Levítico 24:1-23
24 Jehová ni̱ka̱ʼa̱n tukura xíʼin ta̱ Moisés, ta ka̱chira:
2 “Ka̱ʼa̱n xíʼin na̱ israelita ña̱ ná taxina aceite tá oliva tá va̱ʼa, tá kuniñúʼuna xíʼin lámpara, tasaá va̱ása nda̱ʼva̱ña.
3 Ta̱ Aarón xíniñúʼu kiʼinra kuenta xíʼin lámpara ña̱ ndíta chí sa̱tá nu̱ú tíkaa cortina, chí nu̱ú ndíkaa̱ tú Arca ini tabernáculo, kiʼinra kuenta xíʼinña ña̱ ná kutuu̱nña nu̱ú Jehová nani tá xi̱kuaá iinsaá nda̱a̱ xi̱ta̱a̱n.* Ña̱yóʼo kúú ley ña̱ xíniñúʼu kundiku̱nndó ndiʼi tiempo, miíndó ta saátu se̱ʼendó na̱ kaku chí nu̱únínu.
4 Ta̱ Aarón xíniñúʼu kiʼinra kuenta xíʼin lámpara ña̱ ndóso nu̱ú candelabro ña̱ ku̱vaʼa xíʼin oro ña̱ va̱ʼa, tasaá va̱ása nda̱ʼva̱ña nu̱ú Jehová.
5 ”Kiʼún harina ña̱ va̱ʼa, ta xíʼin ña̱yóʼo keʼún 12 si̱ta̱váʼa ña̱ ti̱ku̱i̱ta̱,* ki̱ʼva u̱vi̱ kilo* ña̱ harina kuniñúʼún ña̱ ixava̱ʼún iin tá iin si̱ta̱váʼa yóʼo.
6 Sakúisotáʼún si̱ta̱váʼa yóʼo, i̱ñu̱ña iin táʼví ta i̱ñu̱ña inka táʼví, chindósoúnña nu̱ú mesa tú oro tú níndichi nu̱ú Jehová.
7 Xíniñúʼu sakáún olíbano* tá va̱ʼa sa̱tá u̱vi̱ saá koʼndo si̱ta̱váʼa yóʼo, tasaá kivi ndakaʼán Ndióxi̱ xa̱ʼa̱ si̱ta̱váʼa ña̱ ni̱so̱kóna,* ña̱yóʼo kúú ña̱ kaʼmina ta so̱kóna nu̱ú Jehová.
8 Ndiʼi sábado xíniñúʼu chindósora si̱ta̱váʼa yóʼo nu̱ú Jehová. Ña̱yóʼo kúú iin trato ña̱ chíka̱i̱ xíʼin na̱ israelita ta kooña ndiʼi tiempo.
9 Kuenta ta̱ Aarón xíʼin na̱ se̱ʼera koo ña̱yóʼo ta xíniñúʼu kuxunaña nu̱ú iin lugar ña̱ yi̱i̱, saáchi iin ña̱ yi̱i̱ní ña̱ sóko̱na ta xáʼmina nu̱ú Jehová kúúña. Ña̱yóʼo kúú iin ley ña̱ xíniñúʼu kundiku̱nna ndiʼi tiempo”.
10 Ta xíʼin na̱ israelita ni̱xi̱yo iin ta̱ loʼo se̱ʼe iin ñá israelita ta yivára ta̱ egipcio xi̱kuura, ta̱yóʼo ki̱xáʼara kánitáʼanra xíʼin iin ta̱ israelita chí nu̱ú xi̱ndoona.
11 Ta̱ se̱ʼe ñá israelita ki̱xáʼara káʼa̱n-ndi̱va̱ʼara ta ki̱xáʼara sákuisochiʼñara* ki̱vi̱ Ndióxi̱,* ña̱kán ni̱xa̱ʼa̱nna xíʼinra nu̱ú ta̱ Moisés. Siʼíra xi̱naníñá Selomit ta ñáyóʼo xi̱kuuñá se̱ʼe ta̱ Dibrí ta̱ ke̱e ti̱xin tribu ta̱ Dan.
12 Tasaá nda̱kasinara, nda̱a̱ ná kunda̱a̱-inina ndáaña ka̱ʼa̱n Jehová.
13 Tasaá ni̱ka̱ʼa̱n Jehová xíʼin ta̱ Moisés:
14 “Tavá ta̱ sa̱kúisochiʼña ki̱víi̱, ta ndiʼi na̱ xi̱niso̱ʼo ña̱ sa̱kúisochiʼñara ki̱víi̱ xíniñúʼu chindósona ndaʼa̱na xi̱níra, tándi̱ʼi, na̱ ñuu kuunna yu̱u̱ra.
15 Xa̱ʼa̱ ña̱kán xíniñúʼu ka̱ʼún ña̱yóʼo xíʼin na̱ ñuu Israel: ‘Tá iin na̱ yiví sákuisochiʼñana Ndióxi̱na, ndakuiinna xa̱ʼa̱ ku̱a̱china.
16 Ña̱kán, ndiʼi na̱ ná ka̱ʼa̱n-ndi̱va̱ʼa xa̱ʼa̱ ki̱vi̱ Jehová, xíniñúʼu kuvina. Ndiʼi na̱ ñuu xíniñúʼu kuunna yu̱u̱ na̱yóʼo, ni kúúna na̱ ke̱e inka ñuu ta ki̱xaa̱na íyona xíʼinndó á ni kúúna na̱ ñuu miíndó, xíniñúʼu kuvina xa̱ʼa̱ ña̱ ni̱ka̱ʼa̱n-ndi̱va̱ʼana xa̱ʼa̱ ki̱vi̱ Ndióxi̱.
17 ”’Tá iin ta̱a xáʼníra iin na̱ yiví, xíniñúʼu kuvira.
18 Ndiʼi na̱ sátukue̱ʼe̱ á na̱ xáʼní iin kití xíniñúʼu ndacháʼvina xa̱ʼa̱rí, xíniñúʼu ndataxina iin kití xa̱ʼa̱ tí sa̱túkue̱ʼe̱na á tí xa̱ʼnína.
19 Tá iin ta̱a sa̱túkue̱ʼe̱ra iin na̱ yiví, nda̱a̱ táki̱ʼva ke̱ʼéra xíʼin na̱kán saá xíniñúʼu keʼéna xíʼinra.
20 Tá ni̱xa̱ʼnu̱ra inkana, tá ka̱nirana ta sa̱túkue̱ʼe̱ra nduchúnu̱úna á tá sa̱ndákavara nu̱ʼuna, saátu xíniñúʼu keʼéna xíʼin ta̱yóʼova.
21 Na̱ ná satúkue̱ʼe̱ iin kití ta ná kuvirí xíniñúʼu ndacháʼvina xa̱ʼa̱rí, soo na̱ ná satúkue̱ʼe̱ iin na̱ yiví ta ná kuvina, xíniñúʼu kuvitu na̱yóʼova.
22 ”’Ni na̱ inka ñuu na̱ ki̱xaa̱ ndóo xíʼinndó kúúna á ni na̱ ñuu miíndó kúúna, xíniñúʼu kundiku̱nndó ley yóʼo xíʼinna, saáchi yi̱ʼi̱ kúú Jehová Ndióxi̱ndó’”.
23 Tasaá ta̱ Moisés ni̱ka̱ʼa̱nra xíʼin na̱ israelita, ta na̱yóʼo ta̱vána ta̱ ta̱a ta̱ sa̱kúisochiʼña ki̱vi̱ Ndióxi̱ ta ku̱unna yu̱u̱ra. Ta na̱ israelita ke̱ʼéna nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.
Nota
^ Inka variante “ñaʼa”.
^ Inka variante “ti̱vi̱”, “ti̱ka̱ta̱”, “chi̱ka̱ta̱”.
^ Á “u̱vi̱ táʼví ña̱ efá”. Koto apéndice B14.
^ Ña̱yóʼo kúúña iin xu̱xa yaa ña̱ xáʼa̱n támi.
^ Inka variante “ta̱xina”.
^ Inka variante “chíkaa̱ra chiʼña”, “sáta̱vi̱chiʼñara”.
^ Ña̱yóʼo káʼa̱nña xa̱ʼa̱ ki̱vi̱ Jehová, nda̱a̱ táki̱ʼva káʼa̱n versículo 15 xíʼin 16.
