Ku̱a̱ʼání na̱ yiví nu̱ú iníísaá ñuʼú káchina ña̱ yo̱ʼvi̱ní kíʼinna xu̱ʼún ña̱ va̱ʼa koo ña̱ kuxuna ta tu̱ndóʼo yóʼo su̱ví ña̱ ndíʼi kúúña chi ña̱ ku̱a̱ʼa̱n ndúndeéka kúúña.

•   Iin informe ña̱ sa̱kán ka̱na káchiña, a ña̱ nu̱ú iníísaá ñuyǐví “iin kama nása̱ma ki̱ʼva ña̱ cháʼvinana ta loʼoka xu̱ʼún kíʼinna yo̱o̱ tá yo̱o̱”. Ta tá ná ya̱ʼaka loʼo tiempo ta kǒo na̱ chíndeétáʼan xíʼinna “ku̱a̱ʼáníka na̱ nda̱ʼví koo” saáchi “va̱ásaka nani xu̱ʼún ña̱ kíʼinna ña̱ kuxu na̱ veʼena xíʼinna”.

 ¿Á kivi chindeétáʼan na̱ gobierno xíʼin na̱ ñuyǐví yóʼo ña̱ va̱ása kundi̱ʼi̱ka-inina xa̱ʼa̱ xu̱ʼún? Ta, ¿á kuchiñuna keʼéna iin ña̱ʼa ña̱ va̱ása kooka na̱ nda̱ʼví?

 Biblia káʼa̱nña xa̱ʼa̱ iin gobierno ña̱ kivi ndasavií ndiʼi tu̱ndóʼo ña̱ kúúmiíyó xa̱ʼa̱ xu̱ʼún ta saátu ña̱ kúndáʼví na̱ yiví. Biblia káchiña “Ndióxi̱ ta̱ íyo chí ndiví chindúʼúra iin na̱ kaʼndachíñu” á iin gobierno ta ña̱yóʼo kúú ña̱ kaʼndachíñu iníísaá nu̱ú ñuʼú (Daniel 2:44). Ta gobierno yóʼo va̱ása ndakoo ndaʼa̱ña nda̱a̱ ni iin na̱ yiví (Salmo 9:18). Reino Ndióxi̱ taxiña ndiʼi ña̱ xíniñúʼu na̱ yiví ndaʼa̱na ña̱ kivi koo si̱ína. Ndiʼina ndakiʼin ña̱ va̱ʼa xa̱ʼa̱ ña̱ ndeéní káchíñuna (Isaías 65:21, 22).