Filemón 1:1-25
1 Yi̱ʼi̱ ta̱ Pablo, ta̱ ndíka̱a̱ veʼeka̱a xa̱ʼa̱ ta̱ Cristo Jesús, yi̱ʼi̱ kúú ta̱ ka̱ʼyí tutu yóʼo xíʼin ta̱ ñaniyó Timoteo ña̱ ku̱xa̱a̱ña ndaʼún Filemón ta̱ káchíñu xíʼinndi̱, ta̱ kúʼvi̱-inindi̱ xínindi̱,
2 ku̱a̱ʼa̱ntuña ndaʼa̱ ñá ku̱ʼvayó Apfia xíʼin ta̱ Arquipo ta̱ soldado ta̱ Cristo ta̱ kítáʼan xíʼinndi̱, ku̱a̱ʼa̱ntuña ndaʼa̱ na̱ congregación na̱ ndátaka veʼún:
3 Va̱ʼaní ná koo ini yiváyó Ndióxi̱ xíʼinndó saátu tátayó Jesucristo ta va̱ʼaní ná kutáʼanndó xíʼinna.
4 Ndiʼi yichi̱ táxii̱ tíxa̱ʼvi ndaʼa̱ Ndióxi̱ tá káʼi̱n xa̱ʼún xíʼinra,
5 saáchi xíniso̱ʼokai̱ káʼa̱nna xa̱ʼún ña̱ kándíxaún Ndióxi̱ ta kúʼvi̱-iniún xíniún tátayó Jesús ta saátu na̱ nda̱kaxin Ndióxi̱.*
6 Káʼi̱n xa̱ʼún xíʼin Ndióxi̱ xa̱ʼa̱ ña̱ kándíxaúnra nda̱a̱ táki̱ʼva kándíxa inkanara, ta xa̱ʼa̱ ña̱ kándíxaúnra ná xa̱ún kunda̱a̱-iniún xa̱ʼa̱ ndiʼi ña̱ va̱ʼa ña̱ kúúmiíyó xa̱ʼa̱ ta̱ Cristo.
7 Ni̱kusi̱íní-inii̱ ta va̱ʼaní ku̱nii̱ tá na̱kunda̱a̱-inii̱ xa̱ʼa̱ ña̱ kúʼvi̱-iniún xíniún inkana, saáchi xa̱ʼa̱ ña̱ ke̱ʼún ni̱kusi̱íní-ini na̱ nda̱kaxin Ndióxi̱.*
8 Ña̱kán, ni kiviva kaʼndai̱ chiñu nu̱ún ña̱ keʼún ña̱ va̱ʼa xa̱ʼa̱ ña̱ kúi̱ apóstol ta̱ Cristo,
9 soo va̱ʼaka xákundáʼvii̱ nu̱ún ña̱ ná keʼún ña̱yóʼo chi kúnda̱a̱va-inii̱ ña̱ kúʼvi̱-iniún xíniún inkana. Saáchi yi̱ʼi̱ ta̱ Pablo, xa̱a̱ ku̱chéevai̱ ta vitin ndíka̱i̱ veʼeka̱a xa̱ʼa̱ ta̱ Cristo Jesús.
10 Káʼa̱n-ndáʼvii̱ xíʼún xa̱ʼa̱ ta̱ Onésimo, ta̱ ni̱xa̱a̱ ndu̱u se̱ʼi̱ tá ndíka̱i̱ veʼeka̱a.
11 Ni va̱ása nísaxínuvara chiñu ña̱ xi̱niñúʼu keʼéra nu̱ún tá ya̱chi̱, soo vitin va̱ʼaníva chindeétáʼanra xíʼin u̱vi̱ saáyó.
12 Chíndaʼíi̱ra ña̱ ndikóra nu̱ún, kúʼvi̱ní-inii̱ xínii̱ ta̱yóʼo.
13 Kúni̱i̱ ña̱ ná kindo̱ora xíʼi̱n ña̱ va̱ʼa chindeétáʼanra xíʼi̱n nda̱a̱ táki̱ʼva keʼé miíún nani ndíka̱i̱ veʼeka̱a xa̱ʼa̱ tu̱ʼun Ndióxi̱.*
14 Soo kǒo kúni̱i̱ keʼíi̱ ni iin ña̱ʼa tá kǒo kítáʼan tu̱ʼunyó xa̱ʼa̱ña, chi kǒo kúni̱i̱ keʼún ña̱yóʼo xíʼin ña̱ ndúxa, va̱ʼaka níma̱ miíún ná kanaña.
15 Sana xa̱ʼa̱ ña̱yóʼo ku̱xíkára nu̱ún loʼo tiempo: ña̱ va̱ʼa ndikóra koora xíʼún ndiʼi tiempo,
16 ta su̱ví kuití ta̱ káchíñu ndáʼvi nu̱ún koora chi ñaniún ndu̱ura. Kúʼvi̱-inii̱ xínii̱ra, soo miíún kuʼvi̱níka-iniún kuniúnra, chi tuku ndakutáʼanndó ta inkáchi kandíxandó tátayó.
17 Ña̱kán tá ndixa migo kúúyó, viíní ndakiʼúnra nda̱a̱ táki̱ʼva keʼún xíʼi̱n.
18 Tá íyo iin ña̱ va̱ása va̱ʼa níkeʼéra xíʼún á níkára nu̱ún, yi̱ʼi̱ chaʼvi ña̱yóʼo.
19 Yi̱ʼi̱ ta̱ Pablo, xíʼin ndaʼíi̱ káʼyíi̱ tu̱ʼun yóʼo: yi̱ʼi̱ chaʼvi xa̱ʼa̱ña (ni kǒo sándakaʼíi̱n yóʼó xa̱ʼa̱ ña̱ níkáún nu̱úi̱ saáchi chi̱ndeétáʼi̱n xíʼún ña̱ ni̱ka̱kún).
20 Ndixava ñani, xa̱ʼa̱ ña̱ káchíñuyó nu̱ú tátayó ndúkúi̱ ña̱yóʼo nu̱ún: sandíko-inii̱ nda̱a̱ táki̱ʼva kéʼé na̱ ndíku̱n ta̱ Cristo.
21 Kúnda̱a̱-inii̱ ña̱ keʼún ndiʼi ña̱ káʼi̱n xíʼún, ta káʼyíi̱ tutu yóʼo ku̱xa̱a̱ña ndaʼún ni kúnda̱a̱va-inii̱ ña̱ ku̱a̱ʼákava ña̱ keʼún.
22 Ña̱kán, ndukú nu̱ú kindo̱i̱ chi ndátui̱ ndikó tukui̱ nu̱úndó xa̱ʼa̱ ña̱ káʼa̱nníndó xa̱ʼíi̱ xíʼin Ndióxi̱.
23 Ta̱ Epafras, ta̱ ndíka̱a̱ veʼeka̱a xíʼi̱n xa̱ʼa̱ ta̱ Cristo Jesús, chíndeéra yóʼó.*
24 Saátu na̱ kítáʼan xíʼi̱n, ta̱ Marcos, ta̱ Aristarco, ta̱ Demas xíʼin ta̱ Lucas chíndeéna yóʼó.
25 Va̱ʼaní ná koo ini tátayó Jesucristo xíʼinndó xa̱ʼa̱ ña̱ va̱ʼaní íyo ki̱ʼva ña̱ ndákanixi̱níndó.
Nota
^ Á “na̱ santo”.
^ Á “na̱ santo”.
^ Inka variante “káʼa̱n to̱ʼóra xíʼún”, “káʼa̱n ndióxi̱ra xíʼún”.
