¿Nda̱chun kúúmiína anemia, ndáaña ndóʼona xíʼinña ta ndáaña kivi keʼéna?
Ñá Beth káchiñá: “Tá ni̱xi̱yo loʼi̱ xi̱kuumiíi̱ anemia, xa̱ʼa̱ ña̱yóʼo va̱ása níxi̱yo ndeíi̱ ta kamaní xi̱kunaíi̱, xi̱kuʼvi̱ lekei̱ ta xi̱ ixayo̱ʼvi̱níña xíʼi̱n keʼíi̱ sava ña̱ʼa. Soo, na̱ doctor ni̱ka̱ʼa̱nna xíʼi̱n ña̱ ná koʼi̱ ta̱tán ña̱ kúúmií hierro, ta xi̱ʼii̱ña ta saátu ki̱xáʼíi̱ viíka xíxii̱. Tá ni̱ya̱ʼa loʼo tiempo ki̱xáʼa va̱ʼa kúnii̱”.
Ku̱a̱ʼánína ndóʼona nda̱a̱ táki̱ʼva ndo̱ʼo ñá Beth. Na̱ Organización Mundial de la Salud (OMS), káʼa̱nna ña̱ 2,000 millón na̱ yiví kúúmiína anemia. País nu̱ú ndáʼviní na̱ yiví, ná ñaʼá ná ñúʼu se̱ʼe ta saátu na̱ va̱lí na̱ kúúmií u̱ni̱ nda̱a̱ u̱ʼu̱n ku̱i̱ya̱ kúú na̱ kúúmiíka anemia.
Na̱ kúúmií anemia kivi ndoʼona inkaka kue̱ʼe̱. Tá kúú kivi va̱ása viíka kachíñu níma̱na. Na̱ Organización de las Naciones Unidas (ONU) káchina ña̱ sava país “ku̱a̱ʼání ná ñaʼá ná íyo se̱ʼe xíʼi̱ná xa̱ʼa̱ ña̱ kúúmiíná anemia”. Ku̱a̱ʼání na̱ yiví kúúmiína anemia xa̱ʼa̱ ña̱ kúma̱ní hierro ku̱ñuna, ná ñaʼá ná kúúmií ña̱yóʼo va̱ása xínu yo̱o̱ ñúʼu se̱ʼená, ta tá káku ña̱ loʼo se̱ʼená va̱ása ve̱eña. Na̱ va̱lí na̱ kúúmií anemia va̱ása kama xáʼnuna ta saátu kivi kiʼin inkaka kue̱ʼe̱na. Soo íyova ña̱ kivi keʼéyó ña̱ va̱ása kiʼin kue̱ʼe̱ yóʼo miíyó, ta na̱ kúúmií anemia xa̱ʼa̱ ña̱ kúma̱ní hierro ku̱ñuna kiviva ndaʼana. a
¿Ndáaña kúú anemia?
Ña̱ anemia kúúña iin kue̱ʼe̱. Na̱ kúúmií kue̱ʼe̱ yóʼo va̱ása ku̱a̱ʼá glóbulos rojos kúúmií ni̱i̱na, soo íyo inkaka xa̱ʼa̱ kúú ña̱ ndóʼona ña̱yóʼo. Na̱ xíni̱ va̱ʼa xa̱ʼa̱ ña̱yóʼo káʼa̱nna ña̱ íyo ki̱ʼva 400 nu̱ú kue̱ʼe̱ anemia. Ta íyo ña̱ ndeé xíʼin ña̱ va̱ása ndeé, ta kivi loʼo á ku̱a̱ʼá tiempo kuumiínaña.
¿Nda̱chun kúúmiína anemia?
Íyo u̱ni̱ xa̱ʼa̱ kúú ña̱ kúúmiína anemia:
Tá ku̱a̱ʼání ni̱i̱ na̱ yiví xíta̱ saá kúú ña̱ si̱lóʼo glóbulos rojos kúúmiína.
Tá va̱ása ku̱a̱ʼá glóbulos rojos tává ku̱ñuna.
Tá sándiʼi-xa̱ʼa̱ ku̱ñuna glóbulos rojos.
Nu̱ú iníísaá ñuyǐví na̱ yiví kúúmiína anemia xa̱ʼa̱ ña̱ kúma̱ní hierro ku̱ñuna. Na̱ yiví na̱ kúma̱ní hierro ku̱ñu, va̱ása ku̱a̱ʼá hemoglobinas kúúmiína. Ña̱ glóbulos rojos kúú ña̱ kúúmií hemoglobinas ta ña̱yóʼo chíndeétáʼanña xíʼin iin na̱ yiví ña̱ ndakiʼinna ta̱chína.
¿Ndáaña ndóʼo na̱ yiví na̱ kúúmií anemia xa̱ʼa̱ ña̱ kúma̱ní hierro ku̱ñuna?
Tá kíxáʼa na̱ yiví kúúmiína anemia va̱ása ndeéví íxaña xíʼinna á sana va̱ása kíʼinna kuenta ña̱ kúúmiínaña. Ni xa̱a̱ síín síín íxaña xíʼin na̱ yiví, soo ña̱yóʼo kúú ña̱ ndóʼo ku̱a̱ʼáníkana:
Kúnaánína.
Vi̱xinní ndaʼa̱na xíʼin xa̱ʼa̱na.
Va̱ása íyo ndee̱na.
Ndúyaana.
Kúʼvi̱ xi̱nína ta xíkó nu̱úna.
Kúʼvi̱ kándíkana, kamaní kándita níma̱na ta íxayo̱ʼvi̱ña xíʼinna ña̱ ndakiʼinna ta̱chína.
Ndátání chíi̱nna.
Va̱ása kúni̱na kuxuna, ta na̱ va̱lí kúú na̱ ndóʼoka ña̱yóʼo.
Kúni̱nína kaxína hielo, ñuʼú a ña̱ʼa ña̱ kúúmií almidón.
¿Ndáana kúú na̱ kivi kundoʼo anemia xa̱ʼa̱ ña̱ kúma̱ní hierro ku̱ñuna?
Ná ñaʼá kúú ná kivika kundoʼo ña̱yóʼo xa̱ʼa̱ ña̱ xíta̱ ni̱i̱ná yo̱o̱ tá yo̱o̱. Ta saátu ná ñaʼá ná ñúʼu se̱ʼe kivi kundoʼoná ña̱yóʼo tá ña̱ xíxiná va̱ása ku̱a̱ʼá folato á ácido fólico kúúmiíña, ña̱yóʼo kúú iin táʼan ña̱ vitamina B.
Na̱ lée na̱ va̱ása ve̱e á na̱ va̱ása níxi̱nu yo̱o̱ ta ka̱kuna, kivi kuumiína ña̱yóʼo saáchi va̱ása ku̱a̱ʼá hierro kúúmií leche siʼína á leche yuchí tá xíʼina á tá ya̱a̱.
Na̱ va̱lí na̱ va̱ása xíxi ña̱ʼa va̱ʼa, tá kúú fruta xíʼin verdura.
Na̱ vegetariano saáchi va̱ása xíxina ku̱ñu á inkaka ña̱ʼa ña̱ kúúmií hierro.
Na̱ kúúmií iin kue̱ʼe̱ tá kúú na̱ íyo kue̱ʼe̱ ni̱i̱, na̱ kúúmií cáncer, na̱ va̱ása kívi tatá xíʼin na̱ kúúmií infección á na̱ xíta̱ ni̱i̱ xa̱ʼa̱ ña̱ kúúmiína iin úlcera.
¿Ndáaña kivi keʼé na̱ kúúmií anemia á na̱ va̱ása kúúmiíña?
Ku̱a̱ʼá nu̱ú kue̱ʼe̱ anemia íyo, ta sava ña̱yóʼo va̱ása kivi ndaʼayó xíʼinña ta kǒo ña̱ kivi keʼéyó ña̱ va̱ása kiʼinña miíyó. Soo na̱ kúúmií anemia xa̱ʼa̱ ña̱ kúma̱ní hierro á vitamina ku̱ñuna kiviva ndaʼana xíʼinña, ta saátu va̱ása kuumiíyó anemia tá vií íyo ña̱ xíxiyó ta kúúmiíña ña̱yóʼo:
Hierro. Sava ña̱ xíxiyó kúúmiíña hierrro tá kúú ku̱ñu, nduchu̱, lenteja xíʼin verdura ña̱ kúii̱ tá kúú brócoli, espinaca xíʼin lechuga rizada. b Ta saátu inka ña̱ kivi keʼéyó kúú ña̱ sáchi̱ʼyóyó ña̱ kuxuyó ini ki̱si ña̱ hierro, saáchi na̱ nándukú va̱ʼa xa̱ʼa̱ ña̱yóʼo káʼa̱nna ña̱ ku̱a̱ʼáka hierro kúúmií ña̱ xíxiyó tá saá kéʼéyó.
Folato. Ña̱ʼa ña̱ xíxiyó kúúmiíña ña̱yóʼo tá kúú ku̱i̱ʼi, verdura ña̱ kúii̱, chícharo, nduchu̱, queso, ndi̱ví, almendra xíʼin cacahuate. Ta saátu arroz xíʼin ña̱ʼa ña̱ kúva̱ʼa xíʼin trigo ña̱ kúúmií vitamina tá kúú si̱táva̱ʼa, cereal xíʼin pasta ña̱ xíxiyó. Ta saátu ta̱tán ña̱ naní ácido fólico kúúmiíña folato.
Vitamina B-12. Ña̱ʼa ña̱ xíxiyó ña̱ kúúmiíka ña̱yóʼo kúú ku̱ñu, ña̱ʼa ña̱ kúva̱ʼa xíʼin leche á soya ta saátu cereal ña̱ kúúmií vitamina.
Vitamina C. Sava ña̱ʼa ña̱ kúúmií ña̱yóʼo kúú ku̱i̱ʼi iyá á jugo tá kúva̱ʼa xíʼin tíyóʼo, ta saátu yaʼa̱ ña̱ naní pimiento, brócoli, ti̱nana̱, melón xíʼin fresa. Ña̱ʼa ña̱ kúúmií vitamina C chíndeétáʼanña xíʼin ku̱ñuyó ña̱ viíka ndákiʼinña hierro.
Xa̱a̱ síín síín íyo ña̱ʼa ña̱ xíxiyó iin tá iin ñuu, ña̱kán xíniñúʼu kotoún ndáa ña̱ʼa kúú ña̱ íyo ñuún. Ná ñaʼá kúú ná xíniñúʼuníka keʼé ña̱yóʼo tá ñúʼu se̱ʼená á kúni̱ná koo se̱ʼená. Tá ná kundaaná miíná saá kúú ña̱ va̱ása kuumií ña̱ loʼo se̱ʼená anemia. c
a Ña̱ va̱xi nu̱ú artículo yóʼo ka̱naña ti̱xin Clínica Mayo ta saátu nu̱ú Enciclopedia Gale de enfermería y personal auxiliar (The Gale Encyclopedia of Nursing and Allied Health). Tá túviún ña̱ kúúmiíún anemia xíniñúʼu ku̱ʼún nu̱ú na̱ doctor.
b Va̱ása koʼún ta̱tán ña̱ kúúmií hierro ta ni va̱ása taxiúnña koʼo na̱ va̱lí se̱ʼún tá kúma̱ní nda̱ka̱tu̱ʼún na̱ médico á xíniñúʼu koʼondóña. Tá ku̱a̱ʼání hierro ná koʼoyó kivi sandíʼi-xa̱ʼa̱ña sa̱táxáʼayó á kivi ndoʼoyó inkaka kue̱ʼe̱.
c Sava yichi̱ ña̱ va̱ʼa ixatátan na̱ médico na̱ yiví na̱ kúúmií anemia ndátaánna ni̱i̱na. Soo na̱ testigo Jehová va̱ása ndée ni̱i̱na (Hechos 15:28, 29).
