NÁ KUNDOO TU̱ʼVAYÓ
Na̱ yiví va̱ása kándíxakana na̱ chíñu | ¿Ndáaña káʼa̱n Biblia xa̱ʼa̱ ña̱yóʼo?
Ti̱xin ña̱ ku̱i̱ya̱ 2024 ndeéníka ndaka̱xinna na̱ kuisochíñu xíʼinna nu̱úka ña̱ xi̱keʼénaña tá ya̱chi̱. Soo ku̱a̱ʼánítu na̱ yiví va̱ása kándíxakana ña̱ káʼa̱n na̱ chíñu.
Ni̱nda̱ka̱tu̱ʼunna ku̱a̱ʼání na̱ ndóo chí Estados Unidos, ta ni̱ka̱ʼa̱nna ña̱yóʼo xa̱ʼa̱ na̱ chíñu: “Ku̱a̱ʼání na̱ chíñu kúni̱na kaʼndachíñu ña̱ va̱ʼa koo ku̱a̱ʼá ña̱ʼana ta va̱ása ndíʼi-inina ña̱ chíndeétáʼanna xíʼin na̱ ñuuna” (Centro de Investigaciones Pew, 19 tí septiembre 2023). a
Ku̱a̱ʼání na̱ va̱lí kúa̱an va̱ása kándíxakana ña̱ káʼa̱n na̱ chíñu.
“Na̱ va̱lí kúa̱an ndíʼi-inina nándukúna ndáa ki̱ʼva ndasaviína sava ña̱ʼa ña̱ ndáyáʼvi, soo tá ni̱nda̱ka̱tu̱ʼunna na̱ va̱lí yóʼo á kuchiñu na̱ chíñu ndasaviína ña̱yóʼo, na̱ va̱lí yóʼo káʼa̱nna ña̱ va̱ása kuchiñu na̱ chíñu” (The New York Times, 29 tí enero 2024).
Tá ke̱ʼéna iin encuesta xíʼin na̱ va̱lí kúa̱an, ki̱ʼinna kuenta ña̱ kándíxaka na̱ va̱lí yóʼo ña̱ káʼa̱n na̱ yiví na̱ sándaa video nu̱ú internet ta ku̱a̱ʼání na̱ yiví xíto ña̱ kéʼéna á ndíku̱nna sa̱tána (The Korea Times, 22 tí enero 2024).
¿Á kuchiñu na̱ chíñu chindeétáʼanna xíʼinyó na̱ vií kundooyó chí nu̱únínu? ¿Á ndáana kivi chindeétáʼan xíʼinyó?
Va̱ása kunda̱a̱-iniún ndiʼi na̱ yiví
Xíniñúʼu kiʼinyó kuenta ndáana ndáa-iniyó á kándíxayó ña̱ káʼa̱n. Biblia káchiña: “Na̱ kíʼvi kándíxana ndiʼi ña̱ káʼa̱nna xíʼinna, soo na̱ ndíchi, ndákanixi̱nína ndáaña keʼéna” (Proverbios 14:15).
Tá kúni̱ún kunda̱a̱-iniún ndáaña kivi kandíxaún ta ndáa ña̱ va̱ása xíniñúʼu kandíxaún, kaʼvi artículo ña̱ naní “Cómo protegerse de la información falsa”.
Ta saátu nda̱a̱ na̱ chíñu na̱ va̱ʼaní íyo ña̱ kéʼé, ta viíní íyo ña̱ ndákanixi̱nína keʼéna, va̱ása kuchiñuna keʼéna á saxínuna ndiʼi ña̱ kúni̱na. Xa̱ʼa̱ ña̱yóʼo Biblia káchiña:
“Va̱ása kundaa-inindó na̱ chíñu ni nda̱a̱ ni iin na̱ yiví, saáchi va̱ása kuchiñuna sakǎkuna ndóʼó” (Salmo 146:3).
Iin ta̱ chíñu ta̱ kivi kundaa-iniún
Biblia káʼa̱nña xa̱ʼa̱ Ndióxi̱ ña̱ nda̱kaxinra iin ta̱ chíñu ta̱ va̱ʼaní íyo ña̱ kéʼé ta kivi kundaa-iniyóra, ta̱yóʼo kúú: ta̱ Jesucristo (Lucas 1:32, 33). Ta̱ Jesús kúú Rey ti̱xin Reino Ndióxi̱, ta chí ndiví kúú nu̱ú íyora xáʼndachíñura (Mateo 6:10).
Ña̱ va̱ʼa kunda̱a̱ka-iniún nda̱chun kivi kundaa-iniún ta̱ Jesús ta ndáaña keʼéra ña̱ sandíʼi-xa̱ʼa̱ra tu̱ndóʼo ña̱ íyo nu̱úyó vitin. Kaʼvi artículo ña̱ naní “¿Quién es el Rey del Reino de Dios?” xíʼin ña̱ naní “¿Qué hará el Reino de Dios?”
a Pew Research Center, “Americans’ Dismal Views of the Nation’s Politics” (Ña̱ ndákanixiní na̱ ndóo chí Estados Unidos xa̱ʼa̱ na̱ chíñu na̱ chíñu na̱ íyo ñuuna), septiembre 2023.