Éxodo 10:1-29
10 Tasaá, Jehová ni̱ka̱ʼa̱nra xíʼin ta̱ Moisés: “Kúáʼan nu̱ú ta̱ faraón saáchi ta̱xii̱ ña̱ ndu̱ndeé tuku níma̱ra ta saátu na̱ káchíñu nu̱úra, ña̱ va̱ʼa keʼíi̱ ku̱a̱ʼá milagro nu̱úra.
2 Tasaá natúʼún xíʼin na̱ se̱ʼún ta saátu xíʼin na̱ se̱ʼeñániún ndáa ki̱ʼva ta̱xii̱ castigo ndaʼa̱ na̱ egipcio, ta ndáa milagro ke̱ʼíi̱ nu̱úna. Saá kúú ña̱ kunda̱a̱-inindó ña̱ yi̱ʼi̱ kúú Jehová”.
3 Tasaá, ta̱ Moisés xíʼin ta̱ Aarón ni̱xa̱a̱na nu̱ú ta̱ faraón ta ni̱ka̱ʼa̱nna xíʼinra: “Ña̱yóʼo kúú ña̱ ni̱ka̱ʼa̱n Jehová Ndióxi̱ na̱ hebreo: ‘¿Nda̱chun va̱ása xíún keʼún ña̱ káʼi̱n xíʼún? Taxi ná ku̱ʼu̱n na̱ ñui̱ ña̱ ndasakáʼnuna yi̱ʼi̱.
4 Saáchi tá va̱ása xíún taxiún ku̱ʼu̱n na̱ ñui̱, taa̱n chindaʼíi̱ ti̱ka náʼnu kixirí ñuún.
5 Ndakutúrí nu̱ú ñuʼú ta va̱ása kivika kotondó nu̱úña, ta kaxírí ndiʼi ña̱ va̱ása níndiʼi-xa̱ʼa̱ tá ku̱un ñíí, ta saátu kaxírí yitu̱n tú sa̱kán va̱xikuaʼnu chí yuku̱.
6 Ndakutúrí veʼún, veʼe na̱ káchíñu nu̱ún ta saátu ndiʼi veʼe ña̱ íyo chí Egipto. Ni na̱ yiváún, ni na̱ xi̱ún nda̱a̱ ni iin yichi̱ ta̱ʼán kunina kuu ña̱yóʼo nu̱ú ñuʼú yóʼo’”. Ta ki̱tara nu̱ú íyo ta̱ faraón tasaá nda̱kiʼinra ku̱a̱ʼa̱nra.
7 Tándi̱ʼi ku̱u ña̱yóʼo, na̱ káchíñu nu̱ú ta̱ faraón ni̱ka̱ʼa̱nna xíʼinra: “Ta̱ ta̱a yóʼo ndákundeéra chíkaa̱ra miíyó nu̱ú tu̱ndóʼo. Taxi ná ku̱ʼu̱n na̱ yiví káa ña̱ ndasakáʼnuna Jehová Ndióxi̱na. ¿Á ta̱ʼán kiʼún kuenta ña̱ ndi̱ʼi-xa̱ʼa̱va ñuu Egipto?”.
8 Tasaá, tuku ka̱na ta̱ faraón ta̱ Moisés xíʼin ta̱ Aarón. Ta ni̱ka̱ʼa̱nra xíʼinna: “Kúáʼanndó ndasakáʼnundó Jehová Ndióxi̱ndó. Soo ka̱ʼa̱nndó xíʼi̱n, ¿ndáana kúú na̱ ku̱ʼu̱n xíʼinndó?”.
9 Tasaá, ta̱ Moisés ni̱ka̱ʼa̱nra xíʼinra: “Iin vikó kúú ña̱ keʼéndi̱ nu̱ú Jehová, xa̱ʼa̱ ña̱kán ku̱ʼu̱n na̱ va̱lí xíʼinndi̱, na̱ xi̱kuaʼa̱, se̱ʼeta̱andi̱, se̱ʼe-síʼindi̱, ndikachi* sa̱na̱ndi̱ ta saátu si̱ndi̱ki̱ sa̱na̱ndi̱”.
10 Soo ta̱ faraón nda̱kuiinra yuʼúna: “¿Á ndixaví ndákanixi̱níndó ña̱ chíndeétáʼan Jehová xíʼinndó ta taxii̱ ku̱ʼu̱nndó xíʼin se̱ʼendó? Náʼa̱ miíva ña̱ kúni̱ndó keʼéndó ña̱ va̱ása va̱ʼa.
11 Va̱ása taxii̱ ku̱ʼu̱n ndiʼindó. Na̱ ta̱a kuití kúú na̱ kivi ku̱ʼu̱n ña̱ ndasakáʼnuna Jehová, chi ña̱yóʼo kúú ña̱ ndu̱kúndó nu̱úi̱”. Ta ndi̱ku̱n ta̱xínnana nu̱ú ta̱ faraón.
12 Tasaá ni̱ka̱ʼa̱n Jehová xíʼin ta̱ Moisés: “Katanii ndaʼún nu̱ú ñuu Egipto ña̱ va̱ʼa ná kixi tí ti̱ka náʼnu ñuu yóʼo, ta ná kaxírí ndiʼi yu̱ku̱ kúii̱ ña̱ va̱ása níndiʼi-xa̱ʼa̱ tá ku̱un ñíí”.
13 Ta kamaní ka̱tanii ta̱ Moisés karrotira* nu̱ú ñuu Egipto. Tasaá, Jehová chi̱ndaʼára iin ta̱chí ña̱ ki̱xi chí nu̱ú kíta ñu̱ʼu* ta ka̱niña nu̱ú ñuu yóʼo, káʼñu xíʼin ñuú* ka̱niña. Ta tá ni̱tu̱vi, ku̱a̱ʼání ti̱ka náʼnu ki̱xaa̱ xíʼin ta̱chí yóʼo.
14 Ta tí ti̱ka náʼnu yóʼo, ni̱ndi̱ʼvirí ñuu Egipto ta iníísaá nda̱kutúrí. Kininí ni̱xi̱yo ña̱yóʼo. Nda̱a̱ ni iin yichi̱ ta̱ʼán koo ku̱a̱ʼání tí ti̱ka náʼnu ta iinlá saá kúú ña̱ ku̱a̱ʼánírí ni̱xi̱yo.
15 Nda̱kutúrí iníí ñuu kán ta iin ku̱naa nu̱ú ñuʼú xíʼinrí. Xa̱xírí ndiʼi yu̱ku̱ kúii̱ ña̱ ni̱xi̱yo ñuu kán, ta saátu ndiʼi ku̱i̱ʼi ña̱ ni̱xi̱yo ndaʼa̱ yitu̱n ña̱ va̱ása níndiʼi-xa̱ʼa̱ tá ku̱un ñíí. Nda̱a̱ ni iin yu̱ku̱ kúii̱ kǒo níkindo̱o ndaʼa̱ yitu̱n ni chí yuku̱ ña̱ ñuu Egipto.
16 Ta̱ faraón kama ka̱nara ta̱ Moisés xíʼin ta̱ Aarón ta ni̱ka̱ʼa̱nra xíʼinna: “Ni̱ki̱ʼvii̱ ku̱a̱chi nu̱ú Jehová Ndióxi̱ndó ta saátu nu̱ú miíndó.
17 Ixandó ña̱ ma̱ní koo káʼnu-inindó xa̱ʼa̱ ku̱a̱chii̱, ta kuakundáʼvindó nu̱ú Jehová Ndióxi̱ndó ña̱ ná kindaara tu̱ndóʼo yóʼo nu̱úi̱”.
18 Xa̱ʼa̱ ña̱kán, ki̱tara* nu̱ú íyo ta̱ faraón ta ni̱ka̱ʼa̱n-ndáʼvira xíʼin Jehová.
19 Tasaá, Jehová na̱samara ta̱chí yóʼo ta ndu̱uña ta̱chí ña̱ ndeéní ña̱ ki̱xi chí nu̱ú kíʼvi ñu̱ʼu, ta nda̱kiʼinña tí ti̱ka náʼnu yóʼo ku̱a̱ʼa̱n xíʼinña ta ta̱ánñarí ini tá mar Rojo. Ta nda̱a̱ ni iinka tí ti̱ka náʼnu yóʼo va̱ása níkindo̱oka chí Egipto.
20 Soo Jehová ta̱xira ña̱ ndu̱ndeé níma̱ ta̱ faraón, ta va̱ása nítaxira ku̱ʼu̱n na̱ israelita.
21 Tándi̱ʼi, Jehová ni̱ka̱ʼa̱nra xíʼin ta̱ Moisés: “Ndaniʼi ndaʼún chí ndiví ña̱ va̱ʼa ná kunaa iníísaá ñuu Egipto. Ndeéní kunaa iníísaá ñuu yóʼo”.
22 Ta ndi̱ku̱n kama nda̱niʼi ta̱ Moisés ndaʼa̱ra chí ndiví ta u̱ni̱ ki̱vi̱ ndeéní ku̱naa iníísaá ñuu Egipto.
23 Na̱ egipcio va̱ása níxi̱kivi kunitáʼanna, ta u̱ni̱ ki̱vi̱ va̱ása níkivi keena ini veʼena. Soo ni̱xi̱yova ñuʼu̱ ña̱ xi̱tuu̱n nu̱ú na̱ israelita ini veʼena.
24 Tasaá, ta̱ faraón ka̱nara ta̱ Moisés ta ni̱ka̱ʼa̱nra xíʼinra: “Kúáʼanndó ndasakáʼnundó Jehová. Kivi ku̱ʼu̱n se̱ʼendó xíʼinndó. Soo ná kindo̱o ndikachi xíʼin si̱ndi̱ki̱ sa̱na̱ndó yóʼo”.
25 Tasaá, ta̱ Moisés nda̱kuiinra yuʼúra: “Xíniñúʼu taxiún ku̱ʼu̱n kití xíʼinndi̱ ña̱ va̱ʼa kaʼmindi̱rí* ta so̱kóndi̱rí nu̱ú* Jehová Ndióxi̱ndi̱.
26 Ku̱ʼu̱ntu kití sa̱na̱ndi̱ xíʼinndi̱. Va̱ása ndo̱o nda̱a̱ ni iin tíyóʼo, saáchi sava tíyóʼo kúú tí kuniñúʼundi̱ ña̱ ndasakáʼnundi̱ Jehová Ndióxi̱ndi̱. Tá xa̱a̱ ná xa̱a̱ndi̱ kán saá kunda̱a̱-inindi̱ ndáa kití kúú tí so̱kóndi̱ nu̱ú Jehová”.
27 Soo Jehová ta̱xira ña̱ ná ndundeé tuku níma̱ ta̱ faraón ta va̱ása nítaxira ku̱ʼu̱nna.
28 Xa̱ʼa̱ ña̱yóʼo, ta̱ faraón ka̱chira: “Kúáʼan, chi va̱ása kúnii̱ kotoi̱ yóʼó. Va̱ása ndikókaún kixiún nu̱úi̱, chi tá ná keʼún ña̱yóʼo kaʼníi̱ yóʼó”.
29 Tasaá nda̱kuiin ta̱ Moisés, ta ka̱chira: “Va̱ʼava, va̱ása ndikókai̱ kixii̱ nu̱ún”.
Nota
^ Inka variante “levo”.
^ Á “bastónra”.
^ Inka variante “ña̱ ka̱ndii”.
^ Inka variante “ndiví ñuú”.
^ Sana ta̱ Moisés káʼa̱nña xa̱ʼa̱.
^ Koto glosario, kití tí xi̱sokóna ta xi̱xaʼminarí.
^ Inka variante “taxindirí ndaʼa̱”.
