Ndiʼi ku̱i̱ya̱ ku̱a̱ʼání na̱ yiví ndákuchi. Xa̱ʼa̱ ña̱kán xíniñúʼuyó ku̱a̱ʼáka veʼe nu̱ú ndasakáʼnuyó Jehová. Xa̱ʼa̱ ña̱kán na̱ departamento ña̱ Diseño xíʼin Construcción na̱ íyo iníísaá nu̱ú ñuʼú ni̱ka̱ʼa̱nna ña̱ ixava̱ʼana á ndasaxa̱ána yáʼaka 2,700 veʼe ña̱ xíniñúʼuyó ña̱ ndasakáʼnuyó Ndióxi̱ tá ku̱i̱ya̱ 2020. a

 Soo xa̱ʼa̱ ña̱ ndíka̱a̱ ña̱ pandemia ña̱ COVID-19 íxayo̱ʼvi̱ña xíʼinna keʼéna ña̱yóʼo. Ña̱ va̱ʼa kundaana na̱ hermano ta saátu ña̱ keʼéna ña̱ káʼa̱n na̱ gobierno, na̱ Comité ña̱ Publicación na̱ Cuerpo Gobernante ni̱ka̱ʼa̱nna ña̱ ná kundatu loʼo ña̱yóʼo. Soo tá ku̱i̱ya̱ 2020 va̱ʼa i̱xava̱ʼana á nda̱saxa̱ána yáʼaka 1,700 veʼe ña̱ xíniñúʼuyó ña̱ va̱ʼa ndasakáʼnuyó Ndióxi̱ tá kúma̱níka ki̱xáʼa ña̱ pandemia. Ta saátu sa̱ndíʼina ke̱ʼéna yáʼaka 100 chiñu ña̱ ndáyáʼvi ti̱xin ku̱a̱ʼá sucursal. Ná ka̱ʼa̱nyó xa̱ʼa̱ u̱vi̱ chiñu yóʼo ta ná kotoyó ndáa ki̱ʼva chíndeétáʼanña xíʼin na̱ hermano.

 Sucursal ña̱ Camerún. Ña̱ sucursal ña̱ ni̱xi̱yo chí ñuu Duala, loʼoní ni̱xi̱yo ña̱yóʼo ta saátu xi̱niñúʼu ndasaviínaña na̱ Comité ña̱ Publicación nda̱kanixi̱nína ña̱ ndasaxa̱ána ña̱ sucursal, soo ki̱ʼinna kuenta ña̱ yaʼviní kanaña ta ná ndasaxa̱ánaña ta saátu nda̱kanixi̱nína ña̱ ixava̱ʼana iin sucursal ña̱ xa̱á á satána iin edificio ta ndasaxa̱ánaña. Soo ni iin ña̱yóʼo kǒo níkeʼéna.

 Soo na̱ hermano na̱kunda̱a̱-inina, ña̱ na̱ chíñu ñuu kán ndákanixi̱nína ña̱ ixava̱ʼana iin carretera chí norte ña̱ Duala yatin nu̱ú íyo iin salón ña̱ asamblea. Ña̱ carretera xa̱á yóʼo chindeétáʼanña xíʼinna ña̱ kama xa̱a̱na sucursal ta saátu ña̱ kuumiína inkaka ña̱ʼa ña̱ íyo ñuu kán ta ña̱yóʼo kúú ña̱ xíniñúʼu na̱ sucursal. Xa̱ʼa̱ ña̱kán na̱ Cuerpo Gobernante ni̱ka̱ʼa̱nna ña̱ kivi ixava̱ʼana iin sucursal ña̱ xa̱á nu̱ú ñuʼú nu̱ú ndíka̱a̱ Salón ña̱ Asamblea.

 Ña̱ va̱ʼa keʼéna sava táʼví ña̱ veʼe yóʼo na̱ hermano cha̱ʼvina iin empresa na̱ íxava̱ʼa veʼe, tasaá kama keʼénaña ta va̱ása ku̱a̱ʼá xu̱ʼún kuniñúʼuna. Ta loʼova xu̱ʼún xi̱niñúʼuna ña̱ sa̱ndíʼina ke̱ʼéna ña̱yóʼo, nu̱úka ña̱ nda̱kanixi̱nína ña̱ sandíʼina keʼénaña, ta ki̱ndoo ki̱ʼva 2 millón ña̱ dólar ndaʼa̱na. Na̱ káchíñu ti̱xin Betel va̱ʼa na̱samana ta ki̱xáʼana íyona ti̱xin sucursal ña̱ xa̱á tá kúma̱níka ki̱xáʼa ña̱ pandemia ña̱ COVID-19.

 Na̱ betelita na̱ íyo chí Camerún va̱ʼa íyona ta káchíñuna ti̱xin sucursal ña̱ xa̱á ta xítona ña̱yóʼo nda̱a̱ táki̱ʼva íyo iin regalo ña̱ ta̱xi Jehová ndaʼa̱na. Iin na̱ matrimonio ni̱ka̱ʼa̱nna ña̱yóʼo: “Vitin kúni̱kandi̱ kachíñundi̱ ta ndáyáʼviní ña̱ regalo yóʼo nu̱úndi̱”.

 Oficina Remota ña̱ Traducción tu̱ʼun tojolabal (México). Ku̱a̱ʼání ku̱i̱ya̱ na̱ equipo ña̱ traducción na̱ káʼa̱n tu̱ʼun tojolabal ka̱chíñuna ti̱xin sucursal ña̱ Centroamérica ña̱ kíndo̱o yatin Ciudad de México. Tu̱ʼun tojolabal káʼa̱nnaña chí municipio ña̱ Altamirano xíʼin Las Margaritas, ta ki̱ʼva 1,000 kilómetro (620 millas) kíndo̱oña nu̱ú ndíka̱ ña̱ sucursal. Tá ya̱chi̱ xi̱ ixayo̱ʼvi̱ña xíʼin na̱ sándáya̱ʼa tu̱ʼun yóʼo, saáchi tá ni̱xi̱yona ti̱xin sucursal xi̱ ixayo̱ʼvi̱ña xíʼinna ña̱ ndaniʼina na̱ hermano ña̱ va̱ʼa chindeétáʼanna xíʼinna ta saátu ña̱ keʼéna grabación.

 Xa̱ʼa̱ ña̱kán na̱ Comité ña̱ Redacción na̱ Cuerpo Gobernante nda̱kaxinna ña̱ ná nasama na̱ equipo yóʼo ña̱ va̱ʼa koona iin ñuu nu̱ú káʼa̱nna tu̱ʼun tojolabal. Ta xa̱ʼa̱ ña̱kán na̱ sucursal sa̱tána ta nda̱saxa̱ána iin edificio ta ña̱yóʼo va̱ása yaʼvi níkanaña nu̱úka ña̱ ixava̱ʼana iin veʼe á ña̱ chaʼvina iin oficina.

 Iin ta̱ traductor káʼa̱nra ña̱ ndákanixi̱níra xa̱ʼa̱ ña̱yóʼo: “Ti̱xin ña̱ u̱xu̱ ku̱i̱ya̱ ña̱ ka̱chíñui̱ ti̱xin ña̱ sucursal va̱ása ní ndani̱ʼíi̱ nda̱a̱ ni iin na̱ familia na̱ káʼa̱n tu̱ʼun miíi̱. Soo vitin oficina nu̱ú káchíñundi̱ íyoña iin ñuu nu̱ú káʼa̱nna tu̱ʼun tojolabal. Ndiʼi ki̱vi̱ va̱ʼa káʼi̱n xíʼin na̱ yiví na̱ káʼa̱n tu̱ʼun yóʼo. Ña̱yóʼo chíndeétáʼanña xíʼi̱n ña̱ va̱ása nandósói̱ tu̱ʼun ña̱ káʼi̱n ta saátu ña̱ viíka kachíñui̱”.

 Ku̱i̱ya̱ 2021 ndákanixi̱nína keʼéna 75 oficina ña̱ traducción ta saátu nu̱ú koo escuela nu̱ú sákuaʼana xa̱ʼa̱ Biblia. Ta saátu íyo u̱na̱ chiñu ña̱ xa̱a̱ síín síín keʼéna ti̱xin sucursal, ta iin ña̱yóʼo kúú ña̱ keʼéna chí Rámapo (Nueva York). Tasaá ña̱ nasama ña̱ sucursal ña̱ íyo chí Argentina xíʼin Italia. Ta saátu xíniñúʼu kuva̱ʼa 1,000 Salón ña̱ Reino. Ta 6,000 veʼe nu̱ú ndákutáʼanyó ña̱ va̱ása viíka íyo xíniñúʼu nasamanaña ta íyo inka 4,000 Salón ña̱ Reino ña̱ xíniñúʼu nduxa̱á.

 ¿Mií kána xu̱ʼún ña̱ va̱ʼa keʼéna ndiʼi ña̱yóʼo? Ta̱ hermano Lázaro González ta̱ káchíñu ti̱xin ña̱ Comité ña̱ Sucursal ña̱ Centroamérica ndákuiinra ña̱ pregunta yóʼo. Ña̱yóʼo ni̱ka̱ʼa̱nra tá ke̱ʼéna ña̱ Oficina ña̱ Traducción ña̱ tu̱ʼun tojolabal káchira: “Na̱ hermano na̱ íyo ti̱xin territorio ña̱ sucursal va̱ása ku̱a̱ʼá ña̱ʼana íyo, tá va̱ása ní chindeétáʼan na̱ hermano na̱ íyo iníísaá nu̱ú ñuʼú xíʼinndi̱ ixayo̱ʼvi̱níña xíʼinndi̱ ña̱ ixava̱ʼandi̱ ña̱ oficina ña traducción nu̱ú káchíñu na̱ hermano na̱ káʼa̱n inka tu̱ʼun, tíxa̱ʼvi ña̱ táxina donación kivi ku̱ʼu̱n na̱ traductor koona ñuu nu̱ú káʼa̱nna tu̱ʼun miína, táxiníndi̱ tíxa̱ʼvi ndaʼa̱ na̱ hermano xa̱ʼa̱ ña̱ va̱ʼa-inina”. ¿Á ki̱ʼún kuenta? Ndiʼi chiñu yóʼo va̱ʼa kéʼénaña xa̱ʼa̱ ña̱ táxina donación ti̱xin ña̱ obra mundial ta ku̱a̱ʼání ña̱yóʼo táxinaña nu̱ú donate.pr418.com.