Éxodo 8:1-32
8 Tasaá ni̱ka̱ʼa̱n Jehová xíʼin ta̱ Moisés: “Kúáʼan nu̱ú ta̱ faraón ta ña̱yóʼo ka̱ʼún xíʼinra: ‘Ña̱yóʼo kúú ña̱ káʼa̱n Jehová: “Taxi ná ku̱ʼu̱n na̱ ñui̱ ña̱ va̱ʼa ndasakáʼnuna yi̱ʼi̱.
2 Tá va̱ása xíún taxiún ku̱ʼu̱nna, sakutúi̱ iníísaá ñuu Egipto xíʼin saʼva̱.
3 Iin kutú yu̱ta Nilo xíʼin saʼva̱, tíyóʼo keerí ini ti̱kui̱í ta ki̱ʼvirí veʼún, nu̱ú kísi̱ún, nu̱ú xi̱toún, ta saátu ki̱ʼvirí veʼe na̱ káchíñu nu̱ún, ta koorí iníísaá ñuún. Ki̱ʼvirí ini horno* ña̱ kúúmiíún, nda̱a̱ ini xikóʼó* nu̱ú ndákavana yuxa̱n ki̱ʼvirí.
4 Iin kutú tí saʼva̱ yóʼo nu̱ú íyoún, nu̱ú ndóo na̱ ñuún xíʼin ndiʼi na̱ káchíñu nu̱ún”’”.
5 Tándi̱ʼi, Jehová ni̱ka̱ʼa̱nra ña̱yóʼo xíʼin ta̱ Moisés: “Ka̱ʼa̱n xíʼin ta̱ Aarón: ‘Kiʼin karrotiún* ta kataniinú nu̱ú yu̱ta Nilo nu̱ú ku̱a̱ʼa̱n ti̱kui̱í ta saátu nu̱ú ñúʼu ti̱kui̱í, ta ná kutú iníísaá ñuu Egipto xíʼin saʼva̱’”.
6 Tasaá, ka̱tanii ta̱ Aarón karroti tú níʼira nu̱ú ti̱kui̱í tá íyo chí Egipto, tasaá ki̱xáʼa kée saʼva̱ ini táyóʼo. Ta iin chu̱tú tíyóʼo ñuu kán.
7 Soo saátu ke̱ʼé na̱ ta̱a na̱ xi̱keʼé magia chí Egipto, saáchi xíʼin magia ku̱chiñuna ta̱vána saʼva̱ ini ti̱kui̱í, ta chu̱tú tíyóʼo iníísaá ñuu Egipto.
8 Soo tándi̱ʼi, ta̱ faraón ka̱nara ta̱ Moisés xíʼin ta̱ Aarón ta ni̱ka̱ʼa̱nra xíʼinna: “Kuakundáʼvindó nu̱ú Jehová ña̱ ná sandíʼi-xa̱ʼa̱ra tí saʼva̱ yóʼo, tasaá va̱ása kookarí nu̱ú íyoi̱ ta saátu nu̱ú na̱ ñui̱, saáchi taxivai̱ ña̱ ku̱ʼu̱n na̱ ñuu yóʼo ña̱ va̱ʼa so̱kóna kití nu̱ú* Jehová”.
9 Tasaá ni̱ka̱ʼa̱n ta̱ Moisés xíʼin ta̱ faraón: “Kivi ndaka̱xin miívaún ama kúni̱ún ná kuakundáʼvii̱ nu̱ú Ndióxi̱ xa̱ʼún, xa̱ʼa̱ na̱ káchíñu nu̱ún, xa̱ʼa̱ na̱ ñuún ta saátu xa̱ʼa̱ veʼún, ña̱ va̱ʼa ná va̱ása kooka tí saʼva̱ yóʼo ta ini yu̱ta Nilo kuití koorí”.
10 Tasaá nda̱kuiin ta̱ faraón: “Taa̱n ka̱ʼún xíʼinra”. Ña̱kán ni̱ka̱ʼa̱n ta̱ Moisés xíʼinra: “Ña̱ va̱ʼa ná kunda̱a̱-iniún ña̱ kǒo inkana íyo nda̱a̱ táki̱ʼva íyo Jehová Ndióxi̱ndi̱, xi̱nuva ña̱ ndúkún.
11 Ndiʼi-xa̱ʼa̱ tí saʼva̱ yóʼo ta va̱ása kookarí veʼún, ni nu̱ú miíún, ni nu̱ú na̱ káchíñu nu̱ún, ni nu̱ú na̱ ñuún. Iinlá yu̱ta Nilo kuití koorí”.
12 Tasaá ta̱ Moisés xíʼin ta̱ Aarón ke̱ena nu̱ú íyo ta̱ faraón, ta ta̱ Moisés xa̱kundáʼvira nu̱ú Jehová ña̱ ná sandíʼi-xa̱ʼa̱ra saʼva̱ tí chi̱ndaʼára nu̱ú ta̱ faraón.
13 Ke̱ʼéva Jehová ña̱ ndu̱kú ta̱ Moisés nu̱úra, tasaá ki̱xáʼa tí saʼva̱ xíʼi̱rí ini veʼena, yéʼéna xíʼin nu̱ú ñuʼúna.
14 Na̱ egipcio ki̱xáʼana ndákayanarí, ta xa̱a̱ tiʼvi tá tiʼvi chi̱ndoonarí chi ku̱a̱ʼákaví xi̱kuurí ta kininí ki̱xáʼa xáʼa̱n iníísaá ñuu Egipto.
15 Tá xi̱ni ta̱ faraón ña̱ kǒoka tí saʼva̱ yóʼo íyo, ndu̱ndeé tuku níma̱ra, ta nda̱a̱ táki̱ʼva xa̱a̱ ni̱ka̱ʼa̱n Jehová, va̱ása níxiinra kuniso̱ʼora ña̱ ni̱ka̱ʼa̱n ta̱ Moisés ni ta̱ Aarón.
16 Tasaá, Jehová ni̱ka̱ʼa̱nra ña̱yóʼo xíʼin ta̱ Moisés: “Ka̱ʼa̱n xíʼin ta̱ Aarón: ‘Kiʼin karrotiún ta xíʼin túyóʼo kaniún nu̱ú ñuʼú, tasaá ndiʼi yáká* ña̱ íyo ñuu Egipto nduuña ti̱xe̱ʼe’”.
17 Ta ña̱yóʼo kúú ña̱ ke̱ʼévana. Ta̱ Aarón ka̱nira nu̱ú ñuʼú xíʼin karrotira, ta tí ti̱xe̱ʼe ki̱xáʼarí xáxirí na̱ yiví xíʼin ndiʼi kití. Ndiʼi yáká ña̱ ni̱xi̱yo ñuu Egipto ndu̱uña ti̱xe̱ʼe.
18 Ta na̱ ta̱a na̱ xi̱keʼé magia, xi̱kuni̱na keʼéna táʼan ña̱ ke̱ʼé na̱yóʼo, xi̱kuni̱na ná nduu yáká ti̱xe̱ʼe, soo va̱ása níkuchiñuna. Ta tí ti̱xe̱ʼe xi̱xaxírí na̱ yiví xíʼin ndiʼi kití.
19 Tasaá na̱ ta̱a na̱ xi̱keʼé magia ni̱ka̱ʼa̱nna xíʼin ta̱ faraón: “Mií Ndióxi̱ kúú ta̱ kéʼé ña̱yóʼo xíʼin ndee̱ra”. Soo nda̱a̱ táki̱ʼva xa̱a̱ ni̱ka̱ʼa̱n Jehová, ndu̱ndeéka níma̱ ta̱ faraón ta va̱ása níxiinra kandíxarana.
20 Tasaá ni̱ka̱ʼa̱n Jehová xíʼin ta̱ Moisés: “Xi̱ta̱a̱nní* ndako̱ún taa̱n, ta ku̱ʼún ndakutáʼún xíʼin ta̱ faraón. Chí yu̱ta ku̱ʼu̱nra ta kán ka̱ʼún xíʼinra: ‘Ña̱yóʼo kúú ña̱ ni̱ka̱ʼa̱n Jehová: “Taxi ná ku̱ʼu̱n na̱ ñui̱ ña̱ va̱ʼa ná ndasakáʼnuna yi̱ʼi̱.
21 Soo tá ná va̱ása taxiún ku̱ʼu̱n na̱ ñui̱, chindaʼíi̱ tí tábano* nu̱ún, nu̱ú na̱ káchíñu nu̱ún, nu̱ú na̱ ñuún ta saátu ki̱ʼvirí veʼún. Tí tábano, kutúrí veʼe na̱ ñuu Egipto, ta nda̱a̱ nu̱ú ñuʼú nu̱ú xíkana kutúrí.
22 Soo ki̱vi̱ kán, iinlá ñuʼú ña̱ Gosén nu̱ú ndóo na̱ ñui̱ kúú nu̱ú va̱ása koo tí tábano, tasaá kunda̱a̱-iniún ña̱ yi̱ʼi̱, Jehová, íyoi̱ nu̱ú ñuʼú yóʼo.
23 Xa̱a̱ síín keʼíi̱ xíʼin na̱ ñuún ta xa̱a̱ síín keʼíi̱ xíʼin na̱ ñui̱. Taa̱n keʼíi̱ ña̱yóʼo”’”.
24 Tasaá ke̱ʼéva Jehová. Ku̱a̱ʼání tí tábano ki̱xáʼarí ndíʼvirí veʼe ta̱ faraón, xíʼin veʼe na̱ xi̱kachíñu nu̱úra, iníí ñuu Egipto ni̱ndi̱ʼvirí. Ni̱xo̱ʼvi̱ní* na̱ ñuu Egipto i̱xaa tí tábano.
25 Tasaáví ka̱na ta̱ faraón ta̱ Moisés xíʼin ta̱ Aarón ta ni̱ka̱ʼa̱nra xíʼinna: “Kúáʼanndó ta so̱kóndó kití nu̱ú Ndióxi̱ndó nu̱ú ñuʼú yóʼo”.
26 Soo ta̱ Moisés nda̱kuiinra: “Va̱ása va̱ʼa keʼéndi̱ ña̱yóʼo. Saáchi na̱ egipcio, kúndasína xínina ña̱ kéʼéndi̱, chi sóko̱ndi̱ kití nu̱ú Jehová Ndióxi̱ndi̱. Tá ná kunina kaʼníndi̱ kití tí so̱kóndi̱ nu̱ú Ndióxi̱, kuunna yu̱u̱ miíndi̱.
27 Ña̱kán kúú ña̱ kúni̱ndi̱ ku̱ʼu̱nndi̱ u̱ni̱ ki̱vi̱ chí nu̱ú ñuʼú yi̱chí ta kán kúú nu̱ú so̱kóndi̱ kití nu̱ú Jehová Ndióxi̱ndi̱, nda̱a̱ táki̱ʼva xa̱a̱ ni̱ka̱ʼa̱nra xíʼinndi̱”.
28 Tasaá ni̱ka̱ʼa̱n ta̱ faraón: “Taxii̱ ku̱ʼu̱nndó nu̱ú ñuʼú yi̱chí ña̱ va̱ʼa so̱kóndó kití nu̱ú Jehová Ndióxi̱ndó. Soo va̱ása xíkání ku̱ʼu̱nndó. Ta ka̱ʼa̱nndó xíʼinra xa̱ʼíi̱”.
29 Tasaá nda̱kuiin ta̱ Moisés: “Ku̱ʼi̱n ta ka̱ʼa̱n-ndáʼvii̱ xíʼin Jehová ña̱ ná sandíʼi-xa̱ʼa̱ra tí tábano yóʼo taa̱n, tasaá va̱ása kookarí ni nu̱ú miíún, ni nu̱ú na̱ káchíñu nu̱ún ni nu̱ú na̱ ñuún. Soo, táta faraón, va̱ása sandáʼviún ndi̱ʼi̱ ta va̱ása ka̱ʼún xíʼinndi̱ ña̱ va̱ása kívi keendi̱ xíʼin na̱ ñuundi̱ ña̱ va̱ʼa ku̱ʼu̱nndi̱ so̱kóndi̱ kití nu̱ú Jehová”.
30 Tasaá ki̱ta ta̱ Moisés nu̱ú íyo ta̱ faraón ta ni̱ka̱ʼa̱n-ndáʼvira xíʼin Jehová.
31 Ta ke̱ʼéva Jehová ña̱ ndu̱kú ta̱ Moisés nu̱úra. Tasaá ndi̱ʼi-xa̱ʼa̱va tí tábano nu̱ú ta̱ faraón, nu̱ú na̱ káchíñu nu̱úra ta saátu nu̱ú na̱ ñuura. Kǒo níkindo̱o ni iinrí ñuu kán.
32 Soo tuku ndu̱ndeé níma̱ ta̱ faraón ta va̱ása nítaxira kee na̱ ñuu Israel.
Nota
^ Á “xi̱tu̱n”.
^ Inka variante “teʼe̱”.
^ Á “bastóún”.
^ Inka variante “taxina kití ndaʼa̱”.
^ Inka variante “ya̱a̱”.
^ Inka variante “Ñaʼaní”.
^ Inka variante “ti̱xa̱ándu”. Tíyóʼo kúú ndikama tí xáxi ta xíʼirí ni̱i̱.
^ Inka variante “Ndo̱ʼo-ini”.
