Génesis 4:1-26
4 Ta̱ Adán ni̱ki̱si̱ra xíʼin ñá síʼira ñá Eva, ta ñáyóʼo ni̱ke̱e se̱ʼeñá. Tá sa̱kákuñá ta̱ Caín ni̱ka̱ʼa̱nñá: “Jehová kúú ta̱ chi̱ndeétáʼan xíʼi̱n ña̱ sa̱kákui̱ ta̱ loʼo yóʼo”.
2 Tándi̱ʼi, sa̱kákuñá inka ta̱ loʼo, ta̱yóʼo xi̱kuu ta̱ Abel, ñani ta̱ Caín.
Ta̱ Abel xi̱ndaara ndikachi,* ta ta̱ Caín ta̱ xi̱chiʼi xi̱kuura.
3 Tá ni̱ya̱ʼa tiempo, ta̱ Caín ta̱xira sava ña̱ʼa ña̱ chíʼira ña̱ va̱ʼa so̱kóraña nu̱ú* Jehová.
4 Soo ta̱ Abel ta̱xira sava ndikachi sa̱na̱ra tí nu̱ú va̱ʼa ka̱ku, nda̱a̱ xa̱ʼanrí* ta̱xira. Jehová ki̱ndoo-inira xíʼin ta̱ Abel ta saátu ña̱ ni̱so̱kóra nu̱úra,
5 soo kǒo níkindo̱o-inira xíʼin ta̱ Caín ni ña̱ ni̱so̱kóra nu̱úra. Xa̱ʼa̱ ña̱yóʼo ni̱sa̱a̱ní ta̱ Caín ta nda̱kavaní-inira.
6 Tasaá Jehová ni̱ka̱ʼa̱nra xíʼin ta̱ Caín: “¿Nda̱chun sáa̱níún, ta nda̱chun nda̱kavaní-iniún?
7 Tá ná nasamaún ña̱ va̱ása va̱ʼa ndákanixi̱níún ta kixáʼún keʼún ña̱ va̱ʼa, kindo̱ova-inii̱ xíʼún. Soo tá kǒo násamaún ña̱ va̱ása va̱ʼa ndákanixi̱níún ta va̱ása kéʼún ña̱ va̱ʼa, xa̱a̱ ku̱nu̱mí ndakavaún ndaʼa̱ ku̱a̱chi ta kúni̱ña kaʼndachíñuña nu̱ún. Soo yóʼó, ¿á kuchiñún xíʼin ku̱a̱chi yóʼo?”.
8 Tándi̱ʼi ku̱u ña̱yóʼo, ta̱ Caín ni̱ka̱ʼa̱nra xíʼin ñanira ta̱ Abel: “Ná ku̱ʼu̱nyó chí yuku̱”. Ta, tá xa̱a̱ ñúʼuna chí yuku̱, ta̱ Caín ka̱nira ñanira ta xa̱ʼnírara.
9 Tándi̱ʼi, Jehová ni̱nda̱ka̱tu̱ʼunra ta̱ Caín: “¿Ndáa míí ku̱a̱ʼa̱n ñaniún ta̱ Abel?”. Ta̱yóʼo nda̱kuiinra: “Va̱ása xínii̱. ¿Á yi̱ʼi̱va kúú ta̱ ndáa ñanii̱?”.
10 Tasaá Ndióxi̱ ni̱ka̱ʼa̱nra xíʼinra: “¿Nda̱chun ke̱ʼún ña̱yóʼo? Kuniso̱ʼo, ni̱i̱ ñaniún ña̱ ni̱xi̱ta̱ nu̱ú ñuʼú, nda̱a̱ táki̱ʼva íyo ña̱ kána yi̱ʼi̱ saá íyoña.
11 Ta vitin ndákiʼún chiʼña, ña̱kán táxíi̱n yóʼó ta va̱ása kookaún nu̱ú ñuʼú nu̱ú ni̱xi̱ta̱ ni̱i̱ ñaniún xa̱ʼa̱ ña̱ ke̱ʼún xíʼinra.
12 Tá ná chiʼún va̱ása kana ni iin ña̱ʼa. Va̱ása kivi koún iin xíña kuití,* saáchi xa̱a̱ síín síín nu̱ú ku̱ʼún koún”.
13 Tasaá ta̱ Caín ni̱ka̱ʼa̱nra xíʼin Jehová: “Castigo ña̱ ndákiʼi̱n xa̱ʼa̱ ña̱ va̱ása va̱ʼa ke̱ʼíi̱, va̱ása kundeé-inii̱ xíʼinña.
14 Vitin táxíún yi̱ʼi̱ nu̱ú ñuʼú yóʼo, ta xíkání koi̱ nu̱ún. Va̱ása kivika koi̱ iin lugar chi xa̱a̱ síín síín nu̱ú ku̱ʼi̱n koi̱. Ta nda̱a̱ ndáakana ná ndani̱ʼí yi̱ʼi̱, kaʼnívana yi̱ʼi̱”.
15 Xa̱ʼa̱ ña̱yóʼo, Jehová ni̱ka̱ʼa̱nra xíʼinra: “Tá saá ná kuu, nda̱a̱ ndáakana ná kaʼní ta̱ Caín, u̱xa̱ yichi̱ xíniñúʼu ndakiʼinna castigo”.
Xa̱ʼa̱ ña̱yóʼo, Jehová ta̱xira iin seña, ña̱ va̱ʼa nda̱a̱ ndáakana ná ndakutáʼan xíʼin ta̱ Caín, va̱ása kaʼnínara.
16 Tasaá ta̱ Caín ku̱xíkára nu̱ú Jehová ta ku̱a̱ʼa̱nra koora chí ñuʼú ña̱ naní Nod,* ña̱ kíndo̱o chí nu̱ú kíta ñu̱ʼu* chí Edén.
17 Ta ni̱ki̱si̱ ta̱ Caín xíʼin ñá síʼira ta ni̱ke̱e se̱ʼeñá, ta ka̱ku se̱ʼeñá ta̱ Enoc. Tándi̱ʼi, ta̱ Caín ki̱xáʼara íxava̱ʼara ku̱a̱ʼá veʼe ña̱ va̱ʼa xa̱a̱ña kooña iin ñuu ta chi̱núura ki̱vi̱ ñuu yóʼo ña̱ kunaníña Enoc, nda̱a̱ táki̱ʼva naní se̱ʼera.
18 Tándi̱ʼi, ta̱ Enoc xi̱kuura yivá ta̱ Irad; ta̱ Irad xi̱kuura yivá ta̱ Mehujael; ta̱ Mehujael xi̱kuura yivá ta̱ Metusael; ta ta̱ Metusael xi̱kuura yivá ta̱ Lamec.
19 Ta̱ Lamec ti̱ndaʼa̱ra xíʼin u̱vi̱ ná ñaʼá. Ñá nu̱ú xi̱naníñá Adá ta ñá u̱vi̱ xi̱naníñá Zilá.
20 Ñá Adá sa̱kákuñá ta̱ Jabal. Ta̱yóʼo kúú ta̱ nu̱ú ta̱ ni̱xi̱yo ini veʼe válí, saátu xi̱kuura ta̱ nu̱ú ta̱ xi̱kuumií si̱ndi̱ki̱ xíʼin ndikachi.
21 Ta ñanira xi̱naníra Jubal. Ta̱yóʼo kúú ta̱ nu̱ú ta̱ xi̱sakáʼa tú arpa ta xi̱tivira tú flauta.
22 Soo ñá Zilá sa̱kákuñá ta̱ Tubal-Caín, ta̱yóʼo kúú ta̱ xi̱ ixava̱ʼa ndiʼi ña̱ʼa ña̱ xíniñúʼuna tá káchíñuna, ña̱ kúva̱ʼa xíʼin cobre ta saátu hierro. Ta ku̱ʼva ta̱ Tubal-Caín xi̱naníñá Naamá.
23 Tasaá ta̱ Lamec ni̱ka̱ʼa̱nra ña̱yóʼo xíʼin ñá síʼira ñá Adá ta saátu xíʼin ñá Zilá:
“Kuniso̱ʼondó ña̱ ka̱ʼi̱n xíʼinndó,ndóʼó ná síʼi ta̱ Lamec.
Kuniso̱ʼondó tu̱ʼun ña̱ káʼi̱n:xa̱ʼníi̱ iin ta̱a ta̱ sa̱túkue̱ʼe̱ yi̱ʼi̱,
saá ke̱ʼévai̱, xa̱ʼníi̱ iin ta̱ loʼo ta̱ ka̱ni yi̱ʼi̱.
24 Tá 7 yichi̱ xíniñúʼu ndakiʼinna castigo tá ná kaʼnína ta̱ Caín,77 yichi̱ xíniñúʼu ndakiʼinna castigo tá ná kaʼnína ta̱ Lamec”.
25 Tasaá ta̱ Adán tuku ni̱ki̱si̱ra xíʼin ñá síʼira, ta ñáyóʼo ka̱ku iin se̱ʼeñá ta chi̱naníñára Set,* saáchi ka̱chiñá: “Ndióxi̱ ta̱xira inka se̱ʼi̱ xa̱ʼa̱ ta̱ Abel, saáchi ta̱ Caín xa̱ʼníra ta̱yóʼo”.
26 Ni̱xi̱yotu iin se̱ʼe ta̱ Set ta chi̱nanírara Enós. Tá tiempo saá, na̱ yiví ki̱xáʼana xíniñúʼuna ki̱vi̱ Jehová.
Nota
^ Inka variante “levo”.
^ Inka variante “taxiraña ndaʼa̱”.
^ Inka variante “sa̱ʼanrí”.
^ Á “iin kuití lugar”.
^ “Ñuʼú ña̱ Nod” kúni̱ kachiña nu̱ú ndóo na̱ táxínna.
^ Inka variante “ña̱ ka̱ndii”.
^ Ña̱ kúni̱ kachi ‘ta̱ nda̱kaxinna’ á ‘ta̱ ta̱xina’.
