Tá 24 tí febrero ña̱ ku̱i̱ya̱ 2022 tá kúma̱níka tu̱vi, na̱ Rusia ni̱ki̱ʼvina país na̱ Ucrania ta ki̱xáʼana kánitáʼanna xíʼinna, ta ni ku̱a̱ʼání na̱ chíñu na̱ íyo iníísaá ñuyǐví yóʼo chíndeétáʼanna xíʼinna ña̱ va̱ása kanitáʼanna, soo ni saá kánitáʼanva na̱ Rusia xíʼin na̱ Ucrania. Ta xa̱ʼa̱ ña̱ kánitáʼan na̱yóʼo, ¿ndáaña kivi kuu iníísaá ñuyǐví? Ta̱ António Guterres, ta̱ kúú secretario general ña̱ Naciones Unidas, xa̱a̱ íyo loʼo ki̱vi̱ ni̱ka̱ʼa̱nra ña̱ ku̱a̱ʼání ña̱ʼa kivi ndiʼi-xa̱ʼa̱ ta ndeéní xo̱ʼvi̱ na̱ yiví na̱ íyo chí Europa xíʼin ndiʼika na̱ yiví na̱ íyo iníísaá ñuyǐví xíʼin ndiʼi ña̱ kúu yóʼo.

•   Ta̱ Jesucristo ni̱ka̱ʼa̱nra ña̱ ki̱xaa̱ iin tiempo ña̱ ndeéní “kanitáʼan iin ñuu xíʼin inka ñuu, ta iin país xíʼin inka país” (Mateo 24:7). Kaʼvi artículo ña̱ naní “¿Cuál es la señal de ‘los últimos días’ o de ‘los tiempos finales’?”, ta nu̱ú ña̱yóʼo kunda̱a̱-iniún ña̱ xa̱a̱ xínu profecía ña̱ ni̱ka̱ʼa̱n ta̱ Jesús xa̱ʼa̱ ña̱ guerra.

•   Nu̱ú libro ña̱ Apocalipsis chítáʼanña guerra xíʼin iin ta̱ yósó “kuáyi̱ tí kúáʼa ñuʼu̱, ta ta̱ yósó tíyóʼo nda̱kiʼinra chiñu ña̱ sakákura ku̱a̱chi nu̱ú ñuʼú ña̱ va̱ʼa kaʼní-táʼan na̱ íyo nu̱úña” (Apocalipsis 6:4). Ta tá kúni̱kaún kunda̱a̱ka-iniún xa̱ʼa̱ ña̱yóʼo, kaʼvi artículo ña̱ naní “¿Qué representan los jinetes del Apocalipsis?”, ta nu̱ú ña̱yóʼo kunda̱a̱-iniún ña̱ va̱ʼaní kítáʼan guerra ña̱ kúu tiempo vitin xíʼin ña̱ káʼa̱n profecía ña̱ va̱xi nu̱ú tu̱ʼun Ndióxi̱.

•   Libro ña̱ ka̱ʼyí ta̱ Daniel káʼa̱nña ña̱ sa̱a̱ní-ini “ta̱ rey ña̱ norte” xíʼin “ta̱ rey ña̱ sur” kunitáʼanna (Daniel 11:25-45). Koto video ña̱ naní Profecía ña̱ xa̱a̱ ni̱xi̱nu: Daniel capítulo 11 tasaá va̱ʼa kunda̱a̱-iniún nda̱chun káʼa̱nna ña̱ ta̱ rey ña̱ norte kúú Rusia xíʼin na̱ kítáʼan xíʼinna. a

•   Nu̱ú Apocalipsis káʼa̱nña xa̱ʼa̱ guerra “Ndióxi̱ ta̱ kúúmií ndiʼi ndee̱ tá ná kixaa̱ ki̱vi̱ káʼnura” (Apocalipsis 16:14, 16). Ta ti̱xin guerra yóʼo su̱ví na̱ chíñu na̱ íyo nu̱ú ñuyǐví yóʼo kúú na̱ kanitáʼan, nda̱a̱ táki̱ʼva kúu tiempo vitin. Tá kúni̱ún kunda̱a̱ka-iniún xa̱ʼa̱ ña̱yóʼo xíʼin xa̱ʼa̱ guerra ña̱ koo chí nu̱únínu, kaʼvi artículo ña̱ naní “¿Ndáaña kúú Armagedón?”.

•   Biblia káʼa̱nña ña̱ mií “Ndióxi̱ sándiʼi-xa̱ʼa̱ra ndiʼi ku̱a̱chi” (Salmo 46:9). Kaʼvi artículo ña̱ naní “La esperanza real de un mañana mejor” ña̱ va̱ʼa kunda̱a̱ka-iniún xa̱ʼa̱ ña̱ va̱ʼa ña̱ káʼa̱n Ndióxi̱ taxira ndaʼa̱yó chí nu̱únínu.

•   Ta̱ Jesús sa̱náʼa̱ra na̱ discípulora ña̱ ná ka̱ʼa̱nna xíʼin Ndióxi̱ ña̱ ná kixaa̱ ki̱vi̱ ña̱ kaʼndachíñura (Mateo 6:9, 10). Reino yóʼo chí ndiví íyoña ta sandíʼi-xa̱ʼa̱ña ndiʼi ña̱ va̱ása va̱ʼa íyo nu̱ú ñuʼú yóʼo, tasaá va̱ʼa kutáʼan ndiʼi na̱ yiví nda̱a̱ táki̱ʼva kúni̱ mií Ndióxi̱. Koto video ña̱ naní ¿Ndáa ki̱ʼva kaʼndachíñu Ndióxi̱? ña̱ va̱ʼa kunda̱a̱-iniún ndáaña va̱ʼa taxi reino yóʼo ndaʼún.

 Na̱ testigo Jehová na̱ íyo chí Ucrania yáʼaka 129,000 kúúna. Ndiʼi na̱ testigo Jehová na̱ íyo iníísaá ñuyǐví va̱ʼaní ndíku̱nna yichi̱ ta̱ Jesús, saáchi kǒo kéʼéna nda̱a̱ táki̱ʼva kéʼé na̱ ñuyǐví yóʼo. Ña̱kán va̱ása kíʼvina xíʼin ña̱ política ta saátu va̱ása xáʼa̱nna nu̱ú guerra (Juan 18:36). Ta iníísaá nu̱ú ñuyǐví nátúʼun na̱ testigo Jehová “Tu̱ʼun va̱ʼa xa̱ʼa̱ Reino Ndióxi̱” ta nátúʼunna ña̱ reino yóʼo kúú ña̱ sandíʼi-xa̱ʼa̱ ndiʼi ña̱ sáxo̱ʼvi̱ na̱ yiví tá kúú, ña̱ guerra (Mateo 24:14). Ka̱ʼa̱n xíʼin iinna ña̱ ná ku̱ʼu̱nna kotona yóʼó, ña̱ va̱ʼa ná chindeétáʼanna xíʼún ña̱ kunda̱a̱ka-iniún xa̱ʼa̱ ña̱ káʼa̱n Ndióxi̱ taxira ndaʼa̱yó chí nu̱únínu.