Éxodo 35:1-35
35 Tá ni̱ya̱ʼa loʼo, ta̱ Moisés sandátakara ndiʼi na̱ ñuu Israel ta ni̱ka̱ʼa̱nra xíʼinna: “Ña̱yóʼo kúú ña̱ ni̱ka̱ʼa̱n Jehová ña̱ xíniñúʼu keʼéyó:
2 kivi kachíñundó i̱ñu̱ ki̱vi̱, soo ki̱vi̱ u̱xa̱ iin ki̱vi̱ yi̱i̱ koo ña̱yóʼo nu̱úndó; iin sábado ña̱ xíniñúʼu ndakindee̱ndó kúúña ta ki̱vi̱ yóʼo xíniñúʼu ixato̱ʼóndó Jehová. Tá iinna ná kachíñu ki̱vi̱ sábado xíniñúʼu kuvina.
3 Ki̱vi̱ sábado va̱ása xíniñúʼu ndakaʼmindó ñuʼu̱ ini veʼendó”.
4 Tándi̱ʼi, ta̱ Moisés ni̱ka̱ʼa̱nra xíʼin ndiʼi na̱ ñuu Israel: “Ña̱yóʼo kúú chiñu ña̱ xáʼnda Jehová:
5 ‘Ndiʼindó xíniñúʼu ndakayandó ña̱ʼa taxindó ndaʼa̱ Jehová. Nda̱a̱ ndáakandó kúni̱ taxi ña̱ʼa ndaʼa̱ Jehová xíʼin ndiʼi níma̱ndó taxindó ña̱yóʼo: oro, plata, cobre,
6 yi̱ʼva̱ azul, ixí* sa̱tá ndikachi* ña̱ nda̱kaʼyi̱ color ndíʼí,* yi̱ʼva̱ kúaʼa ña̱ yéʼe̱ní, lino ña̱ va̱ʼa, ixí ti̱xúʼú* síʼi,
7 ñii̱ ndikachi che̱e ña̱ nda̱kaʼyi̱ color kúáʼa, ñii̱ tí foca, yitu̱n tú acacia,
8 aceite tá kuniñúʼuna xíʼin lámpara, bálsamo* tá kuniñúʼuna ixava̱ʼana aceite tá yi̱i̱ xíʼin ña̱ʼa ña̱ xáʼa̱n támi ña̱ chiʼmána,
9 saátu yu̱u̱ ña̱ ónice xíʼin inkaka yu̱u̱ ña̱ chindósona nu̱ú ña̱ efod* ta saátu nu̱ú ti̱ko̱to̱ ña̱ kundasi kándíka ta̱ su̱tu̱ káʼnu.
10 ”’Ná kixi ndiʼi na̱ xíni̱va̱ʼa keʼé iin ña̱ʼa, na̱ ndóo xíʼinndó ta ná keʼéna ndiʼi ña̱ ni̱ka̱ʼa̱n Jehová:
11 tabernáculo xíʼin ndiʼi ña̱ kúúmiíña ta saátu ña̱ kundasi sa̱táña, ka̱a ña̱ tiinña xíʼin yitu̱n tú koo síi̱nña,* yitu̱n tú kuniñúʼuna ña̱ ndachitáʼannanú, poste xíʼin ka̱a ña̱ tiin xa̱ʼa̱nú;
12 Arca xíʼin yitu̱n tú kuniñúʼuna xíʼinña saátu ña̱ kundasi yuʼúña, cortina ña̱ ndátaʼví lugar Ña̱ yi̱i̱ xíʼin Ña̱ yi̱i̱ní;
13 mesa xíʼin yitu̱n tú kuniñúʼuna xíʼinña, ndiʼi ña̱ʼa ña̱ kuniñúʼuna xíʼinña, si̱ta̱váʼa ña̱ so̱kóna;*
14 candelabro ña̱ kutuu̱n xíʼin ña̱ʼa ña̱ kuniñúʼuna xíʼinña, lámpara xíʼin aceite tá kuniñúʼuna xíʼinña;
15 altar nu̱ú chiʼmána xíʼin yitu̱n tú kuniñúʼuna xíʼinña, aceite tá yi̱i̱ xíʼin ña̱ʼa ña̱ xáʼa̱n támi ña̱ chiʼmána; cortina ña̱ kutikaa yéʼé tabernáculo;
16 altar nu̱ú kaʼmina kití* tí so̱kóna, reja ña̱ kuva̱ʼa xíʼin cobre, yitu̱n xíʼin ndiʼi ña̱ʼa ña̱ kuniñúʼuna xíʼinña, ña̱ʼa nu̱ú kuñuʼu ti̱kui̱í xíʼin nu̱ú kunúuña;
17 cortina ña̱ kutikaa patio, poste xíʼin ka̱a ña̱ tiin xa̱ʼa̱nú, cortina ña̱ kutikaa chí yéʼé ña̱ patio;
18 ka̱a ña̱ kundita nu̱ú ñuʼú nu̱ú kunuʼnindaa tabernáculo xíʼin poste ña̱ patio, yoʼo̱,
19 ti̱ko̱to̱ ña̱ viíní ku̱kuna* kundixi na̱ kachíñu ini tabernáculo, ti̱ko̱to̱ ña̱ yi̱i̱ ña̱ kundixi ta̱ su̱tu̱ Aarón xíʼin ti̱ko̱to̱ ña̱ kundixi na̱ se̱ʼera tá ná koona su̱tu̱’”.
20 Tá sa̱ndíʼi ta̱ Moisés ni̱ka̱ʼa̱nra xíʼin na̱ ñuu Israel, nda̱ndikóna veʼena.
21 Tasaá ki̱xáʼana xáʼa̱nna xíʼin ña̱ʼa ña̱ taxina ndaʼa̱ Jehová ta xíʼin ndiʼi níma̱na ta̱xina ña̱yóʼo. Ña̱yóʼo kúú ña̱ kuniñúʼuna ña̱ va̱ʼa ixava̱ʼana tabernáculo, saátu ña̱ va̱ʼa keʼéna ndiʼi ña̱ʼa ña̱ kuniñúʼu na̱ kachíñu ini ña̱yóʼo, saátu ña̱ va̱ʼa keʼéna ti̱ko̱to̱ ña̱ yi̱i̱.
22 Ta xi̱xaʼa̱nka na̱ ta̱a xíʼin ná ñaʼá xíʼin ka̱a válí ña̱ tíin ti̱ko̱to̱, siki̱ so̱ʼo, seʼe̱* xíʼin inkaka ña̱ʼa táʼan ña̱yóʼo, ta saátu inkaka ña̱ʼa ña̱ oro ta xíʼin ndiʼi níma̱na xi̱taxina ña̱yóʼo. Ndiʼi na̱yóʼo ni̱so̱kóna ña̱ʼa ña̱ oro nu̱ú Jehová.
23 Ta ndiʼi na̱ xi̱kuumií yi̱ʼva̱ azul ta̱xinaña ndaʼa̱ra, ta saátu ta̱xina ixí sa̱tá ndikachi ña̱ nda̱kaʼyi̱ color ndíʼí, yi̱ʼva̱ kúaʼa ña̱ yéʼe̱ní, lino ña̱ va̱ʼa, ixí ti̱xúʼú síʼi, ñii̱ ndikachi che̱e ña̱ nda̱kaʼyi̱ color kúáʼa ta saátu ñii̱ tí foca.
24 Ndiʼi na̱ xi̱kuni̱ taxi plata xíʼin cobre ta̱xinaña ndaʼa̱ Jehová, ta ndiʼi na̱ xi̱kuumií yitu̱n tú acacia tú kuniñúʼuna tá ná kachíñuna ta̱xinanú.
25 Ta ndiʼi ná ñaʼá ná xi̱xini̱ keʼé yi̱ʼva̱, ni̱xa̱ʼa̱nná xíʼin ña̱ ke̱ʼéná: yi̱ʼva̱ azul, ixí sa̱tá ndikachi ña̱ nda̱kaʼyi̱ color ndíʼí, yi̱ʼva̱ kúáʼa ña̱ yéʼe̱ní xíʼin lino ña̱ va̱ʼa.
26 Ta ndiʼi ná ñaʼá ná xi̱xini̱ keʼé yi̱ʼva̱, ke̱ʼéná yi̱ʼva̱ xíʼin ixí ti̱xúʼú síʼi, ta xíʼin ndiʼi níma̱ná ke̱ʼéná ña̱yóʼo.
27 Ta saátu, na̱ níʼi yichi̱ nu̱ú na̱ ñuu ta̱xina yu̱u̱ ña̱ ónice xíʼin inkaka yu̱u̱ ña̱ chindósona nu̱ú ña̱ efod ta saátu nu̱ú ti̱ko̱to̱ ña̱ kundasi kándíka ta̱ su̱tu̱ káʼnu.
28 Saátu ta̱xina bálsamo, aceite ña̱ va̱ʼa kutuu̱n lámpara, aceite tá kuniñúʼuna xíʼin aceite tá yi̱i̱, ta saátu tá kuniñúʼuna xíʼin ña̱ xáʼa̱n támi ña̱ chiʼmána.
29 Ta ndiʼi na̱ ta̱a xíʼin ná ñaʼá na̱ xi̱kuni̱ taxi ña̱ kuniñúʼuna ña̱ va̱ʼa keʼéna ña̱ ni̱ka̱ʼa̱n Jehová xíʼin ta̱ Moisés, ta̱xinaña xíʼin ndiʼi níma̱na. Na̱ israelita ni̱so̱kóna ña̱yóʼo nu̱ú Jehová xíʼin ndiʼi níma̱na.
30 Tasaá, ta̱ Moisés ni̱ka̱ʼa̱nra xíʼin na̱ israelita: “Jehová nda̱kaxinra ta̱ Bezalel, se̱ʼe ta̱ Urí, se̱ʼe ta̱ Hur, ta̱ ki̱xi ti̱xin tribu ta̱ Judá.
31 Ta̱xira espíritu santo ndaʼa̱ra ña̱ va̱ʼa kuumiíra ña̱ ndíchi, kunda̱a̱-inira ta kuxini̱ra keʼéra ku̱a̱ʼá nu̱ú chiñu.
32 Tasaá kivi keʼéra ña̱ʼa xíʼin oro, plata ta saátu cobre,
33 kaʼndara yu̱u̱ ta keʼéra nu̱ú kundósoña, ta saátu keʼéra ndiʼi ña̱ʼa ña̱ kúva̱ʼa xíʼin yitu̱n.
34 Ta Ndióxi̱ ta̱xira ña̱ ndíchi ndaʼa̱ ta̱yóʼo ta saátu ta̱xira ña̱ ndíchi ndaʼa̱ ta̱ Oholiab se̱ʼe ta̱ Ahisamac, ta̱ ki̱xi ti̱xin tribu ta̱ Dan, ña̱ va̱ʼa sanáʼa̱na inkana.
35 Ta̱xira ña̱ ndíchi ndaʼa̱na ña̱ va̱ʼa ku̱kuna ta keʼéna ti̱ko̱to̱ xíʼin yi̱ʼva̱ azul, ixí sa̱tá ndikachi ña̱ nda̱kaʼyi̱ color ndíʼí, yi̱ʼva̱ kúáʼa ña̱ yéʼe̱ní xíʼin lino ña̱ va̱ʼa, ta saátu ña̱ va̱ʼa keʼéna ndiʼi nu̱ú ña̱ʼa. Na̱ ta̱a yóʼo kúú na̱ keʼé ndiʼi nu̱ú chiñu ta sanánana ndáa ki̱ʼva kooña.
Nota
^ Inka variante “yisi̱”.
^ Inka variante “levo”.
^ Á “morado”.
^ Inka variante “ti̱súʼu̱”.
^ Inka variante “xiínña”.
^ Inka variante “taxina”.
^ Koto glosario, kití tí xi̱sokóna ta xi̱xaʼminarí.
^ Inka variante “ki̱kuna”.
^ Á “anillo”. Inka variante “xeʼé”.
