Tá julio ña̱ ku̱i̱ya̱ 2022, nu̱ú iníísaá ñuyǐví ndeéníka niʼní ni̱xi̱yo:

•    “Chí China ni̱ka̱ʼa̱nna ña̱ tuku ndeéní niʼní koo ki̱ʼva 70 ñuu ña̱ yo̱o̱ vitin” (25 tí julio 2022, servicio de noticias de la CNN).

•    “Ni̱xi̱xi̱ yuku̱ chí Europa xa̱ʼa̱ ña̱ ndeéní niʼní” (17 tí julio 2022, The Guardian).

•    “Tá domingo ndeéní niʼní ni̱xi̱yo sava ñuu ña̱ íyo chí Estados Unidos, ta ndeéní niʼní chí costa este, chí sur xíʼin Medio Oeste” (24 tí julio 2022, The New York Times).

 ¿Á kúni̱ kachi ña̱yóʼo ña̱ va̱ása kivika kooyó nu̱ú ñuʼú chí nu̱únínu? ¿Ndáaña káʼa̱n Biblia xa̱ʼa̱ ña̱yóʼo?

 Ña̱ niʼníní tiempo vitin kítáʼanvaña xíʼin ña̱ káʼa̱n Biblia xa̱ʼa̱ ña̱ kúu tiempo vitin. Tá kúú, ta̱ Jesús ni̱ka̱ʼa̱nra ña̱ kuniyó ña̱ʼa ña̱ ndeéní yi̱ʼvíyó xíʼin á ña̱ʼa ña̱ kininí (Lucas 21:11). Ku̱a̱ʼání na̱ yiví yíʼvina xa̱ʼa̱ ña̱ ndeéní ku̱a̱ʼa̱n ndúniʼní, ta ndákanixi̱nína ña̱ mií na̱ yiví sandíʼi-xa̱ʼa̱ ñuʼú yóʼo.

 Va̱ása, saáchi Ndióxi̱ i̱xava̱ʼara ñuʼú ña̱ va̱ʼa koo na̱ yiví nu̱úña ndiʼi tiempo (Salmo 115:16; Eclesiastés 1:4). Ndióxi̱ va̱ása taxira ña̱ sandíʼi-xa̱ʼa̱ na̱ yiví ñuʼú yóʼo, chi káʼa̱nra ña̱ sandíʼi-xa̱ʼa̱ra na̱ kúni̱ sandíʼi-xa̱ʼa̱ ñuʼú (Apocalipsis 11:18).

 Ná kotoyó u̱vi̱ ña̱ʼa ña̱ káʼa̱n Ndióxi̱ keʼéra nu̱ú ñuʼú yóʼo:

•    “Ñuʼú yi̱chí kusi̱íní-iniña, ta yoso̱ yi̱chí kusi̱íní-iniña, ta kuaʼnuña nda̱a̱ táki̱ʼva xáʼnu azafrán” (Isaías 35:1). Ndióxi̱ va̱ása taxira ña̱ yi̱chi̱ nu̱ú ñuʼú ta va̱ása kivika kundoona nu̱úña, saáchi ndasaviíraña ña̱ va̱ʼa kundooyó nu̱úña.

•     “Yóʼó ndáún ñuʼú, ta va̱ʼaní xáʼnu ña̱ʼa nu̱úña íxaún” (Salmo 65:9). Ndióxi̱ ndasara ñuʼú yóʼo iin ñuʼú livi.

 Ña̱ va̱ʼa kunda̱a̱-iniún ndáa ki̱ʼva xínu ña̱ káʼa̱n Biblia xa̱ʼa̱ ña̱ niʼníní, kaʼvi artículo ña̱ naní “¿Qué dice la Biblia sobre el cambio climático y nuestro futuro?”.

 Ña̱ va̱ʼa kunda̱a̱-iniún ndáaña káʼa̱n Biblia xa̱ʼa̱ ña̱ nduvií nu̱ú ñuʼú yóʼo, kaʼvi artículo ña̱ naní “¿Quién salvará el planeta?”.