Tercera ña̱ Juan 1:1-14
1 Yi̱ʼi̱ ta̱ xi̱ku̱a̱ʼa̱,* káʼyíi̱ ña̱yóʼo nu̱ú yóʼó ta̱ Gayo, ta̱ kúʼvi̱ní-inii̱ xínii̱, mií ña̱ ndixa kúʼvi̱ní-inii̱ xínii̱ yóʼó.
2 Yóʼó ta̱ kúʼvi̱ní-inii̱ xínii̱, káʼi̱n xíʼin Ndióxi̱ xa̱ʼún ña̱ va̱ʼa ná kana ndiʼi ña̱ kéʼún, ta saátu ña̱ kǒo kiʼin kue̱ʼe̱ yóʼó, ta ná koún nda̱a̱ táki̱ʼva xa̱a̱ íyoún vitin.
3 Saáchi ni̱kusi̱íní-inii̱ tá ki̱xi na̱ ñaniyó ta na̱túʼunna xíʼi̱n ña̱ nda̱kúní íyo iniún xíʼin ña̱ nda̱a̱ ta ndákundeún kéʼún ña̱yóʼo.
4 Kúsi̱íní-inii̱ tá xíniso̱ʼi̱ xa̱ʼa̱ na̱ va̱lí se̱ʼi̱ ña̱ ndákundeéna ndíku̱nna ña̱ nda̱a̱.
5 Yóʼó ta̱ kúʼvi̱ní-inii̱ xínii̱, ndiʼi ña̱ʼa ña̱ kéʼún xa̱ʼa̱ na̱ hermano ni va̱ása xíni̱únna náʼa̱ña ña̱ nda̱kúní íyo iniún.
6 Na̱yóʼo, nu̱ú ndiʼi na̱ congregación káʼa̱nna xa̱ʼún ña̱ kúʼvi̱ní-iniún xíniún inkana. Ta vitin ndúkúi̱ ña̱ ma̱ní nu̱ún ña̱ ná chindeétáʼún xíʼinna ña̱ kǒo kuma̱ní ni iin ña̱ʼa nu̱úna yichi̱ nu̱ú ku̱ʼu̱nna, ta keʼúnña nda̱a̱ táki̱ʼva kútóo mií Ndióxi̱.
7 Saáchi ke̱ena ku̱a̱ʼa̱nna natúʼunna xa̱ʼa̱ Ndióxi̱, ta kǒo níndukúna nda̱a̱ ni iin ña̱ʼa nu̱ú na̱ yiví.*
8 Xa̱ʼa̱ ña̱kán xíniñúʼu viíní ndakiʼinyó na̱ hermano na̱ íyo nda̱a̱ táki̱ʼva íyo na̱yóʼo ña̱ va̱ʼa inkáchi kachíñuyó xa̱ʼa̱ ña̱ nda̱a̱.
9 Ka̱ʼyíi̱ iin carta ku̱xa̱a̱ nu̱ú na̱ congregación, soo ta̱ Diótrefes ta̱ kútóoní kaʼndachíñu nu̱ú ndiʼina ni loʼo kǒo xíínra ndakiʼinra ña̱yóʼo xíʼin ña̱ to̱ʼó.
10 Xa̱ʼa̱ ña̱kán, tá ná xa̱i̱ nu̱ú ndóondó, ka̱ʼa̱nvai̱ xa̱ʼa̱ ndiʼi ña̱ kéʼéra chi xíkara káʼa̱nra ña̱ʼa ña̱ va̱ása va̱ʼa xa̱ʼa̱ndi̱. Soo su̱ví ña̱yóʼo kuití kéʼéra chi saátu kǒo xíínra ndakiʼinra na̱ hermano xíʼin ña̱ to̱ʼó. Ta na̱ kúni̱ ndakiʼin na̱yóʼo kúni̱ra kasira nu̱úna ta tavárana ti̱xin congregación.
11 Yóʼó ta̱ kúʼvi̱ní-inii̱ xínii̱, kǒo keʼún ña̱ va̱ása va̱ʼa ña̱ kéʼé inkana, nu̱úka ña̱yóʼo keʼé ña̱ va̱ʼa. Na̱ kéʼé ña̱ va̱ʼa kuenta Ndióxi̱ kúúna ta na̱ kéʼé ña̱ va̱ása va̱ʼa ta̱ʼán kunina* Ndióxi̱.
12 Ndiʼi na̱ ñaniyó káʼa̱n va̱ʼana xa̱ʼa̱ ta̱ Demetrio. Saáchi xíʼin ndiʼi ña̱ kéʼéra náʼa̱ra ña̱ ndíku̱nra ña̱ nda̱a̱ ta saátu miíndi̱ káʼa̱n va̱ʼandi̱ xa̱ʼa̱ra, ta yóʼó kúnda̱a̱va-iniún ña̱ káʼa̱nndi̱ ña̱ nda̱a̱.
13 Ni íyo ku̱a̱ʼáníkava ña̱ kúni̱i̱ ka̱ʼi̱n xíʼún, kǒo kúni̱i̱ kaʼyíi̱ña nu̱ú tutu.
14 Chi kúni̱i̱ xa̱i̱ kuni nu̱úi̱ yóʼó tasaá ka̱ʼi̱n xíʼún.
Kúni̱i̱ ña̱ ná va̱ása kundi̱ʼi̱-iniún.
Ndiʼi na̱ migoyó chíndeénína yóʼó.* Ka̱ʼún xíʼin iin tá iin na̱ migoyó ña̱ chíndeéníi̱na.
Nota
^ Á “anciano”.
^ Tu̱ʼun ña̱ ni̱ka̱ʼyi̱ña káchiña “na̱ inka ñuu”, ña̱yóʼo káʼa̱nña xa̱ʼa̱, na̱ va̱ása kúú judío ta va̱ása kándíxana ta̱ Cristo.
^ Á “va̱ása xíni̱na xa̱ʼa̱”.
^ Inka variante “káʼa̱n to̱ʼóna xíʼún”, “káʼa̱n ndióxi̱na xíʼún”.
