Génesis 48:1-22
48 Tándi̱ʼi ku̱u ña̱yóʼo, ni̱ka̱ʼa̱nna xíʼin ta̱ José: “Xa̱a̱ ku̱vitání yiváún”. Ña̱kán ni̱xa̱ʼa̱nra xi̱torara xíʼin u̱vi̱ saá se̱ʼera, ta̱ Manasés xíʼin ta̱ Efraín.
2 Tasaá ni̱ka̱ʼa̱nna xíʼin ta̱ Jacob: “Ki̱xaa̱ se̱ʼún ta̱ José chi va̱xira kotora yóʼó”. Tasaá chi̱kaa̱ní ta̱ Israel ndee̱ ña̱ nda̱koora ta xi̱koora* nu̱ú xi̱tora.
3 Ta ta̱ Jacob ki̱xáʼara nátúʼunra xíʼin ta̱ José:
“Ndióxi̱ ta̱ kúúmiíní ndee̱, ki̱tara nu̱úi̱ chí Luz, ña̱ ndíkaa̱ chí Canaán, ta ta̱xira bendición ndaʼíi̱.
4 Ki̱ndoora ña̱yóʼo xíʼi̱n: ‘Taxii̱ ña̱ koo se̱ʼún ta ku̱a̱ʼání xa̱a̱na koona. Ku̱a̱ʼání ñuu xa̱a̱ na̱ se̱ʼún nduuna. Taxii̱ ñuʼú yóʼo ndaʼa̱ na̱ se̱ʼún ta ndiʼi tiempo kooña kuentana’.
5 Ta u̱vi̱ saá se̱ʼún na̱ ka̱ku ñuu Egipto yóʼo tá kúma̱níka kixii̱ ndakutáʼi̱n xíʼún, se̱ʼe miíi̱ kúúna vitin. Ta̱ Efraín xíʼin ta̱ Manasés, xa̱a̱na koona se̱ʼe miíi̱ nda̱a̱ táki̱ʼva íyo ta̱ Rubén xíʼin ta̱ Simeón.
6 Soo tá ná kaku inkaka se̱ʼún, se̱ʼe miívaún koo na̱kán. Saátu na̱kán ndakiʼinna iin táʼví ñuʼú ña̱ ndakiʼin na̱ ñanina ña̱ kúú herenciana.
7 Chí Padán ke̱i̱ va̱xii̱ tá ni̱xi̱ʼi̱ ñá Raquel chí Canaán. Soo xa̱ʼa̱ ña̱ xi̱kuma̱níka xa̱a̱ndi̱ chí Efrat, va̱ʼaka sa̱ndúxu̱i̱nñá chí yichi̱ ña̱ ku̱a̱ʼa̱n Efrat, á ña̱ nanítu Belén”.
8 Tasaá xi̱ni ta̱ Israel na̱ se̱ʼe ta̱ José ta ni̱nda̱ka̱tu̱ʼunrara: “¿Ndáana kúú na̱yóʼo?”.
9 Tasaá nda̱kuiin ta̱ José “Se̱ʼi̱ kúúna, na̱ ta̱xi Ndióxi̱ ndaʼíi̱ ñuu yóʼo”. Ta yivára ni̱ka̱ʼa̱nra xíʼinra: “Ixaún ña̱ ma̱ní, sakúyatinna nu̱úi̱ ña̱ va̱ʼa chika̱i̱ bendiciónna”.
10 Soo ta̱ Israel va̱ása níxi̱kivi koto va̱ʼara xa̱ʼa̱ ña̱ xa̱a̱ ku̱chéeníra. Ña̱kán sa̱kúyatin ta̱ José u̱vi̱ saá se̱ʼera nu̱úra, ta ta̱ Israel chi̱tóra* nu̱úna ta nu̱mirana.
11 Tándi̱ʼi ni̱ka̱ʼa̱n ta̱ Israel xíʼin ta̱ José: “Ni va̱ása níndakanixi̱níi̱ ña̱ ndikói̱ kunii̱ yóʼó, soo va̱ʼaní-ini Ndióxi̱ xíʼi̱n chi vitin nda̱a̱ na̱ se̱ʼún xítoi̱”.
12 Tasaá, ta̱ José sa̱kúxíká loʼora na̱ se̱ʼera nu̱ú yivára* ta xi̱kuxítíra nu̱úra.
13 Tándi̱ʼi, ta̱ José ki̱ʼinra u̱vi̱ saá se̱ʼera ta sa̱kúyatinrana nu̱ú ta̱ Israel. Ti̱inra ta̱ Efraín xíʼin ndaʼa̱ kúaʼara ta ka̱nindichirara chí ndaʼa̱ yitin ta̱ Israel, ta xíʼin ndaʼa̱ yitinra ti̱inra ta̱ Manasés ta ka̱nindichirara chí ndaʼa̱ kúaʼa ta̱ Israel.
14 Soo ta̱ Israel chi̱núura ndaʼa̱ kúaʼara xi̱ní ta̱ Efraín ni ta̱ loʼoka xi̱kuu ta̱yóʼo, ta xi̱ní ta̱ Manasés chi̱núura ndaʼa̱ yitinra. Ke̱ʼéra ña̱yóʼo ni xi̱kunda̱a̱-inira xa̱ʼa̱ ta̱ Manasés ña̱ kúúra ta̱ nu̱ú.
15 Tándi̱ʼi, ta̱xira bendición ndaʼa̱ ta̱ José ta ka̱chira:
“Ndióxi̱ ta̱ nda̱a̱, ta̱ xi̱ndasakáʼnu yivái̱ ta̱ Isaacxíʼin xi̱íi̱ ta̱ Abrahán,
Ndióxi̱ ta̱ nda̱a̱, ta̱ xi̱ndaa yi̱ʼi̱ ta ndáara yi̱ʼi̱ nda̱a̱ vitin,
16 ángel ta̱ sa̱kǎku yi̱ʼi̱ nu̱ú ña̱ va̱ása va̱ʼa
ná taxi bendición ndaʼa̱ na̱ va̱lí yóʼo.Ná kuniʼina ki̱víi̱, ta saátu ná kuniʼina ki̱vi̱
yivái̱ ta̱ Isaac xíʼin xi̱íi̱ ta̱ Abrahán,
ku̱a̱ʼání ná xa̱a̱na koona,
ña̱ va̱ʼa nduuna iin ñuu káʼnuní nu̱ú ñuʼú yóʼo”.
17 Soo ta̱ José xi̱nira ña̱ chi̱núu yivára ndaʼa̱ kúaʼara xi̱ní ta̱ Efraín ta kǒo níkutóora ña̱yóʼo. Xa̱ʼa̱ ña̱kán xi̱kuni̱ra sakútaʼara ndaʼa̱ yivára xi̱ní ta̱ Efraín ta ndachinúuraña xi̱ní ta̱ Manasés.
18 Ta̱ José ni̱ka̱ʼa̱nra xíʼin yivára: “Su̱ví saá kúúña yivá, ta̱yóʼova kúú ta̱ nu̱ú ka̱ku. Chinúu ndaʼa̱ kúaʼún xi̱ní ta̱yóʼo”.
19 Soo va̱ása níxiin yivára keʼéra ña̱yóʼo ta ni̱ka̱ʼa̱nra xíʼinra “Kúnda̱a̱va-inii̱ yivá, kúnda̱a̱va-inii̱. Saátu ta̱yóʼo xa̱a̱ra koora iin ñuu ña̱ ndáyáʼviní. Soo ñanira ta̱ loʼo kúú ta̱ kundayáʼviníka, ta na̱ se̱ʼera ku̱a̱ʼání xa̱a̱na koona ta xa̱a̱na nduuna ñuu náʼnu”.
20 Chi̱kaa̱kara bendiciónna ki̱vi̱ saá, ta ka̱chira:
“Ná ka̱ʼa̱n na̱ se̱ʼe ta̱ Israel xa̱ʼúntá ná chikaa̱na bendición ta kachina:
‘Ndióxi̱ ná keʼéra xíʼún nda̱a̱ táki̱ʼva ke̱ʼéra xíʼin ta̱ Efraínta saátu xíʼin ta̱ Manasés’”.
Ña̱kán siʼnaka ta̱ Efraín xi̱kanindichira nu̱ú ta̱ Manasés tá xi̱taxira bendición ndaʼa̱na.
21 Tándi̱ʼi, ta̱ Israel ni̱ka̱ʼa̱nra xíʼin ta̱ José: “Koto, xa̱a̱ ku̱yatin kuvii̱, soo Ndióxi̱ koovara xíʼinndó ta chindeétáʼanra xíʼinndó ña̱ ndikóndó nu̱ú ñuʼú na̱ táʼanndó na̱ xi̱ndoo xi̱naʼá.
22 Ku̱a̱ʼáka loʼo ñuʼú taxii̱ ndaʼa̱ yóʼó nu̱úka ña̱ taxii̱ ndaʼa̱ na̱ ñaniún, ñuʼú yóʼo kúú ña̱ ki̱ndai̱ ndaʼa̱ na̱ amorreo tá xi̱niñúʼi̱ espada xíʼin kuxu̱n* ña̱ ka̱nitáʼi̱n xíʼinna”.
Nota
^ Inka variante “xi̱kundúʼura”.
^ Á “ta̱xira beso”. Inka variante “tu̱viyuʼúra”.
^ Tu̱ʼun ña̱ ni̱ka̱ʼyi̱ña káchiña “nu̱ú koʼndo yivára”.
^ Inka variante “koxi̱”.
