Segunda ña̱ Juan 1:1-13
1 Yi̱ʼi̱ ta̱ xi̱ku̱a̱ʼa̱,* káʼyíi̱ ña̱yóʼo ku̱xa̱a̱ nu̱ú yóʼó nána ñá nda̱kaxin Ndióxi̱ ta saátu nu̱ú na̱ se̱ʼún, ndixaní kúʼvi̱-inii̱ xínii̱ ndóʼó soo su̱ví yi̱ʼi̱ kuití kúʼvi̱-ini xíni ndóʼó chi saátu ndiʼi na̱ ni̱xa̱a̱ na̱kunda̱a̱-ini xa̱ʼa̱ ña̱ nda̱a̱,
2 kúʼvi̱-inindi̱ xínindi̱ ndóʼó saáchi ña̱ nda̱a̱ ndíka̱a̱ña níma̱yó ta kooña xíʼinyó ndiʼi tiempo.
3 Yiváyó Ndióxi̱ ta̱ íyo chí ndiví ta saátu se̱ʼera ta̱ Jesucristo sanáʼa̱na ña̱ nda̱a̱ miíyó, kuʼvi̱-inina kunina miíyó, na̱ʼa̱na ña̱ va̱ʼaní-inina xíʼinyó, kundáʼvi-inina kunina miíyó ta va̱ʼaní kutáʼanyó xíʼinna.
4 Ni̱kusi̱íní-inii̱ tá na̱kunda̱a̱-inii̱ ña̱ sava na̱ se̱ʼún ndíku̱nvana ña̱ nda̱a̱, nda̱a̱ táki̱ʼva xa̱ʼnda yiváyó chiñu nu̱úyó.
5 Xákundáʼvii̱ nu̱ún nána ña̱ ná kuʼvi̱-iniyó kunitáʼanyó. (Va̱ása káʼi̱n xíʼún xa̱ʼa̱ iin ley xa̱á, chi iin ley ña̱ xa̱a̱ íyo tá ya̱chi̱ kúú ña̱ káʼi̱n xa̱ʼa̱ xíʼún).
6 Ña̱yóʼo kúni̱ kachi ña̱ kuʼvi̱-iniyó kunitáʼanyó: ña̱ ná ndakundeéyó keʼéyó chiñu ña̱ xáʼndara nu̱úyó. Nda̱a̱ táki̱ʼva xi̱niso̱ʼondó tá xa̱ʼa̱, ña̱yóʼo kúú chiñu ña̱ xa̱ʼndara: ña̱ ná ndakundeéndó kuʼvi̱-inindó kunitáʼanndó.
7 Saáchi ki̱xáʼa íyo ku̱a̱ʼání na̱ vatá* nu̱ú ñuyǐví yóʼo, ta na̱yóʼo va̱ása ndákunina ta̱ Jesucristo ña̱ ki̱xira nu̱ú ñuʼú yóʼo ta xi̱kuura iin na̱ yiví. Ta na̱yóʼo kúú na̱ vatá na̱ íyo contra ta̱ Cristo.*
8 Kiʼinníndó kuenta xíʼin ña̱ kéʼéndó, ña̱kán va̱ʼa ndakiʼinndó bendición ña̱ taxi Ndióxi̱ ndaʼa̱ndó chi tá kǒo kéʼéndó ña̱yóʼo, va̱ása ndakiʼinndó ña̱ ndeéní ka̱chíñundi̱ xa̱ʼa̱.
9 Ndiʼi na̱ násama ña̱ sa̱náʼa̱ ta̱ Cristo ta va̱ása ndíku̱nna ña̱yóʼo, va̱ása kítáʼanna xíʼin Ndióxi̱. Soo na̱ ndíku̱n ña̱yóʼo kítáʼanna xíʼin yiváyó ta saátu xíʼin se̱ʼera.
10 Tá iin na̱ yiví va̱xina nu̱úndó ta ña̱ sánáʼa̱na va̱ása kítáʼanña xíʼin ña̱ sa̱náʼa̱ ta̱ Cristo, va̱ása ndakiʼinndóna veʼendó ta ni va̱ása chindeéndóna.*
11 Saáchi na̱ chíndeé na̱yóʼo íyo yuʼúna* xíʼinna xa̱ʼa̱ ña̱ va̱ása va̱ʼa ña̱ kéʼéna.
12 Ni íyo ku̱a̱ʼáníkava ña̱ kúni̱i̱ ka̱ʼi̱n xa̱ʼa̱ xíʼinndó, kǒo kúni̱i̱ kaʼyíi̱ña nu̱ú tutu chi kúni̱i̱ xa̱i̱ kuni nu̱úi̱ ndóʼó tasaá ka̱ʼi̱n xíʼinndó ña̱ va̱ʼa kusi̱íníka-inindó.
13 Na̱ se̱ʼe ñá ku̱ʼvi̱ún ñá nda̱kaxin Ndióxi̱, chíndeénína yóʼó.*
Nota
^ Á “anciano”.
^ Inka variante “na̱ to̱ʼón”.
^ Á “anticristo”.
^ Inka variante “va̱ása ka̱ʼa̱n to̱ʼóndó xíʼinna”, “va̱ása ka̱ʼa̱n ndióxi̱ndó xíʼinna”.
^ Inka variante “kítáʼan tu̱ʼunna”.
^ Inka variante “káʼa̱n to̱ʼóna xíʼún”, “káʼa̱n ndióxi̱na xíʼún”.
