Hechos ña̱ ke̱ʼé na̱ apóstol 1:1-26
1 Libro ña̱ nu̱ú ña̱ ka̱ʼyíi̱ ku̱xa̱a̱ ndaʼún, Teófilo, nu̱ú ña̱kán na̱túʼi̱n xíʼún xa̱ʼa̱ ndiʼi ña̱ ke̱ʼé ta̱ Jesús xíʼin xa̱ʼa̱ ña̱ sa̱náʼa̱ra
2 nda̱a̱ ki̱vi̱ tá ku̱a̱nuʼúra chí ndiví, tándi̱ʼi xi̱niñúʼura espíritu santo ña̱ xa̱ʼndara chiñu nu̱ú na̱ apóstol na̱ nda̱kaxinra.
3 Tándi̱ʼi ni̱xo̱ʼvi̱ra, tasaá ku̱a̱ʼání yichi̱ ki̱tara nu̱úna ña̱ va̱ʼa ná kunda̱a̱-inina ña̱ ndixa kúú ña̱ tákura. Ta 40 ki̱vi̱ kúú ña̱ xi̱ninara, ta na̱túʼunra xíʼinna xa̱ʼa̱ Reino Ndióxi̱.
4 Tá nda̱kutáʼanra xíʼinna, ni̱ka̱ʼa̱nra xíʼinna: “Va̱ása kitandó ñuu Jerusalén. Va̱ʼaka kundatundó ña̱ ni̱ka̱ʼa̱n yivái̱ taxira ndaʼa̱ndó, ña̱ ni̱ka̱ʼi̱n xa̱ʼa̱ xíʼinndó.
5 Saáchi ta̱ Juan sa̱ndákuchira na̱ yiví xíʼin ti̱kui̱í, soo ndóʼó si̱lóʼo ki̱vi̱ kúma̱ní ta ndakuchindó xíʼin espíritu santo”.
6 Tasaá, tá xa̱a̱ nda̱takana xíʼinra, ni̱nda̱ka̱tu̱ʼunnara: “Táta, ¿á xa̱a̱ ndasaviún reino ña̱ ñuu Israel tiempo vitin?”.
7 Ta ni̱ka̱ʼa̱nra xíʼinna: “Iinlá yivái̱ ta̱ íyo chí ndiví kúú ta̱ kivi ka̱ʼa̱n xa̱ʼa̱ tiempo ña̱ kuu ña̱yóʼo, ta ndóʼó va̱ása xíniñúʼu kunda̱a̱-inindó xa̱ʼa̱ tiempo yóʼo.
8 Soo ndakiʼinndó ndee̱ tá ná kixaa̱ espíritu santo sa̱tándó. Ta natúʼunndó xa̱ʼíi̱* chí ñuu Jerusalén, xíʼin iníí chí Judea xíʼin Samaria, ta nda̱a̱ iníísaá nu̱ú ñuʼú”.
9 Tándi̱ʼi ni̱ka̱ʼa̱nra ña̱yóʼo, tá xítokana saá nda̱kiʼinra ku̱a̱ʼa̱nra chí ndiví. Ta iin vi̱kó nda̱kasiñara nu̱úna.
10 Ta na̱kán xíto káxi va̱ʼana tá ku̱a̱ʼa̱nra chí ndiví, ta iin kama ki̱ta u̱vi̱ ta̱a na̱ ndíxi ti̱ko̱to̱ yaa yatin nu̱ú ndítana kán
11 ta na̱kán ni̱ka̱ʼa̱nna xíʼinna: “Ndóʼó na̱ ta̱a na̱ ñuu Galilea, ¿nda̱chun ndítandó yóʼo ña̱ xítondó chí ndiví? Ta̱ Jesús ta̱ ni̱xi̱yo xíʼinndó ta̱ nda̱kiʼinna ku̱a̱ʼa̱n chí ndiví, nda̱a̱ táki̱ʼva xi̱nindó ku̱a̱ʼa̱nra chí ndiví saátu kunindó ndikóra”.
12 Tándi̱ʼi ndi̱kóna ñuu Jerusalén ña̱ ni̱xa̱ʼa̱nna yuku̱* ña̱ naní Olivo, iin yuku̱ ña̱ ndíka̱a̱ yatin chí ñuu Jerusalén, ña̱ ndíka̱a̱ ki̱ʼva iin kilómetro.*
13 Tá ki̱xaa̱na, saá nda̱ana cuarto ña̱ íyo chí ni̱nu nu̱ú xa̱a̱ kíndo̱ona. Kán ndíka̱a̱ ta̱ Pedro, ta̱ Juan, ta̱ Santiago xíʼin ta̱ Andrés, ta̱ Felipe xíʼin ta̱ Tomás, ta̱ Bartolomé xíʼin ta̱ Mateo, ta̱ Santiago se̱ʼe ta̱ Alfeo, ta̱ Simón ta̱ kéʼé chiñu xíʼin ndinuʼu-ini, ta saátu ta̱ Judas se̱ʼe ta̱ Santiago.
14 Inkáchi nda̱kutáʼan ndiʼina ña̱ ka̱ʼa̱nna xíʼin Ndióxi̱ xíʼin savaka ná si̱ʼí, saátu ñá María siʼí ta̱ Jesús xíʼin na̱ ñanira.
15 Ta ki̱vi̱ kán, ta̱ Pedro nda̱kundichira nu̱ú na̱ ñanira (ki̱ʼva 120 na̱ yiví xi̱kuuna) ta ni̱ka̱ʼa̱nra xíʼinna:
16 “Ñaniyó, tu̱ʼun ña̱ ni̱ka̱ʼa̱n ta̱ David tá xi̱niñúʼu espíritu santo ta̱yóʼo, xi̱niñúʼu xi̱nuña. Chi ni̱ka̱ʼa̱nra xa̱ʼa̱ ta̱ Judas ña̱ kuniʼira yichi̱ nu̱ú na̱ tiin ta̱ Jesús.
17 Iin ta̱ xi̱ndika̱a̱ xíʼinyó xi̱kuura ta nda̱kaxinnara ña̱ kachíñura xíʼinyó.
18 (Ta̱ ta̱a yóʼo sa̱tára* iin ñuʼú xíʼin xu̱ʼún ña̱ ki̱ʼinra xa̱ʼa̱ ña̱ va̱ása va̱ʼa ke̱ʼéra, ta tá nda̱kavara ta ni̱nda̱tá ti̱xinra ta ke̱e xitira.
19 Ndiʼi na̱ ndóo ñuu Jerusalén na̱kunda̱a̱-inina ta chi̱núuna ki̱vi̱ña ña̱ kunaníña ñuʼú ña̱ Akéldama, ta tu̱ʼun miína kúni̱ kachiña ‘ñuʼú ña̱ sa̱tána xíʼin ni̱i̱’).
20 Saáchi ni̱ka̱ʼyi̱ña nu̱ú tutu ña̱ Salmo: ‘Ta veʼera ná kindo̱o miíña ta ni iinna ná kǒo kundoo iniña’, ta ‘Chiñu ña̱ nda̱kiʼinra inkana ná ndakiʼinña’.
21 Ña̱kán, xíniñúʼu ndaka̱xinyó iin ta̱a na̱ xi̱xika xíʼinyó ndiʼi tiempo tá ke̱ʼé tátayó Jesús chiñura
22 nda̱a̱ tá nda̱kuchira i̱xaa ta̱ Juan ta nda̱a̱ ki̱vi̱ ni̱xi̱yora xíʼinyó ta nda̱kiʼinnara ku̱a̱ʼa̱nra chí ndiví, ta̱ ta̱a yóʼo kúú ta̱ xíniñúʼu koo testigo xíʼinyó xa̱ʼa̱ ña̱ nda̱takura”.
23 Ña̱kán ni̱ka̱ʼa̱nna xa̱ʼa̱ u̱vi̱na: ta̱ José, ta̱ xi̱naní Barsabás ta xi̱ka̱ʼa̱ntuna xíʼinra Justo, xíʼin ta̱ Matías.
24 Tándi̱ʼi, saá ni̱ka̱ʼa̱nna xíʼin Ndióxi̱ ta ka̱china: “Jehová,* yóʼó kúú ta̱ xíni̱ ndáa ki̱ʼva íyo níma̱ ndiʼi na̱ yiví, na̱ʼa̱ nu̱úndi̱ ndáa u̱vi̱ ta̱a yóʼo kúú na̱ nda̱kaxiún
25 ña̱ va̱ʼa ndi̱ʼvina nu̱ú ta̱ Judas ta koona apóstol ta kachíñuna nu̱ún, ta̱ Judas sa̱ndákoora chiñura ta ke̱ʼéra ña̱ kúni̱ miíra”.
26 Tasaá ki̱xáʼana ndúkúna iin seña* nu̱ú Ndióxi̱ ña̱ va̱ʼa kunda̱a̱-inina ndáana kúú na̱ ndaka̱xinna, ta ni̱na̱ʼa̱ña nu̱úna ña̱ xíniñúʼu ndaka̱xinna ta̱ Matías; ta nda̱kutáʼanra xíʼin na̱ 11 apóstol.
Nota
^ Tu̱ʼun ña̱ ni̱ka̱ʼyi̱ña káchiña “koondó testigoi̱”.
^ Inka variante “xi̱kí”.
^ Tu̱ʼun griego, sabbatou . . . odon. Ña̱yóʼo káʼa̱nña xa̱ʼa̱, distancia ña̱ kivi kaka na̱ judío tá kúúña ki̱vi̱ sábado.
^ Inka variante “xe̱enra”.
^ Xi̱niñúʼuna iin ña̱ʼa ña̱ kivi na̱ʼa̱ Ndióxi̱ nu̱úna ndáaña kúú ña̱ kúni̱ra.
