Levítico 7:1-38
7 ”’Ña̱yóʼo kúú iin ley ña̱ xíniñúʼu kundiku̱nra tá sóko̱ra ña̱ʼa xa̱ʼa̱ na̱ ke̱ʼé ña̱ va̱ása va̱ʼa. Iin ña̱ yi̱i̱ní kúú ña̱yóʼo.
2 Kití tí sóko̱na xa̱ʼa̱ ña̱ ke̱ʼéna ña̱ va̱ása va̱ʼa xíniñúʼu kaʼnínarí nu̱ú xáʼnína kití tí xáʼmina* ña̱ sóko̱narí, ta ko̱so̱yávána* ni̱i̱rí iníí sa̱tá altar.
3 So̱kóra* ndiʼi xa̱ʼanrí:* xa̱ʼan ña̱ íyo sa̱tá si̱ʼma̱rí,* xa̱ʼan ña̱ íyo sa̱tá xitirí,
4 ta saátu u̱vi̱ saá nduchu̱ inirí xíʼin xa̱ʼan ña̱ íyo yatin sa̱tárí. Tá ná tavára nduchu̱ inirí saátu tavára xa̱ʼan ña̱ íyo sa̱ta̱xáʼarí.
5 Ta, ta̱ su̱tu̱ kaʼmira ndiʼi ña̱yóʼo nu̱ú altar nda̱a̱ táki̱ʼva xáʼmira ña̱ sóko̱ra nu̱ú Jehová. Iin ña̱ sóko̱ra xa̱ʼa̱ ña̱ ke̱ʼéna ña̱ va̱ása va̱ʼa kúúña.
6 Ta ndiʼi na̱ ta̱a na̱ kúú su̱tu̱ xíniñúʼu kuxu ña̱yóʼo. Ta xíniñúʼu kuxunaña iin lugar ña̱ yi̱i̱, saáchi iin ña̱ yi̱i̱ní kúú ña̱yóʼo.
7 Ley yóʼo kúú ña̱ xíniñúʼu kundiku̱nna xíʼin ña̱ sóko̱na xa̱ʼa̱ ku̱a̱china ta saátu ña̱ sóko̱na xa̱ʼa̱ ña̱ ke̱ʼéna iin ña̱ va̱ása va̱ʼa. Ku̱ñu kití tí so̱kóna kooña kuenta ta̱ su̱tu̱ ta̱ ná so̱kórí xa̱ʼa̱ ku̱a̱china.
8 ”’Tá ná kaʼmi ta̱ su̱tu̱ iin kití ña̱ so̱kórarí xa̱ʼa̱ iin na̱ yiví, xíniñúʼu kindo̱ora xíʼin ñii̱ tíyóʼo.
9 ”’Ndiʼi ña̱ ná so̱kóna ña̱ ku̱vaʼa xíʼin harina ini horno,* ini iin cazuela á nu̱ú iin xi̱yo̱, kooña kuenta ta̱ su̱tu̱ ta̱ ná so̱kóña.
10 Soo ndiʼi harina ña̱ ná so̱kóna ña̱ nda̱saka̱ xíʼin aceite á ña̱ kǒo aceite ñúʼu xíʼin, kooña kuenta ndiʼi na̱ se̱ʼe ta̱ Aarón; inkáchi ndata̱ʼví ña̱ ndakiʼin ndiʼi na̱yóʼo.
11 ”’Ña̱yóʼo kúú iin ley xa̱ʼa̱ ña̱ so̱kóna nu̱ú Jehová ña̱ ndakutáʼan viína xíʼinra.
12 Tá kúni̱na so̱kónaña xa̱ʼa̱ ña̱ kúni̱na taxina tíxa̱ʼvi ndaʼa̱ Ndióxi̱, tá ná so̱kóna ña̱yóʼo saátu xíniñúʼu so̱kóna si̱ta̱váʼa ña̱ ti̱ku̱i̱ta̱* ña̱ kǒo yuxa̱n iyá* ñúʼu xíʼin ña̱ ku̱vaʼa xíʼin aceite, saátu galleta yásín* ña̱ kǒo yuxa̱n iyá ñúʼu xíʼin ña̱ ka̱a aceite sa̱tá, xíʼin si̱ta̱váʼa ña̱ ti̱ku̱i̱ta̱ ña̱ ku̱vaʼa xíʼin harina ña̱ va̱ʼaní ña̱ viíní nda̱saka̱ ta kúúmiíña aceite.
13 Tá ná taxina ña̱yóʼo saátu xíniñúʼu taxina si̱ta̱váʼa ña̱ ti̱ku̱i̱ta̱ ña̱ kúúmií yuxa̱n iyá, saátu taxina ña̱ sóko̱na ña̱ taxina tíxa̱ʼvi ndaʼa̱ Ndióxi̱ ña̱ va̱ʼa ndakutáʼan viína xíʼinra.
14 Tá ná so̱kóna ña̱yóʼo saátu xíniñúʼu taxina iin tá iin nu̱ú si̱ta̱váʼa ña̱ kooña ña̱ yi̱i̱ nu̱ú Jehová. Ña̱yóʼo kooña kuenta ta̱ su̱tu̱ ta̱ ná kundaa ni̱i̱ kití tí ni̱so̱kóna xa̱ʼa̱ ña̱ ndakutáʼan viína xíʼin Ndióxi̱.
15 Ku̱ñu kití tí sóko̱na ña̱ táxina tíxa̱ʼvi ndaʼa̱ Ndióxi̱ ña̱ va̱ʼa ndakutáʼan viína xíʼinra, xíniñúʼu kuxunaña mií ki̱vi̱ ña̱ sóko̱naña. Va̱ása xíniñúʼu ndataánva̱ʼanaña* nda̱a̱ inka ki̱vi̱.
16 ”’Tá sóko̱na iin ña̱ʼa xa̱ʼa̱ ña̱ ki̱ndoona keʼéna iin ña̱ʼa nu̱ú Ndióxi̱ á xa̱ʼa̱ ña̱ kúni̱ miína sóko̱naña, xíniñúʼu kuxuna ña̱ níʼina ku̱a̱ʼa̱n xíʼinna mií ki̱vi̱ ña̱ sóko̱naña, ta ña̱ ki̱ndoo kivitu kuxunaña inka ki̱vi̱.
17 Soo ki̱vi̱ u̱ni̱ xíniñúʼu kaʼmina ku̱ñu ña̱ ni̱so̱kóna ña̱ ki̱ndoo.
18 Soo tá ná kuxuna ku̱ñu kití tí ni̱so̱kóna ña̱ va̱ʼa ndakutáʼan viína xíʼin Ndióxi̱ ki̱vi̱ u̱ni̱, va̱ása kandíxa Ndióxi̱ ndakiʼinra ña̱yóʼo. Va̱ása kundayáʼvi ña̱ ni̱so̱kóna yóʼo. Iin ña̱ yaku̱a̱ kúú ña̱yóʼo. Ta na̱ ná kuxu ña̱yóʼo ndakuiinna xa̱ʼa̱ ku̱a̱china.
19 Tá ná tu̱ndaa ku̱ñu yóʼo iin ña̱ʼa ña̱ yaku̱a̱* va̱ása xíniñúʼu kuxunaña. Xíniñúʼu kaʼminaña. Na̱ kǒo kéʼé ña̱ yaku̱a̱ kivi kuxuna ku̱ñu ña̱ va̱ása yaku̱a̱.*
20 ”’Soo tá ná kuxu nda̱a̱ ndáaka na̱ kéʼé ña̱ yaku̱a̱ ku̱ñu kití tí ni̱so̱kóna ña̱ ndakutáʼan viína xíʼin Ndióxi̱ ña̱ kúú kuenta Jehová, xíniñúʼu kuvina.
21 Tá iin na̱ yiví ná tiinna iin na̱ yiví na̱ yaku̱a̱ á iin kití tí yaku̱a̱ á nda̱a̱ ndáaka ña̱ʼa ña̱ kini ña̱ yaku̱a̱ ta xíxina ku̱ñu kití tí ni̱so̱kóna ña̱ ndakutáʼan viína xíʼin Ndióxi̱ ña̱ kúú kuenta Jehová, xíniñúʼu kuvina’”.
22 Ta ni̱ka̱ʼa̱nka Jehová xíʼin ta̱ Moisés, ta ka̱chira:
23 “Ña̱yóʼo ka̱ʼún xíʼin na̱ israelita: ‘Va̱ása kuxundó xa̱ʼan tí si̱ndi̱ki̱, ni xa̱ʼan tí ndikachi* che̱e tí yúta̱,* ni xa̱ʼan tí ti̱xúʼú.*
24 Tá nda̱ni̱ʼíndó iin kití tí ni̱xi̱ʼi̱ á tí xa̱ʼní inka kití, kivi kuniñúʼundó xa̱ʼan tíyóʼo ña̱ keʼéndó nda̱a̱ ndáaka ña̱ʼa soo va̱ása kivi kuxundóña.
25 Nda̱a̱ ndáaka na̱ ná kuxu xa̱ʼan kití tí xáʼmina* tí sóko̱na nu̱ú Jehová, xíniñúʼu kuvina.
26 ”’Ni nda̱a̱ ndáaka nu̱ú ndóondó va̱ása kuxundó ni̱i̱ tí saa, ni ni̱i̱ inkaka kití.
27 Nda̱a̱ ndáaka na̱ ná kuxu ni̱i̱ xíniñúʼu kuvina’”.
28 Ta ni̱ka̱ʼa̱nka Jehová xíʼin ta̱ Moisés:
29 “Ña̱yóʼo ka̱ʼún xíʼin na̱ israelita: ‘Nda̱a̱ ndáaka na̱ ná so̱kó iin kití nu̱ú Jehová ña̱ va̱ʼa ndakutáʼan viína xíʼinra, xíniñúʼu taxina iin táʼví tíyóʼo ndaʼa̱ Jehová.
30 Xíniñúʼu kuniʼina xa̱ʼan xíʼin kándíkarí ña̱ va̱ʼa kaʼminaña ta so̱kónaña nu̱ú Jehová. Xíniñúʼu sakúikónaña* ña̱ va̱ʼa so̱kónaña nu̱ú Jehová.
31 Ta̱ su̱tu̱ kúú ta̱ kaʼmi xa̱ʼan nu̱ú altar ña̱ va̱ʼa kana yi̱ʼma̱ña, soo kándíkarí xa̱a̱ña kooña kuenta ta̱ Aarón xíʼin na̱ se̱ʼera.
32 ”’Xa̱ʼa̱ kúaʼa kití tí sóko̱ndó ña̱ va̱ʼa ndakutáʼan viíndó xíʼin Ndióxi̱ kúú ña̱ taxindó ndaʼa̱ ta̱ su̱tu̱ ña̱ kooña kuentara chi ña̱ yi̱i̱ kúú ña̱yóʼo.
33 Se̱ʼe ta̱ Aarón ta̱ ná so̱kó ni̱i̱ xíʼin xa̱ʼan kití tí sóko̱na ña̱ va̱ʼa ndakutáʼan viína xíʼin Ndióxi̱, ndakiʼinra xa̱ʼa̱ kúaʼa tíyóʼo.
34 Saáchi kuenta yi̱ʼi̱ kúú kándíkarí ña̱ sákuikóna ña̱ sóko̱na nu̱úi̱, ta saátu xa̱ʼa̱rí ña̱ yi̱i̱ ña̱ sóko̱ na̱ israelita ña̱ va̱ʼa ndakutáʼan viína xíʼi̱n, ta táxii̱ña ndaʼa̱ ta̱ Aarón xíʼin na̱ se̱ʼera ña̱ kooña kuentana, ta ña̱yóʼo koo iin ley ña̱ kundiku̱n na̱ israelita ndiʼi tiempo.
35 ”’Nu̱ú ndiʼi ña̱ xi̱xaʼmina ña̱ xi̱sokóna nu̱ú Jehová, iin táʼví ña̱yóʼo xi̱taxina ndaʼa̱ ta̱ su̱tu̱ Aarón xíʼin na̱ se̱ʼera. Ña̱yóʼo kúú ña̱ ku̱u ki̱vi̱ ña̱ nda̱kaxinrana ña̱ koona su̱tu̱ nu̱ú Jehová.
36 Jehová ni̱ka̱ʼa̱nra ña̱ taxi na̱ israelita iin táʼví ña̱yóʼo ndaʼa̱ na̱ su̱tu̱ tá nda̱kaxinrana. Ña̱yóʼo kúú iin ley ña̱ kundiku̱n miína xíʼin na̱ se̱ʼena na̱ kaku chí nu̱únínu ndiʼi tiempo”’.
37 Ña̱yóʼo kúú ley ña̱ kundiku̱nna tá ná kaʼmina kití* tí so̱kóna nu̱ú Ndióxi̱, tá ná so̱kóna harina, tá ná so̱kóna ña̱ʼa xa̱ʼa̱ ku̱a̱china, tá ná so̱kóna ña̱ʼa xa̱ʼa̱ ña̱ ke̱ʼéna ña̱ va̱ása va̱ʼa, tá ná so̱kóna kití ña̱ ndaka̱xinna na̱ koo su̱tu̱, ta saátu tá ná so̱kóna kití ña̱ va̱ʼa ndakutáʼan viína xíʼin Ndióxi̱,
38 nda̱a̱ táki̱ʼva ni̱ka̱ʼa̱n Jehová xíʼin ta̱ Moisés chí yuku̱ Sinaí tá ni̱ka̱ʼa̱nra xíʼin na̱ israelita ña̱ ná so̱kóna ña̱ʼa nu̱ú Jehová chí ñuʼú yi̱chí ña̱ Sinaí.
Nota
^ Koto glosario, kití tí xi̱sokóna ta xi̱xaʼminarí.
^ Inka variante “kuiʼnindaana”, “koʼnindaana”.
^ Inka variante “Taxira”.
^ Inka variante “sa̱ʼanrí”.
^ Inka variante “ndoʼórí”.
^ Á “xi̱tu̱n”.
^ Inka variante “yáxín”.
^ Á “levadura”.
^ Inka variante “ti̱vi̱”, “ti̱ka̱ta̱”, “chi̱ka̱ta̱”.
^ Inka variante “ndachiva̱ʼanaña”.
^ Koto glosario, ña̱ yaku̱a̱.
^ Koto glosario, ña̱ va̱ása yaku̱a̱.
^ Inka variante “levo”.
^ Inka variante “ítíá”.
^ Inka variante “ti̱súʼu̱”.
^ Koto glosario, kití tí xi̱sokóna ta xi̱xaʼminarí.
^ Inka variante “sávikónaña”.
^ Koto glosario, kití tí xi̱sokóna ta xi̱xaʼminarí.