Éxodo 15:1-27
15 Tá ku̱u ña̱yóʼo, ta̱ Moisés xíʼin na̱ israelita xi̱tana yaa yóʼo nu̱ú Jehová:
“Katai̱ nu̱ú Jehová saáchi ku̱chiñura ka̱nitáʼanra, ta ndu̱káʼnura xa̱ʼa̱ ña̱yóʼo.
Ini tá mar ta̱ánra kuáyi̱ xíʼin na̱ yósórí.*
2 Jehová* kúú ta̱ táxi ndee̱ ndaʼíi̱ ña̱ ndakú koi̱, saáchi ta̱yóʼo kúú ta̱ sáka̱ku yi̱ʼi̱.
Ta̱yóʼo kúú Ndióxi̱i̱, ta ndasakáʼnui̱ra. Ndasakáʼnui̱ Ndióxi̱ yivái̱.
3 Íyoní ndee̱ Jehová ña̱ kanitáʼanra. Jehová kúú ki̱vi̱ra.
4 Ini tá mar ta̱ánra carreta ta̱ faraón xíʼin ndiʼi na̱ ku̱a̱ʼa̱n xíʼinra ña̱ kanitáʼanra,nda̱a̱ ini tá mar Rojo ni̱sa̱ʼvi na̱ xíni̱va̱ʼa kanitáʼan ku̱a̱ʼa̱n xíʼin ta̱ faraón.
5 Ti̱kui̱í tá ndeéní kánda̱ nda̱ará sa̱tána, nda̱a̱ kaʼa̱ ti̱kui̱í ni̱ko̱yona nda̱a̱ táki̱ʼva kóyo yu̱u̱.
6 Ndakúní ndaʼa̱ kúaʼún Jehová.Xíʼin ndaʼa̱ kúaʼún sándiʼi-xa̱ʼún na̱ sáa̱-ini xíni yóʼó Jehová.
7 Káʼnuníún, ta sándiʼi-xa̱ʼún na̱ sáa̱-ini xíni yóʼó.Ña̱ sáún íyoña nda̱a̱ táki̱ʼva íyo ñuʼu̱, ta xáʼmiña na̱yóʼo nda̱a̱ táki̱ʼva xáʼmina mi̱ʼí.*
8 Yóʼó ti̱viún, ta tá ti̱kui̱í nda̱kundichirá nda̱a̱ táki̱ʼva níndichi iin nama̱.Ta va̱ása níkanda̱ka ma̱ʼñú tá mar.
9 Ta̱ sáa̱-ini xíni miíyó ka̱chira: ‘Kundiku̱i̱n ku̱ʼi̱n sa̱tána, ta ndani̱ʼívai̱na.
Ndakiʼi̱n ndiʼi ña̱ kúúmiína ta ndataʼvíi̱ña nda̱a̱ ná xa̱a̱-inii̱.*
Xíʼin espadai̱ sandíʼi-xa̱ʼíi̱na’.
10 Yóʼó ti̱viún, ta tá mar nda̱ará sa̱tána.Na̱yóʼo ni̱sa̱ʼvina ti̱xinrá nda̱a̱ táki̱ʼva sáʼvi iin ka̱a ña̱ ve̱ení.
11 ¿Ndáa Ndióxi̱ íyo nda̱a̱ táki̱ʼva íyo yóʼó Jehová?
¿Á íyo iin na̱ yi̱i̱ní nda̱a̱ táki̱ʼva íyo yóʼó?
Yóʼó kúú ta̱ xíniñúʼu ixato̱ʼóna ta katana yaa nu̱ún ña̱ ndasakáʼnuna yóʼó, ku̱a̱ʼání ña̱ʼa ña̱ ndákanda̱-inindi̱* xíʼin kéʼún.
12 Ka̱taniiún ndaʼa̱ kúaʼún, ta ko̱kó ñuʼú na̱yóʼo.
13 Xa̱ʼa̱ ña̱ ndixaní kúʼvi̱-iniún* xíniún na̱ ñuún, níʼún yichi̱ nu̱úna ta nda̱taváúnna.Xíʼin ndeún kuniʼún yichi̱ nu̱úna ña̱ xa̱a̱na nda̱a̱ nu̱ú yi̱i̱ní nu̱ú íyoún.
14 Na̱ inka ñuu kuniso̱ʼona xa̱ʼa̱ ña̱ ke̱ʼún, ta na̱kán yi̱ʼvínína.Na̱ ndóo chí Filistea ndi̱ʼiní-inina.
15 Ki̱vi̱ saá, na̱ níʼi yichi̱ nu̱ú tribu na̱ Edom yi̱ʼvínína.Na̱ xáʼndachíñu chí Moab, na̱ ni̱nuní kúni nda̱a̱ kisina.*
Ta ndiʼi na̱ ndóo chí Canaán yi̱ʼvínína.
16 Ndeéní yi̱ʼví ndiʼi na̱yóʼo.
Xa̱ʼa̱ ña̱ kúúmiíníún ndee̱, va̱ása kivi kanda̱nanda̱a̱ táki̱ʼva va̱ása kívi kanda̱ iin yu̱u̱nda̱a̱ ná ya̱ʼa na̱ ñuún Jehová,
nda̱a̱ ná ya̱ʼa na̱ ñuu na̱ nda̱kaxiún.
17 Jehová Ndióxi̱ miíndi̱, kuniʼún yichi̱ nu̱úna ña̱ va̱ʼa koona yuku̱ ña̱ kúú kuentaún,nu̱ú íyoún Jehová, nu̱ú nda̱kaxiún koún.
18 Ndiʼi tiempo kaʼndachíñún Jehová.
19 Tá ni̱ke̱e tí kuáyi̱ ini tá mar ta saátu carreta tú xíka nu̱ú ku̱a̱chi xíʼin na̱ yósó tí kuáyi̱ na̱ ku̱a̱ʼa̱n xíʼin ta̱ faraón,Jehová sa̱ndákitáʼanra ti̱kui̱í ta nda̱ará sa̱tána,soo na̱ ñuu Israel ni̱ya̱ʼana nu̱ú ñuʼú yi̱chí ña̱ ki̱ndoo ma̱ʼñú tá mar”.
20 Tasaá ñá Míriam ku̱ʼva ta̱ Aarón ñá xi̱kuu profeta, ki̱ʼinñá iin pandereta ta ndiʼi ná ñaʼá ki̱xáʼana ndíku̱nná ku̱a̱ʼa̱nná sa̱táñá, sákaʼaná pandereta ta tíxáʼaná ku̱a̱ʼa̱nná.
21 Ta ña̱yóʼo xi̱xita ñá Míriam tá xi̱ndakuiinñá ña̱ xi̱xita na̱ ta̱a:
“Katandó nu̱ú Jehová chi ndu̱káʼnura xa̱ʼa̱ ña̱ ke̱ʼéra.
Ini tá mar ta̱ánra kuáyi̱ xíʼin na̱ yósórí”.
22 Tándi̱ʼi, chí mar Rojo nda̱kiʼin ta̱ Moisés na̱ ñuu Israel ku̱a̱ʼa̱n xíʼinra ta ni̱xa̱a̱na chí nu̱ú ñuʼú yi̱chí ña̱ Sur, ta u̱ni̱ ki̱vi̱ ni̱xi̱kana soo kǒo ti̱kui̱í níndani̱ʼína.
23 Tasaá ni̱xa̱a̱na chí Mará,* soo va̱ása níkivi koʼona ti̱kui̱í tá ni̱xi̱yo kán saáchi o̱va̱nírá, xa̱ʼa̱ ña̱kán chi̱naníraña Mará.
24 Tasaá, na̱ ñuu ki̱xáʼana káʼa̱nkúáchina* xa̱ʼa̱ ta̱ Moisés, ta xi̱kaʼa̱nna: “¿Ndáa míí kiʼinyó ti̱kui̱í koʼoyó?”.
25 Ta̱ Moisés ni̱ka̱ʼa̱n-ndáʼvira xíʼin Jehová ña̱ ná chindeétáʼanra xíʼinra, ta Jehová ni̱ka̱ʼa̱nra xíʼinra ña̱ ná ku̱ʼu̱nra nu̱ú níndichi iin yitu̱n loʼo. Tasaá ta̱ Moisés sa̱kánaranú ini ti̱kui̱í ta tá ti̱kui̱í yóʼo ndu̱visi̱rá.
Kán ta̱xi Ndióxi̱ iin ley ndaʼa̱na, ta ni̱ka̱ʼa̱nra xíʼinna ndáaña xíniñúʼu keʼéna, chi xi̱kuni̱ra kunda̱a̱-inira ndáaña ndíkaa̱ níma̱na.
26 Ña̱yóʼo ni̱ka̱ʼa̱nra xíʼinna: “Tá viíní xíniso̱ʼondó ña̱ káʼa̱n yi̱ʼi̱ Jehová Ndióxi̱ndó, ta kéʼéndó ña̱ kútói̱ ta saátu tá ndíku̱nndó ley ña̱ táxii̱ ndaʼa̱ndó ta kándíxandó ndiʼi ña̱ xáʼndai̱ nu̱úndó, va̱ása chindaʼíi̱ nda̱a̱ ni iin kue̱ʼe̱ táʼan ña̱ chi̱ndaʼíi̱ nu̱ú na̱ egipcio nu̱úndó, saáchi yi̱ʼi̱ Jehová kúú ta̱ sándaʼa ndóʼó”.
27 Tándi̱ʼi ku̱u ña̱yóʼo, ni̱xa̱a̱na chí Elim, nu̱ú ni̱xi̱yo 12 ndo̱ʼyo xíʼin 70 tú ñu̱u̱. Ña̱kán, yatin yuʼú ti̱kui̱í kán ni̱xa̱a̱na xi̱kundoona.
Nota
^ Inka variante “na̱ nánoo ya̱ta̱rí”, “na̱ kúnuu sa̱ta̱rí”.
^ Tu̱ʼun ña̱ ni̱ka̱ʼyi̱ña káchiña “Jah”. Ña̱yóʼo kúú inka ki̱ʼva ña̱ káʼa̱nna xíʼin Jehová.
^ Inka variante “kuayi”, “ta̱ka̱”.
^ Inka variante “kutú ti̱xii̱n”, “ndaʼa-inii̱”.
^ Inka variante “ku̱a̱ʼa̱n-inindi̱”, “ndákaʼnda-inindi̱”.
^ Koto glosario, ña̱ ndixaní kúʼvi̱-ini.
^ Inka variante “kisiñana”.
^ Á “Marah”. Koto apéndice A2. Ki̱vi̱ yóʼo kúni̱ kachiña ‘ña̱ o̱va̱’.
^ Inka variante “káʼa̱nválína”, “káʼa̱n-yuʼu̱na”.
