Génesis 38:1-30
-
Ta̱ Judá xíʼin ñá Tamar (1-30)
38 Tándi̱ʼi ku̱u ña̱yóʼo, ta̱ Judá sa̱ndákoora na̱ ñanira ta ka̱nindichira veʼe loʼora yatin nu̱ú ni̱xi̱yo iin ta̱ adulamita ta̱ xi̱naní Hirá.
2 Kán xi̱ni ta̱ Judá iin ñá ñaʼá ñá se̱ʼe ta̱ cananeo ta̱ xi̱naní Súa, ti̱ndaʼa̱ra xíʼinñá ta ni̱ki̱si̱ra xíʼinñá.
3 Tasaá ni̱ke̱e se̱ʼe ñáyóʼo. Tándi̱ʼi ka̱ku iin se̱ʼeñá ta chi̱nanírara Er.
4 Ta tuku ni̱ke̱e se̱ʼeñá, sa̱kákuñá iin ta̱ loʼo ta chi̱naníñára Onán.
5 Tuku sa̱kákuñá iin ta̱ loʼo ta chi̱naníñára Selá. Chí Aczib ni̱xi̱yo ta̱ Judá tá sa̱kákuñá ta̱ loʼo yóʼo.
6 Tá ni̱ya̱ʼa loʼo tiempo, ta̱ Judá sa̱tíndaʼa̱ra se̱ʼera ta̱ Er, ta̱ nu̱ú, xíʼin iin ñaʼá ñá xi̱naní Tamar.
7 Soo kǒo níxikutóo Jehová ña̱ xi̱keʼé ta̱ Er, se̱ʼenu̱ú ta̱ Judá, ña̱kán xa̱ʼní Jehová ta̱yóʼo.
8 Xa̱ʼa̱ ña̱yóʼo ta̱ Judá ni̱ka̱ʼa̱nra xíʼin ta̱ Onán: “Tindaʼa̱ xíʼin ñá síʼi ñaniún ta̱ ni̱xi̱ʼi̱. Tasaá, tá ná kaku se̱ʼe ñáyóʼo, xa̱a̱na koona se̱ʼe ñaniún”.
9 Soo ta̱ Onán xi̱kundaa̱-inira ña̱ va̱ása xa̱a̱ na̱ se̱ʼe ñáyóʼo koona se̱ʼera. Ña̱kán tá xi̱kisi̱ra xíʼin ñá síʼi ñanira, xi̱xatara nduta̱ra nu̱ú ñuʼú chi va̱ása níxikuni̱ra ke̱e se̱ʼeñá.
10 Soo kǒo níxikutóo Jehová ña̱ xi̱keʼé ta̱yóʼo. Xa̱ʼa̱ ña̱yóʼo xa̱ʼnítura ta̱yóʼo.
11 Tasaá, ta̱ Judá ni̱ka̱ʼa̱nra xíʼin xa̱nura ñá Tamar: “Kindo̱o veʼe yiváún ta va̱ása tindaʼún nda̱a̱ ná kuaʼnu se̱ʼi̱ ta̱ Selá”. Ni̱ka̱ʼa̱nra ña̱yóʼo saáchi xi̱yiʼvíra ña̱ kuvi se̱ʼera nda̱a̱ táki̱ʼva ni̱xi̱ʼi̱ na̱ inka se̱ʼera. Ña̱kán nda̱kiʼin ñá Tamar ku̱a̱ʼa̱nñá ta ki̱ndooñá veʼe yiváñá.
12 Tá ni̱ya̱ʼa ku̱i̱ya̱, ni̱xi̱ʼi̱ ñá síʼi ta̱ Judá, ñáyóʼo xi̱kuuñá se̱ʼe ta̱ Súa. Tá xa̱a̱ ndi̱ʼi xa̱ku ta̱ Judá xa̱ʼa̱ñá, ni̱xa̱ʼa̱nra xíʼin migora ta̱ Hirá ta̱ adulamita chí Timná,* nu̱ú ndóo na̱ xáʼnda ixí* ndikachi* sa̱na̱ra.
13 Tasaá ni̱ka̱ʼa̱nna xíʼin ñá Tamar: “Si̱soún ku̱a̱ʼa̱nra chí Timná,* saáchi xa̱a̱ ta̱ʼnda̱ ixí ndikachi sa̱na̱ra”.
14 Ña̱kán na̱samañá ti̱ko̱to̱ ña̱ xi̱ndixiñá xa̱ʼa̱ ña̱ ni̱xi̱ʼi̱ yii̱ñá, nda̱kasiñá nu̱úñá xíʼin iin ti̱ko̱to̱, nda̱kundixiñá iin páñu ta xi̱kooñá* chí yéʼé ñuu Enaim, ña̱yóʼo xi̱kindo̱oña chí yichi̱ ña̱ ku̱a̱ʼa̱n chí Timná.* Ke̱ʼéñá ña̱yóʼo saáchi xi̱niñá ña̱ xa̱a̱ xa̱ʼnu ta̱ Selá ta ta̱ʼán tindaʼa̱ra xíʼinñá.
15 Tá xi̱ni ta̱ Judá ñáyóʼo, nda̱kanixi̱níra ña̱ kúúñá iin ñaʼá ñá kísi̱ xíʼin ku̱a̱ʼá ta̱a, saáchi chi̱saʼvi ñá Tamar nu̱úñá xíʼin iin ti̱ko̱to̱.
16 Ña̱kán na̱samara yichi̱ nu̱ú ku̱a̱ʼa̱nra, ni̱xa̱a̱ra nu̱úñá ta xa̱ʼa̱ ña̱ kǒo níxi̱kundaa̱-inira ña̱ kúúñá xa̱nura, ni̱ka̱ʼa̱nra xíʼinñá: “¿Á kivi ku̱su̱i̱n xíʼún?”. Ta ñáyóʼo nda̱kuiinñá: “¿Ndáaña taxiún ndaʼíi̱ tá ná ku̱su̱ún xíʼi̱n?”.
17 Ta ni̱ka̱ʼa̱nra xíʼinñá: “Chindaʼíi̱ iin ti̱xúʼú* loʼo sa̱na̱i̱ ndaʼún”. Soo ñáyóʼo nda̱kuiinñá: “¿Á sandákoún iin ña̱ʼa ndaʼíi̱ ña̱ va̱ʼa kundaa̱-inii̱ á ndixa chindaʼún tíyóʼo?”.
18 Ta ni̱nda̱ka̱tu̱ʼunrañá: “¿Ndáaña kúni̱ún ná sandákoi̱ ndaʼún?”. Ta ñáyóʼo ni̱ka̱ʼa̱nñá: “Sandákoo seʼe̱* ña̱ chíka̱ún sello, xíʼin yi̱ʼva̱ ña̱ ndíkaa̱ xa̱ʼa̱ña ta saátu yitu̱n tú níʼún”. Tasaá ta̱xira ña̱yóʼo ndaʼa̱ ñá Tamar, tándi̱ʼi ni̱ki̱si̱ra xíʼinñá ta ni̱ke̱e se̱ʼeñá.
19 Tasaá, nda̱kooñá ta ku̱a̱ʼa̱nñá, na̱samañá ti̱ko̱to̱ñá ta nda̱kundixiñá ti̱ko̱to̱ ña̱ ndíxiñá xa̱ʼa̱ ña̱ ni̱xi̱ʼi̱ yii̱ñá.
20 Ta̱ Judá chi̱ndaʼára migora ta̱ adulamita ña̱ va̱ʼa ku̱ʼu̱n ndakara ti̱xúʼú loʼo ndaʼa̱ ñá ñaʼá kán, tasaá ndakiʼinra ña̱ sa̱ndákoora ndaʼa̱ñá, soo va̱ása níndani̱ʼírañá.
21 Tasaá ni̱nda̱ka̱tu̱ʼunra na̱ ta̱a na̱ íyo ñuu kán: “¿Ndáa míí ku̱a̱ʼa̱n ñá ñaʼá ñá kísi̱ xíʼin ku̱a̱ʼá ta̱a* ñá ni̱xi̱yo chí Enaim yatin yuʼú yichi̱?”. Soo na̱yóʼo ni̱ka̱ʼa̱nna xíʼinra: “Kǒo nda̱a̱ ni iin ñaʼá ñá kísi̱ xíʼin ku̱a̱ʼá ta̱a yóʼo”.
22 Tándi̱ʼi, ndi̱kóra nu̱ú íyo ta̱ Judá ta ni̱ka̱ʼa̱nra xíʼinra: “Kǒoñá níndani̱ʼíi̱. Nda̱a̱ na̱ ta̱a na̱ íyo kán ni̱ka̱ʼa̱n xíʼi̱n: ‘Kǒo nda̱a̱ ni iin ñaʼá ñá kísi̱ xíʼin ku̱a̱ʼá ta̱a íyo yóʼo’”.
23 Tasaá ta̱ Judá ni̱ka̱ʼa̱nra xíʼinra: “Ná kindo̱oñá xíʼin ña̱ʼa ña̱ ta̱xii̱ ndaʼa̱ñá, chi kivi kusi̱kindaana miíyó tá ná nandukúkayóñá. Va̱ʼachi xa̱a̱ chi̱ndaʼávai̱ ti̱xúʼú loʼo ndaʼa̱ñá soo kǒoñá níndani̱ʼún”.
24 Tá ni̱ya̱ʼa u̱ni̱ yo̱o̱ ni̱ka̱ʼa̱nna xíʼin ta̱ Judá: “Xa̱nuún ñá Tamár, ñá kísi̱ xíʼin ku̱a̱ʼá ta̱a kúúñá. Ta xa̱ʼa̱ ña̱yóʼo ni̱ke̱e se̱ʼeñá”. Tasaá ta̱ Judá ni̱ka̱ʼa̱nra: “Tavándóñá ta ná kaʼminañá”.
25 Tá xa̱a̱ ku̱a̱ʼa̱n távánañá, chi̱ndaʼáñá tu̱ʼun yóʼo nu̱ú si̱soñá: “Ta̱a ta̱ xíʼin kuenta ña̱yóʼo kúú yivá se̱ʼi̱”. Ta ni̱ka̱ʼa̱nkañá: “Ixaún ña̱ ma̱ní, koto ndáana xíʼin kuenta seʼe̱ ña̱ chíkaa̱na sello yóʼo, yi̱ʼva̱ xa̱ʼa̱ña xíʼin yitu̱n yóʼo”.
26 Ta̱ Judá nda̱kunira ña̱yóʼo ta ka̱chira: “Kǒoví ku̱a̱chi kúúmií ñáyóʼo, yi̱ʼi̱va kúú ta̱ kúúmií ku̱a̱chi, saáchi kǒo nítaxii̱ ña̱ tindaʼa̱ñá xíʼin se̱ʼi̱ ta̱ Selá”. Tándi̱ʼi ku̱u ña̱yóʼo, va̱ása níki̱si̱kara xíʼinñá.
27 Tasaá, tá xa̱a̱ ki̱xaa̱ ki̱vi̱ ña̱ kaku se̱ʼeñá, kúáti kúú na̱ ka̱ku.
28 Tá sákakuñá na̱ va̱lí yóʼo, iinra ta̱vára ndaʼa̱ra. Tasaá, ñá chíndeétáʼan xíʼinñá ña̱ sakákuñá se̱ʼeñá ki̱ʼinñá iin yi̱ʼva̱ kúáʼa ta ka̱túnñá ña̱yóʼo ndaʼa̱ra ta ka̱chiñá: “Ta̱yóʼo kúú ta̱ siʼna ki̱ta”.
29 Soo nda̱chikaa̱ra ndaʼa̱ra ta ñanira kúú ta̱ ki̱ta. Tasaá, ñá chíndeétáʼan xíʼinñá ña̱ sakákuñá se̱ʼeñá ka̱chiñá: “Sa̱túkue̱ʼe̱níún siʼún”. Xa̱ʼa̱ ña̱yóʼo chi̱nanínara Pérez.*
30 Tándi̱ʼi, ki̱ta ñanira ta̱ ndíkaa̱ yi̱ʼva̱ kúáʼa ndaʼa̱. Ta chi̱nanína ta̱yóʼo Zérah.
Nota
^ Á “Timnah”. Koto apéndice A2.
^ Inka variante “yisi̱”.
^ Inka variante “levo”.
^ Á “Timnah”. Koto apéndice A2.
^ Inka variante “xi̱kundúʼuñá”.
^ Á “Timnah”. Koto apéndice A2.
^ Inka variante “ti̱súʼu̱”.
^ Á “anillo”. Inka variante “xeʼé”.
^ Á “ñaʼá ñá kísi̱ xíʼin ku̱a̱ʼá ta̱a chí templo”. Ña̱yóʼo sana káʼa̱nña xa̱ʼa̱ iin na̱ kísi̱ xíʼin ku̱a̱ʼá ta̱a á ku̱a̱ʼá ñaʼá ña̱ va̱ʼa ndasakáʼnuna ña̱ʼa ña̱ ndásakáʼnu na̱ cananeo.
^ Ña̱ kúni̱ kachi ‘ni̱nda̱ta̱’.
