Jonás 3:1-10
3 Tasaá tuku ni̱ka̱ʼa̱n Jehová xíʼin ta̱ Jonás ta ka̱chira:
2 “Kúáʼan iin ñuu ña̱ káʼnuní ña̱ naní Nínive, ta natúʼún xíʼinna xa̱ʼa̱ ña̱ ka̱ʼi̱n xíʼún”.
3 Tasaá ke̱ʼé ta̱ Jonás ña̱ ni̱ka̱ʼa̱n Jehová xíʼinra ta nda̱kiʼinra ku̱a̱ʼa̱nra chí Nínive. Soo ñuu Nínive, iin ñuu ña̱ káʼnuní xi̱kuuña; saáchi u̱ni̱ví ki̱vi̱ xi̱niñúʼu kaka xáʼána ña̱ va̱ʼa ka̱va̱ níína sa̱tá ñuu yóʼo.
4 Tasaá, ta̱ Jonás ni̱ki̱ʼvira ñuu yóʼo ta iníí ki̱vi̱ ni̱xi̱kara; ta xi̱kaʼa̱nra ña̱yóʼo: “Ndáa 40 kuití ki̱vi̱ kúma̱ní ta ndiʼi-xa̱ʼa̱ ñuu Nínive”.
5 Tá xi̱niso̱ʼo na̱ ñuu Nínive ña̱yóʼo, ki̱xáʼana kándíxana Ndióxi̱. Ta ki̱ndoona ña̱ va̱ása kuxuna iníí ki̱vi̱* ta nda̱kundixina ti̱ko̱to̱ ndayí,* ndiʼina ke̱ʼé ña̱yóʼo, nda̱a̱ na̱ va̱lí iinsaá nda̱a̱ na̱ chée.
6 Tá níndúʼu ta̱ rey ñuu Nínive nu̱ú tayi̱ra* na̱túʼunna xíʼinra xa̱ʼa̱ ña̱ ni̱ka̱ʼa̱n ta̱ Jonás, ta nda̱kundichira, ta̱vára ti̱ko̱to̱ va̱ʼa ña̱ ndíxira* ta nda̱kundixira ti̱ko̱to̱ ndayí ta xi̱kundúʼura nu̱ú ya̱a̱.*
7 Ta saátu xa̱ʼndara chiñu ña̱ ná ka̱ʼa̱nna ña̱yóʼo xíʼin ndiʼi na̱ íyo ñuu Nínive:“Ta̱ rey xíʼin na̱ chíñu na̱ káchíñu nu̱úra ni̱ka̱ʼa̱nna ña̱ nda̱a̱ ni iin na̱ yiví va̱ása xíniñúʼu kuxuna nda̱a̱ ni iin ña̱ʼa, ta ni va̱ása xíniñúʼu koʼona ti̱kui̱í, ni kití sa̱na̱na va̱ása xíniñúʼu kixáʼanrí* ta saátu va̱ása xíniñúʼu koʼorí ti̱kui̱í.
8 Ná ndakundixina ti̱ko̱to̱ ndayí ta saátu kití sa̱na̱na. Xíʼin ndinuʼu-inina ná ka̱ʼa̱n-ndáʼvina xíʼin Ndióxi̱ ña̱ ná koo káʼnu-inira xa̱ʼa̱na, ná ndandikó-inina xa̱ʼa̱ ndiʼi ña̱ va̱ása va̱ʼa kéʼéna ta ná va̱ása ixandi̱va̱ʼakana xíʼin inkana.
9 Sana nasama Ndióxi̱ ta̱ nda̱a̱ ña̱ ndákanixi̱níra keʼéra xíʼinyó, tasaá va̱ása sa̱a̱kara xíʼinyó ta va̱ása kuviyó”.
10 Tá xi̱ni Ndióxi̱ ta̱ nda̱a̱ ña̱ sa̱ndákoo na̱ ñuu Nínive ña̱ va̱ása va̱ʼa xi̱keʼéna, na̱samara ña̱ nda̱kanixi̱níra keʼéra xíʼinna ta kǒo níchindaʼákara tu̱ndóʼo nu̱úna.
Nota
^ Á sana “va̱ása níxi̱xixina ku̱a̱ʼá ki̱vi̱”.
^ Inka variante “ti̱ko̱to̱ ndeé”, “ti̱ko̱to̱ kúkun”. Koto glosario, ti̱ko̱to̱ ndayí.
^ Á “nu̱ú tayi̱ nu̱ú xáʼndachíñura”.
^ Á “ti̱ko̱to̱ ña̱ ndíxira ña̱ kúúra rey”.
^ Inka variante “ta xi̱koora nu̱ú ya̱a̱”.
^ Inka variante “kuxurí”.
