Video ña̱ xi̱toyó ti̱xin asamblea regional nda̱a̱ níma̱yó ni̱xa̱a̱ña saáchi chíndeétáʼanña xíʼinyó ña̱ kunda̱a̱-iniyó xíʼin ña̱ sánáʼa̱ Biblia. Ti̱xin asamblea regional ku̱i̱ya̱ 2020 ña̱ naní “Ndiʼi tiempo kusi̱í-inindó” va̱xi 114 video nu̱úña ta 43 ña̱yóʼo kúú discurso ña̱ ta̱xi na̱ Cuerpo Gobernante xíʼin na̱ chíndeétáʼan xíʼinna. ¿Á xa̱a̱ ndákanixi̱níún sava yichi̱ nda̱saa xi̱niñúʼu ka̱chíñuna ta saátu nda̱saa xu̱ʼún xi̱niñúʼuna ña̱ va̱ʼa ke̱ʼéna video yóʼo?

 Ki̱ʼva 900 na̱ hermano na̱ íyo iníísaá ñuyǐví xi̱niñúʼuna tiempona ta saátu ña̱ xínina ña̱ va̱ʼa ke̱ʼéna programa ña̱ asamblea yóʼo. U̱vi̱ ku̱i̱ya̱ ni̱ya̱ʼa saá sa̱ndíʼina ke̱ʼéna ña̱yóʼo, ta ki̱ʼva 100,000 hora ka̱chíñuna tasaá sa̱ndíʼina ke̱ʼénaña. Ta ki̱ʼva 70,000 hora ke̱ʼéna video ña̱ naní Ta̱ Nehemías: Ña̱ si̱í-ini ña̱ táxi Jehová ndaʼa̱yó kúú ña̱ ndásandakú-iniyó, ta 76 minuto yáʼa ña̱yóʼo.

 Ña̱ va̱ʼa ke̱ʼéna ña̱yóʼo xi̱niñúʼu kundaana na̱ ka̱chíñu kán ta saátu ña̱ sa̱tána ña̱ʼa ña̱ xi̱niñúʼuna ta ku̱a̱ʼání xu̱ʼún xi̱niñúʼuna ña̱ va̱ʼa ke̱ʼéna ña̱yóʼo.

 Ta̱ Jared Gossman, ta̱ káchíñu ti̱xin Servicio ña̱ Audio xíʼin Video, káchira: “Na̱ Comité ña̱ Enseñanza na̱ Cuerpo Gobernante kúni̱na ña̱ ná ya̱ʼa ku̱a̱ʼá ki̱ʼva ña̱ íyo na̱ hermano ta saátu ñuu nu̱ú íyona nu̱ú video ña̱ kéʼéyó. Tasaá kúú ña̱ náʼa̱ ndáa ki̱ʼva íyo ndiʼi na̱ hermano na̱ íyo iníísaá ñuyǐví. Ña̱ va̱ʼa xi̱nu ña̱yóʼo, 24 equipo na̱ íyo 11 país inkáchi ka̱chíñuna ña̱ va̱ʼa xi̱nuña, xa̱ʼa̱ ña̱kán xi̱niñúʼuna ku̱a̱ʼá xu̱ʼún ña̱ va̱ʼa vií kanaña ta inkáchi ka̱chíñuna”.

 Ña̱ va̱ʼa ke̱ʼéna video yóʼo xi̱niñúʼuna ku̱a̱ʼá ña̱ʼa ña̱ va̱ʼa vií kanaña. Tá kúú ña̱ ke̱ʼéna video Ta̱ Nehemías: Ña̱ si̱í-ini ña̱ táxi Jehová ndaʼa̱yó kúú ña̱ ndásandakú-iniyó, ña̱ʼa ña̱ xi̱niñúʼuna ti̱xin video yóʼo i̱xava̱ʼanaña chí Mount Ebo yatin Patterson (Nueva York). Ña̱ va̱ʼa vií kuniñúʼuna donación ta saátu ña̱ vií koo ña̱ʼa ña̱ xi̱niñúʼuna ti̱xin video yóʼo nda̱a̱ táki̱ʼva káʼa̱n ña̱ historia, na̱ hermano i̱xava̱ʼana ña̱ʼa ña̱ va̱ása ve̱e íyo ña̱ náʼa̱ nda̱a̱ táki̱ʼva ni̱xi̱yo nama̱ veʼe ña̱ ni̱xi̱yo chí ñuu Jerusalén. Ta ña̱ i̱xava̱ʼana yóʼo ki̱ʼva 6 metro (20 pies) súkunña, xíʼin madera ke̱ʼénaña soo chí sa̱táña ni̱xi̱yo ña̱ náʼa̱ nda̱a̱ táki̱ʼva íyo yu̱u̱. Ta ña̱yóʼo xi̱nasamanaña ña̱ va̱ʼa keʼéna inka ña̱ʼa, tasaá va̱ása ku̱a̱ʼá ña̱ʼa níxiniñúʼuna. Soo ni saá xi̱niñúʼuna ki̱ʼva 100,000 dólar. a

 Xa̱ʼa̱ ña̱ kúnda̱a̱-iniyó xa̱ʼa̱ ndiʼi ña̱yóʼo kundayáʼvika asamblea regional ña̱ ku̱i̱ya̱ vitin nu̱úyó. Kúnda̱a̱-inindi̱ ña̱ ndiʼi ndee̱ ña̱ chi̱ka̱a̱na ña̱ va̱ʼa ke̱ʼéna ña̱yóʼo ndasakáʼnuña ki̱vi̱ Jehová iníísaá ñuyǐví. Tíxa̱ʼvindó xa̱ʼa̱ xu̱ʼún ña̱ táxindó ti̱xin ña̱ obra mundial nu̱ú donate.pr418.com á inkaka ki̱ʼva nu̱ú táxindóña.