NÁ KUNDOO TU̱ʼVAYÓ
Va̱ása kúun ku̱a̱ʼáka sa̱vi̱ | ¿Ndáaña káʼa̱n Biblia xa̱ʼa̱ ña̱yóʼo?
“Chí China xa̱a̱ u̱ni̱ ku̱i̱ya̱ kúú ña̱ yi̱chíní, soo ku̱i̱ya̱ vitin kúú ña̱ ndeéníka yi̱chí” (7 tí septiembre 2022, The Guardian).
“Káʼa̱nna ña̱ xa̱a̱ u̱ʼu̱n ku̱i̱ya̱ kúú ña̱ yi̱chíní sava ñuu ña̱ íyo chí África” (26 tí agosto 2022, UN News).
“Káʼa̱nna ña̱ sana ku̱a̱ʼání táʼví Europa yi̱chi̱ña, ta xa̱a̱ ki̱ʼva 500 ku̱i̱ya̱ kúú ña̱ ta̱ʼán kuu ña̱yóʼo” (23 tí agosto 2022, BBC News).
Ku̱a̱ʼání na̱ xíni̱ va̱ʼa káʼa̱nna ña̱ ku̱a̱ʼáníkava tiempo yi̱chí koo. Ña̱kán, ¿á va̱ʼaka kundooyó chí nu̱únínu? ¿Ndáaña káʼa̱n Biblia xa̱ʼa̱ ña̱yóʼo?
Ña̱ káʼa̱n tu̱ʼun Ndióxi̱ xa̱ʼa̱ tiempo yi̱chí
Ña̱yóʼo kúú ña̱ ni̱ka̱ʼa̱n Biblia xa̱ʼa̱ tiempo ña̱ ndóoyó vitin:
Koo so̱ko ñuu yóʼo ta kooña ñuu káa (Lucas 21:11).
Xa̱ʼa̱ ña̱ kǒo sa̱vi̱ kúun kúú ña̱ yi̱chíní ta íyoní so̱ko, ña̱kán ku̱a̱ʼání na̱ yiví xóʼvi̱na ta xíʼi̱na, ta xíʼin ndiʼi ña̱yóʼo xínu profecía ña̱ va̱xi nu̱ú Biblia (Apocalipsis 6:6, 8).
¿Nda̱chun kúú ña̱ ndeéníka ku̱a̱ʼa̱n yíchi̱?
Ña̱ Biblia káʼa̱nña nda̱chun kúú ña̱ kǒo va̱ʼaka sa̱vi̱ kúun ta yi̱chíní. Ña̱yóʼo káchiña:
“Na̱ yiví va̱ása kúchiñuna kuniʼina yichi̱ nu̱ú miína” (Jeremías 10:23).
Ña̱yóʼo kúni̱ kachiña ña̱ va̱ása kúchiñu na̱ yiví “kuniʼina yichi̱ nu̱ú miína”, á ña̱ kaʼndachíñuna nu̱ú inkana. Xa̱ʼa̱ ña̱ va̱ása vií xáʼndachíñu na̱ yiví kúú ña̱ kǒo ti̱kui̱í ta yi̱chíní.
Ku̱a̱ʼání na̱ científico káʼa̱nna ña̱ xa̱ʼa̱ ña̱ kéʼé na̱ yiví kúú ña̱ ku̱a̱ʼa̱n ndúu niʼníní, ta xa̱ʼa̱ ña̱kán kúú ña̱ ku̱a̱ʼa̱n yíchi̱ní nu̱ú iníísaá ñuʼú.
Xa̱ʼa̱ ña̱ ndíʼi̱ka-ini na̱ yiví xa̱ʼa̱ iinlá miína ta va̱ása ndákanixi̱nína xa̱ʼa̱ ña̱ kivi kuu chí nu̱únínu tá kéʼéna ley, ku̱a̱ʼa̱n ndíʼi-xa̱ʼa̱ yuku̱, íxayaku̱a̱nína ña̱ʼa ña̱ íyo nu̱ú ñuʼú ta va̱ása vií xíniñúʼuna ña̱ʼa ña̱ íyo nu̱úña. Ta xa̱ʼa̱ ña̱yóʼo nda̱a̱ i̱yo ndiʼi ti̱kui̱í.
Soo ña̱ Biblia íyo iin ña̱ va̱ʼaní káʼa̱nña xíʼinyó.
¿Á íyo iin ña̱ va̱ʼa ndátuyó koo chí nu̱únínu?
Biblia káʼa̱nña ña̱ kuchiñuva Ndióxi̱ ndasaviíra tu̱ndóʼo ña̱ kúu xa̱ʼa̱ ña̱ kǒo ti̱kui̱í. ¿Ndáa ki̱ʼva keʼéra ña̱yóʼo?
1. Ndióxi̱ sandíʼi-xa̱ʼa̱ra “na̱ sándiʼi-xa̱ʼa̱ ñuʼú” (Apocalipsis 11:18). Sandíʼi-xa̱ʼa̱ra na̱ yiví na̱ ndi̱va̱ʼa-ini na̱ ndíʼi̱-ini xa̱ʼa̱ iinlá mií, chi xíʼin ña̱ kéʼé na̱yóʼo ku̱a̱ʼa̱n ndíʼi ti̱kui̱í (2 Timoteo 3:1, 2).
2. “Nu̱ú ñuʼú ña̱ ni̱yi̱chi̱ xa̱ʼa̱ ña̱ niʼníní nduuña ndo̱ʼyo nu̱ú íyoní yitu̱n” (Isaías 35:1, 6, 7). Ndióxi̱ ndasaviíra ndiʼi tu̱ndóʼo ña̱ kúu xa̱ʼa̱ ña̱ kǒo sa̱vi̱ kúun ta yi̱chíní, ta ndasalivira nu̱ú ñuʼú yóʼo ta ku̱a̱ʼání ti̱kui̱í koo.
3. “Yóʼó ndáún ñuʼú, ta va̱ʼaní xáʼnu ña̱ʼa nu̱úña íxaún” (Salmo 65:9). Tá ná taxi Ndióxi̱ bendición ndaʼa̱yó, koo ku̱a̱ʼání ña̱ kuxuyó ta va̱ása yaku̱a̱ka koo ti̱kui̱í.