Éxodo 1:1-22
1 Na̱yóʼo kúú na̱ se̱ʼe ta̱ Israel na̱ ni̱xa̱a̱ xíʼinra* chí Egipto, iin tá iinna xíʼin na̱ veʼena:
2 ta̱ Rubén, ta̱ Simeón, ta̱ Leví xíʼin ta̱ Judá;
3 ta̱ Isacar, ta̱ Zabulón xíʼin ta̱ Benjamín;
4 ta̱ Dan xíʼin ta̱ Neftalí, ta saátu ta̱ Gad xíʼin ta̱ Aser.
5 Ta ndiʼi na̱ se̱ʼe ta̱ Jacob, 70 xi̱kuuna. Ta̱ José xa̱a̱ chí Egipto ni̱xi̱yora.
6 Tándi̱ʼi, ni̱xi̱ʼi̱ ta̱ José ta saátu ni̱xi̱ʼi̱ ndiʼi na̱ ñanira xíʼin ndiʼi na̱ ni̱xi̱yo tiempora.
7 Ku̱a̱ʼání se̱ʼe na̱ israelita* ka̱ku ta ku̱a̱ʼání ki̱xáʼana ndu̱una, ndakúní ni̱xa̱a̱na ndu̱una ta kamaní ku̱u ña̱yóʼo, xa̱ʼa̱ ña̱kán iin chu̱túna iníí nu̱ú ñuu kán.
8 Tá ni̱ya̱ʼa ku̱i̱ya̱, ki̱xáʼa xáʼndachíñu inka ta̱ rey chí Egipto, ta ta̱yóʼo va̱ása níxi̱xini̱ra ta̱ José.
9 Ta ni̱ka̱ʼa̱nra xíʼin na̱ ñuura: “Kotondó, na̱ ñuu Israel ku̱a̱ʼáníka kúúna nu̱ú miíyó ta ndakúníkana nu̱úyó.
10 Ná ndukúyó ndáaña kivi keʼéyó xíʼinna ña̱ va̱ása nduku̱a̱ʼáníkana. Chi tá kǒo, tá ná kixáʼa na̱ inka ñuu na̱ sáa̱-ini xíni miíyó kanitáʼanna xíʼinyó, ndakutáʼanna xíʼin na̱yóʼo ta kanitáʼanna xíʼinyó tasaá ku̱ʼu̱nvana ñuu yóʼo”.
11 Nda̱kaxinna na̱ ta̱a na̱ kiʼin kuenta xíʼinna ña̱ kachíñuna. Na̱yóʼo xi̱ ixandúxana xíʼinna ña̱ kachíñundáʼvina ta xi̱ ixandi̱va̱ʼanína xíʼinna. Saátu i̱xandúxana xíʼinna ña̱ i̱xava̱ʼana ku̱a̱ʼá veʼe ta ni̱xa̱a̱ña ndu̱uña ñuu Pitom xíʼin Raamsés, ta yóʼo kúú nu̱ú xi̱ndataánva̱ʼa* ta̱ faraón ña̱ xi̱kuumiíra.
12 Soo tá ndeéka xi̱ ixandi̱va̱ʼana xíʼinna, ku̱a̱ʼáka xi̱nduu na̱yóʼo, ta ku̱a̱ʼáka nu̱ú ni̱xa̱ʼa̱nna xi̱ndoona. Xa̱ʼa̱ ña̱kán, ni̱yi̱ʼvíní na̱ egipcio xi̱nina na̱ israelita.
13 Xa̱ʼa̱ ña̱yóʼo, na̱ egipcio ndeéníka i̱xandi̱va̱ʼana xíʼin na̱ israelita ta ve̱eníka chiñu ta̱xina ndaʼa̱na.
14 Sa̱xóʼvi̱nínana* chi ta̱xina chiñu ña̱ yo̱ʼvi̱ní* ndaʼa̱na: ni̱ka̱ʼa̱nna xíʼinna ña̱ ndasakána nda̱ʼyi̱ ta ixava̱ʼana ndo̱ʼo, saátu ni̱ka̱ʼa̱nna xíʼinna ña̱ kachíñuna yuku̱. I̱xandi̱va̱ʼanína xíʼinna ta ve̱ení chiñu ta̱xina ndaʼa̱na.
15 Tándi̱ʼi, ta̱ rey ñuu Egipto ni̱ka̱ʼa̱nra xíʼin u̱vi̱ ná ñaʼá ná hebrea ná xi̱naní Sifrá xíʼin Pua, ná xi̱chindeétáʼan xíʼin ná ñaʼá ña̱ kaku se̱ʼená.
16 Ña̱yóʼo ni̱ka̱ʼa̱nra xíʼinná: “Tá ná chindeétáʼanndó xíʼin ná hebrea ña̱ kaku se̱ʼená, ta xítondó ña̱ ndóoná nu̱ú tayi̱ nu̱ú ndóo ná káku se̱ʼe, xíniñúʼu keʼéndó ña̱yóʼo: tá iin ta̱ loʼo kúú ta̱ ka̱ku, kaʼníndóra, soo tá iin ñá loʼo kúúñá, ná kutakuvañá”.
17 Soo ná ñaʼá yóʼo, xi̱ ixato̱ʼóvaná Ndióxi̱ ta̱ nda̱a̱, xa̱ʼa̱ ña̱kán nu̱úka ña̱ keʼéna ña̱ ni̱ka̱ʼa̱n ta̱ rey ñuu Egipto xíʼinná, náyóʼo va̱ása níxi̱xaʼníná na̱ ta̱a válí.
18 Tá ni̱ya̱ʼa loʼo, ta̱ rey ñuu Egipto ka̱nara ná ñaʼá yóʼo, ta ni̱nda̱ka̱tu̱ʼunraná: “¿Nda̱chun va̱ása níxaʼníndó na̱ ta̱a válí?”.
19 Ná ñaʼá yóʼo nda̱kuiinná yuʼú ta̱ faraón, ta ka̱chiná: “Ná hebrea va̱ása íyoná nda̱a̱ táki̱ʼva íyo ná egipcia. Ná hebrea ndakúnívaná chi tá kúma̱níka xa̱a̱ ná sakáku se̱ʼená, xa̱a̱ sákaku miívaná se̱ʼená”.
20 Xa̱ʼa̱ ña̱yóʼo, Ndióxi̱ ta̱xira bendición ndaʼa̱ ná ñaʼá yóʼo ta ku̱a̱ʼáníka ni̱xa̱a̱ na̱ ñuu Israel ndu̱una ta ndakúní ndu̱una.
21 Ta xa̱ʼa̱ ña̱ i̱xato̱ʼóní ná ñaʼá yóʼo Ndióxi̱ ta̱ nda̱a̱, ta̱xira ña̱ koo se̱ʼená.
22 Tándi̱ʼi, ta̱ faraón ni̱ka̱ʼa̱nra ña̱yóʼo xíʼin na̱ ñuura: “Ndiʼi na̱ ta̱a válí na̱ sa̱kán káku, na̱ se̱ʼe na̱ hebreo, sakánandóna chí yu̱ta Nilo, ta ná ñaʼá válí kuití ná kutaku”.
Nota
^ Tu̱ʼun ña̱ ni̱ka̱ʼyi̱ña káchiña “Jacob”.
^ Tu̱ʼun ña̱ ni̱ka̱ʼyi̱ña káchiña “na̱ se̱ʼe ta̱ Israel”.
^ Inka variante “xi̱ndachiva̱ʼa”.
^ Inka variante “Sa̱ndóʼona-inina”.
^ Inka variante “xuxa kóchon”.