú Biblia káʼa̱nña xíʼinyó xa̱ʼa̱ ña̱ va̱ʼaní kuu chí nu̱únínu (Romanos 15:4). Káʼa̱nña xíʼinyó ndáaña kúu vitin ta ndáaña kuu chí nu̱únínu, ta ña̱yóʼo chíndeétáʼanña xíʼinyó ña̱ kǒo kundi̱ʼiní-iniyó.
Tá kúni̱ún kunda̱a̱ka-iniún xa̱ʼa̱ ña̱ káʼa̱n Biblia, káʼa̱nndi̱ xíʼún ña̱ kotoún ndáa ki̱ʼva sánáʼa̱ndi̱ na̱ yiví xa̱ʼa̱ tu̱ʼun Ndióxi̱.
a “Reloj ña̱ káʼa̱n na̱ científico xa̱ʼa̱ ña̱ ndána̱ʼa̱ ña̱ xa̱a̱ ku̱yatin ndiʼi-xa̱ʼa̱ ñuyǐví xa̱ʼa̱ ña̱ʼa ña̱ kéʼé na̱ yiví. Iin ña̱ ndána̱ʼa̱ kuití kúú ña̱yóʼo ña̱ va̱ʼa kǒo nandósoyó ña̱ xíniñúʼu viíka kundaayó ñuʼú yóʼo tá kúni̱yó kundooyó nu̱úña” (Bulletin of the Atomic Scientists [Boletín de Científicos Atómicos]).