Josué 1:1-18
1 Tá ni̱xi̱ʼi̱ ta̱ Moisés ta̱ xi̱kachíñu nu̱ú Jehová, Jehová ni̱ka̱ʼa̱nra xíʼin se̱ʼe ta̱ Nun ta̱ xi̱naní Josué,* ta̱ xi̱chindeétáʼan xíʼin ta̱ Moisés:
2 “Ta̱ Moisés ta̱ xi̱kachíñu nu̱úi̱ xa̱a̱ ni̱xi̱ʼi̱vara. Ña̱kán xa̱a̱ koo tu̱ʼvaún ña̱ va̱ʼa ya̱ʼún yu̱ta Jordán xíʼin ndiʼi na̱ ñuu Israel, ta ki̱ʼvindó nu̱ú ñuʼú ña̱ taxii̱ ndaʼa̱ndó.
3 Nda̱a̱ ndáaka nu̱ú ná xa̱a̱ndó taxii̱ ñuʼú kán ndaʼa̱ndó, chi saá kúú ña̱ ki̱ndoi̱ xíʼin ta̱ Moisés.
4 Ñuʼú ña̱ taxii̱ ndaʼa̱ndó kixáʼaña chí nu̱ú ñuʼú yi̱chí ta xa̱a̱ña nda̱a̱ chí Líbano, ta saátu nda̱a̱ chí yu̱ta káʼnu tá naní Éufrates (iníísaá ñuʼú nu̱ú ndóo na̱ hitita) ta chí oeste* xa̱a̱ña nda̱a̱ mar Grande.*
5 Ndiʼi tiempo ña̱ ná kutakún, kǒo nda̱a̱ ni iin na̱ kuchiñu kanitáʼan xíʼún. Nda̱a̱ táki̱ʼva chi̱ndeétáʼi̱n xíʼin ta̱ Moisés saátu chindeétáʼi̱n xíʼin yóʼóva. Va̱ása sandákoondaʼíi̱ yóʼó ta ni va̱ása kuxíkái̱ nu̱ún.
6 Ndakú koo iniún ta va̱ása yi̱ʼvíún, saáchi yóʼó kúú ta̱ kuniʼi yichi̱ nu̱ú na̱ ñuu yóʼo ña̱ va̱ʼa ndakiʼinna ñuʼú ña̱ ki̱ndoi̱ taxii̱ ndaʼa̱ na̱ táʼanna na̱ xi̱ndoo xi̱naʼá.
7 ”Ña̱kán ndakú koo iniún, va̱ása yi̱ʼvíún ta viíní kundiku̱ún ndiʼi Ley ña̱ ni̱ka̱ʼa̱n ta̱ Moisés xíʼún, ta̱ xi̱kachíñu nu̱úi̱. Ndáyáʼviní ña̱ ná keʼún ña̱ káʼa̱n ña̱yóʼo chi saá kúú ña̱ viíní koo ña̱ ndaka̱xiún keʼún ni nda̱a̱ ndáaka nu̱ú ná ku̱ʼún.
8 Va̱ása xíniñúʼu sandákoún ña̱ kaʼviún ña̱ káʼa̱n Ley yóʼo. Ñuú xíʼin káʼñu* xíniñúʼu kaʼviúnña ta ndakanixi̱níún xa̱ʼa̱ ña̱ káʼa̱nña, ña̱ va̱ʼa viíní keʼún ndiʼi ña̱ ni̱ka̱ʼyi̱ nu̱úña, saáchi saá kúú ña̱ va̱ʼaní koo ndiʼi ña̱ keʼún ta na̱ʼún ña̱ kúúmiíún ña̱ ndíchi.
9 Yi̱ʼi̱ kúú ta̱ káʼa̱n xíʼún ña̱ ndakú koo iniún ta va̱ása yi̱ʼvíún. Ña̱kán va̱ása yi̱ʼvíún. Saáchi yi̱ʼi̱ Jehová, ta̱ kúú Ndióxi̱ miíún chindeétáʼanvai̱ xíʼún ni nda̱a̱ ndáaka nu̱ú ná ku̱ʼún”.
10 Tasaá ta̱ Josué ni̱ka̱ʼa̱nra xíʼin na̱ kíʼin kuenta xíʼin na̱ ñuu kán:
11 “Kúáʼanndó chí nu̱ú ndóo na̱ ñuu ta ka̱ʼa̱nndó ña̱yóʼo xíʼinna: ‘Xa̱a̱ ná koo tu̱ʼva ña̱ʼa ña̱ kuniñúʼundó, saáchi ti̱xin ña̱ u̱ni̱ ki̱vi̱ ya̱ʼayó yu̱ta Jordán, ña̱ va̱ʼa ki̱ʼviyó nu̱ú ñuʼú ña̱ ni̱ka̱ʼa̱n Jehová Ndióxi̱yó taxira ndaʼa̱yó ta ndakiʼinyóña ña̱ kooña kuentayó’”.
12 Soo ta̱ Josué ni̱ka̱ʼa̱nra ña̱yóʼo xíʼin na̱ tribu ta̱ Rubén, na̱ tribu ta̱ Gad ta saátu iin táʼví na̱ tribu ta̱ Manasés:
13 “Ndakaʼánndó chi ta̱ Moisés ta̱ xi̱kachíñu nu̱ú Jehová ni̱ka̱ʼa̱nra ña̱yóʼo xíʼinndó: ‘Jehová Ndióxi̱yó xa̱a̱ ta̱xira ñuʼú yóʼo ndaʼa̱ndó ña̱ va̱ʼa koondó nu̱úña.
14 Ná síʼindó xíʼin na̱ se̱ʼendó kindo̱ona koona nu̱ú ñuʼú ña̱ ta̱xi ta̱ Moisés ndaʼa̱ndó chí táʼví yu̱ta Jordán yóʼo ta saátu kití sa̱na̱ndó, soo ndiʼi ndóʼó na̱ xíni̱ní kanitáʼan kúú na̱ kunúu ku̱ʼu̱n nu̱ú na̱ ñanindó. Ndóʼó kúú na̱ chindeétáʼan xíʼinna
15 nda̱a̱ ná taxi Jehová nu̱ú kundoona nda̱a̱ táki̱ʼva ke̱ʼéra xíʼin ndóʼó, ta saátu na̱yóʼo ná ndakiʼinna ñuʼú ña̱ ni̱ka̱ʼa̱n Jehová Ndióxi̱ taxira ndaʼa̱na. Tasaá kúú ña̱ ndikóndó nu̱ú ñuʼú ña̱ xa̱a̱ nda̱kiʼinndó ña̱ va̱ʼa koondó nu̱úña, ñuʼú ña̱ ta̱xi ta̱ Moisés ta̱ xi̱kachíñu nu̱ú Jehová ndaʼa̱ndó, chí táʼví este* yu̱ta Jordán’”.
16 Ta na̱yóʼo nda̱kuiinna yuʼú ta̱ Josué ta ka̱china: “Keʼévandi̱ ndiʼi ña̱ ni̱ka̱ʼún xíʼinndi̱ ta ku̱ʼu̱nvandi̱ nda̱a̱ ndáaka nu̱ú ná chindaʼún ndi̱ʼi̱.
17 Kandíxavandi̱ ndiʼi ña̱ ni̱ka̱ʼún, nda̱a̱ táki̱ʼva ka̱ndíxandi̱ ndiʼi ña̱ ni̱ka̱ʼa̱n ta̱ Moisés. Ta mií Jehová Ndióxi̱yó ná chindeétáʼan xíʼún nda̱a̱ táki̱ʼva chi̱ndeétáʼanra xíʼin ta̱ Moisés.
18 Nda̱a̱ ndáaka na̱ ta̱a na̱ kǒo xíín kandíxa chiñu ña̱ xáʼndaún, xíniñúʼu kuvina. Ña̱kán xíniñúʼu ndakú koo iniún ta va̱ása yi̱ʼvíún”.
Nota
^ Á “Jehosúa”, ña̱ kúni̱ kachi ‘Jehová kúú ta̱ sáka̱ku’.
^ Á “nu̱ú kíʼvi ñu̱ʼu”.
^ Ña̱yóʼo káʼa̱nña xa̱ʼa̱, mar Mediterráneo.
^ Inka variante “Ndiví ñuú”.
^ Á “nu̱ú kíta ñu̱ʼu”.
