Levítico 8:1-36

  • Nda̱kaxinna ta̱ Aarón ña̱ koora su̱tu̱ xíʼin na̱ se̱ʼera (1-36)

8  Ta ni̱ka̱ʼa̱nka Jehová xíʼin ta̱ Moisés, ta ka̱chira: 2  “Ná ku̱ʼu̱n ta̱ Aarón xíʼin na̱ se̱ʼera xíʼún, ta saátu ná ku̱ʼu̱n ti̱ko̱to̱ ña̱ kundixina, aceite tá yi̱i̱, si̱ndi̱ki̱ tí so̱kóna* xa̱ʼa̱ ku̱a̱china, u̱vi̱ saá ndikachi* che̱e xíʼin canasta nu̱ú ñúʼu si̱ta̱váʼa ña̱ kǒo yuxa̱n iyá* xíʼin, 3  ta ka̱ʼa̱n xíʼin ndiʼi na̱ ñuu ná ndatakana chí yéʼé tabernáculo”. 4  Tasaá ta̱ Moisés ke̱ʼéra nda̱a̱ táki̱ʼva ni̱ka̱ʼa̱n mií Jehová xíʼinra, ta na̱ ñuu nda̱takana chí yéʼé tabernáculo. 5  Tándi̱ʼi, ta̱ Moisés ni̱ka̱ʼa̱nra xíʼin na̱ ñuu: “Ña̱yóʼo kúú chiñu ña̱ xa̱ʼnda Jehová nu̱úyó keʼéyó”. 6  Tasaá ni̱ka̱ʼa̱n ta̱ Moisés xíʼin ta̱ Aarón xíʼin na̱ se̱ʼera ná kuyatinna, ta sa̱kúchirana. 7  Tándi̱ʼi, sa̱ndákundixira ti̱ko̱to̱ káni̱ ta̱ Aarón ta ka̱túnra ña̱ʼa tokóra, saátu sa̱ndákundixirara ti̱ko̱to̱ káni̱ ña̱ kǒo ndaʼa̱, ta nda̱kundixira ña̱ efod,* ta kútu̱va̱ʼa* ka̱túnra ña̱yóʼo xíʼin cinturón ña̱ ni̱ku̱kuna.* 8  Tasaá sa̱ndákundixirara ti̱ko̱to̱ ña̱ kundasi kándíkara, ta chi̱kaa̱ra ña̱ Urim xíʼin ña̱ Tumim* ini ña̱yóʼo. 9  Tasaá chi̱núura ti̱ko̱to̱ xi̱níra ña̱ ku̱vaʼa kunúu xi̱níra, ta nu̱ú ña̱yóʼo chi̱núura ka̱a ña̱ oro ña̱ yi̱i̱ ña̱ náʼa̱ ña̱ nda̱taxira miíra ndaʼa̱ Ndióxi̱, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 10  Tándi̱ʼi, ta̱ Moisés chi̱kaa̱ra aceite tá yi̱i̱ sa̱tá tabernáculo xíʼin ndiʼi ña̱ʼa ña̱ xi̱kuumiíña, ña̱ va̱ʼa ndasayi̱i̱raña. 11  Ta u̱xa̱ yichi̱ ku̱ndaara loʼo aceite sa̱tá altar ta nda̱sayi̱i̱raña xíʼin ndiʼi ña̱ʼa ña̱ kuniñúʼuna xíʼinña, ta saátu ke̱ʼéra xíʼin ña̱ʼa nu̱ú kuñuʼu ti̱kui̱í xíʼin ña̱ʼa nu̱ú kunúuña, ke̱ʼéra ña̱yóʼo ña̱ va̱ʼa ndasayi̱i̱raña. 12  Tándi̱ʼi, chi̱kaa̱ra loʼo aceite tá yi̱i̱ xi̱ní ta̱ Aarón ña̱ va̱ʼa ndasayi̱i̱rara. 13  Tasaá, ta̱ Moisés ni̱ka̱ʼa̱nra xíʼin na̱ se̱ʼe ta̱ Aarón ná kuyatinna, ta sa̱ndákundixirana ti̱ko̱to̱ náni̱, ka̱túnra ña̱ʼa tokóna ta saátu chi̱ndósóra ti̱ko̱to̱ xi̱nína ña̱ ku̱vaʼa kundóso xi̱nína, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 14  Tándi̱ʼi, ni̱ka̱ʼa̱nra ná kuniʼina si̱ndi̱ki̱ tí so̱kóra xa̱ʼa̱ ku̱a̱china ku̱ʼu̱n xíʼinna nu̱úra, ta ta̱ Aarón xíʼin na̱ se̱ʼera chi̱ndósona ndaʼa̱na xi̱ní tí si̱ndi̱ki̱ tí so̱kóna xa̱ʼa̱ ku̱a̱china. 15  Ta̱ Moisés xa̱ʼníra tí si̱ndi̱ki̱ yóʼo, ta xíʼin nu̱ú ndaʼa̱ra* ki̱ʼinra loʼo ni̱i̱rí ta xa̱kinraña ndiʼi ndiki̱ altar tasaá nda̱sayi̱i̱ra altar, ta ni̱i̱rí ña̱ ni̱ndoo xa̱taraña xa̱ʼa̱ altar ña̱ va̱ʼa ndasayi̱i̱raña, tasaá kivi so̱kóna ña̱ʼa nu̱úña ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱china. 16  Tándi̱ʼi, ki̱ʼinra ndiʼi xa̱ʼan* ña̱ íyo sa̱tá xitirí, ndiʼi xa̱ʼan ña̱ íyo sa̱ta̱xáʼarí xíʼin u̱vi̱ saá nduchu̱ inirí ta saátu xa̱ʼan ña̱ íyo sa̱tá ña̱yóʼo, ta ta̱ Moisés xa̱ʼmiraña nu̱ú altar ña̱ va̱ʼa kana yi̱ʼma̱ña. 17  Tasaá xa̱ʼndara chiñu ña̱ ná kaʼmina ñii̱ tí si̱ndi̱ki̱ yóʼo, ku̱ñurí xíʼin si̱ʼvírí chí sa̱ta nu̱ú ni̱xi̱yo veʼe válína, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 18  Tándi̱ʼi, ni̱ka̱ʼa̱nra ña̱ ná kuniʼina ndikachi che̱e tí kaʼnína tí so̱kóna nu̱ú Ndióxi̱ ku̱ʼu̱n xíʼinna nu̱úra, ta ta̱ Aarón xíʼin na̱ se̱ʼera chi̱ndósona ndaʼa̱na xi̱ní tí ndikachi che̱e yóʼo. 19  Tasaá ta̱ Moisés xa̱ʼníra tí ndikachi che̱e yóʼo, ta ni̱ko̱so̱yávára* ni̱i̱rí iníí sa̱tá altar. 20  Ta̱ Moisés xa̱ʼnda válíra tí ndikachi che̱e yóʼo, ta xa̱ʼmira xi̱nírí, ku̱ñurí ña̱ xa̱ʼndara xíʼin xa̱ʼanrí* ña̱ va̱ʼa kana yi̱ʼma̱ña. 21  Ta xíʼin ti̱kui̱í nda̱katara xitirí xíʼin xa̱ʼa̱rí, ta ta̱ Moisés xa̱ʼmira iníísaá tí ndikachi che̱e yóʼo nu̱ú altar ña̱ va̱ʼa kana yi̱ʼma̱rí. Kití yóʼo kúú tí xa̱ʼmira,* tí ni̱so̱kóra nu̱ú Ndióxi̱ ta táminí xi̱xaʼa̱nrí. Tíyóʼo kúú tí xa̱ʼmina ña̱ ni̱so̱kónarí nu̱ú Jehová, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 22  Tándi̱ʼi, ta̱ Moisés ni̱ka̱ʼa̱nra ña̱ ná kuniʼina ndikachi che̱e tí u̱vi̱ ku̱ʼu̱n xíʼinna nu̱úra, tíyóʼo kúú tí so̱kóra ña̱ ndaka̱xinra na̱ koo su̱tu̱, ta ta̱ Aarón xíʼin na̱ se̱ʼera chi̱ndósona ndaʼa̱na xi̱nírí. 23  Ta̱ Moisés xa̱ʼníra tí ndikachi che̱e ta chi̱kaa̱ra loʼo ni̱i̱rí yuʼú so̱ʼo kúaʼa ta̱ Aarón, saátu nu̱ú ndaʼa̱ kúaʼara ña̱ nduʼú xíʼin nu̱ú xa̱ʼa̱* kúaʼara ña̱ nduʼú. 24  Tasaá, ta̱ Moisés ni̱ka̱ʼa̱nra xíʼin na̱ se̱ʼe ta̱ Aarón ná kuyatinna, ta chi̱kaa̱ra loʼo ni̱i̱ yuʼú so̱ʼo kúaʼana, saátu nu̱ú ndaʼa̱ kúaʼana ña̱ nduʼú xíʼin nu̱ú xa̱ʼa̱ kúaʼana ña̱ nduʼú. Ta ta̱ Moisés ni̱ko̱so̱yávára ndiʼika ni̱i̱ tíyóʼo iníí sa̱tá altar. 25  Tasaá ki̱ʼinra xa̱ʼanrí, xa̱ʼan ña̱ íyo si̱ʼma̱rí,* ndiʼi xa̱ʼan ña̱ íyo sa̱tá xitirí, xa̱ʼan ña̱ íyo sa̱ta̱xáʼarí, u̱vi̱ saá nduchu̱ inirí xíʼin xa̱ʼan ña̱ kúúmiíña, ta saátu xa̱ʼa̱ kúaʼarí. 26  Tasaá, ini canasta nu̱ú ñúʼu si̱ta̱váʼa ña̱ kǒo yuxa̱n iyá xíʼin ña̱ níndichi nu̱ú Jehová, ta̱vára iin si̱ta̱váʼa ña̱ ti̱ku̱i̱ta̱* ña̱ kǒo yuxa̱n iyá xíʼin, ta̱vátura iin si̱ta̱váʼa ña̱ ti̱ku̱i̱ta ña̱ kúúmií aceite xíʼin iin galleta ña̱ yásín,* tándi̱ʼi chi̱ndósoraña sa̱tá xa̱ʼan tí ndikachi xíʼin xa̱ʼa̱ kúaʼarí. 27  Tasaá chi̱ndósora ndiʼi ña̱yóʼo nu̱ú ndaʼa̱ ta̱ Aarón xíʼin na̱ se̱ʼera, ta ki̱xáʼara sákuikóraña* ña̱ va̱ʼa so̱kónaña nu̱ú Jehová. 28  Tasaá ta̱ Moisés ki̱ʼinraña ndaʼa̱na, ta chi̱ndósoraña sa̱tá kití tí xíxi̱ nu̱ú altar ña̱ va̱ʼa kokoña.* Ni̱so̱kóna ña̱yóʼo ña̱ va̱ʼa ndaka̱xinna na̱ koo su̱tu̱ ta táminí xi̱xaʼa̱nña. Ña̱yóʼo kúú ña̱ xa̱ʼmina ña̱ ni̱so̱kóna nu̱ú Jehová. 29  Tándi̱ʼi, ki̱ʼin ta̱ Moisés kándíkarí ta sa̱kúikóraña ña̱ va̱ʼa so̱kóraña nu̱ú Jehová. Kándíka tí ndikachi che̱e tí ni̱so̱kóra tá nda̱kaxinra na̱ su̱tu̱ kúú ña̱ nda̱kiʼinra, nda̱a̱ táki̱ʼva ni̱ka̱ʼa̱n Jehová xíʼin ta̱ Moisés. 30  Ta, ta̱ Moisés ki̱ʼinra loʼo aceite tá yi̱i̱ xíʼin loʼo ni̱i̱ ña̱ ndóso nu̱ú altar, ta ku̱ndaaraña ta̱ Aarón xíʼin ti̱ko̱to̱ra ta saátu na̱ se̱ʼera xíʼin ti̱ko̱to̱na, saá kúú ña̱ nda̱sayi̱i̱ra ta̱ Aarón xíʼin ti̱ko̱to̱ra saátu na̱ se̱ʼera xíʼin ti̱ko̱to̱na. 31  Tasaá, ta̱ Moisés ni̱ka̱ʼa̱nra xíʼin ta̱ Aarón ta saátu xíʼin na̱ se̱ʼera: “Sachíʼyo̱ndó ku̱ñurí chí yéʼé tabernáculo. Ta kán kuxundóña xíʼin si̱ta̱váʼa ña̱ ñúʼu ini canasta* nda̱a̱ táki̱ʼva ni̱ka̱ʼa̱n Ndióxi̱ xíʼi̱n tá ka̱chira: ‘Ta̱ Aarón xíʼin na̱ se̱ʼera kúú na̱ kuxu ña̱yóʼo’. 32  Ta xíniñúʼu kaʼmindó ku̱ñu xíʼin si̱ta̱váʼa ña̱ ná kindo̱o. 33  U̱xa̱ ki̱vi̱ kúú ña̱ va̱ása kuxíkándó yéʼé tabernáculo, nda̱a̱ ná sandíʼi̱ ña̱ ndaka̱xii̱n ndóʼó ña̱ koondó su̱tu̱. Saáchi u̱xa̱ ki̱vi̱ kúú ña̱ kuniñúʼi̱ ña̱ ndaka̱xii̱n ndóʼó ña̱ koondó su̱tu̱. 34  Jehová kúú ta̱ xa̱ʼnda chiñu ña̱ ná keʼéyó nda̱a̱ táki̱ʼva ke̱ʼéyó vitin ña̱ va̱ʼa ndoo ku̱a̱chindó. 35  Ta u̱xa̱ ki̱vi̱ kúú ña̱ kindo̱ondó chí yéʼé tabernáculo káʼñu xíʼin ñuú,* ta saxínundó chiñu ña̱ kúúmiíndó nu̱ú Jehová, ña̱ va̱ʼa ná kǒo kuvindó chi saá kúú ña̱ ni̱ka̱ʼa̱nra xíʼi̱n”. 36  Ta ta̱ Aarón xíʼin na̱ se̱ʼera, ke̱ʼéna ndiʼi ña̱ ni̱ka̱ʼa̱n Jehová xíʼin ta̱ Moisés.

Nota

^ Inka variante “taxina”.
^ Inka variante “levo”.
^ Á “levadura”.
^ Koto glosario, efod.
^ Inka variante “tuunva̱ʼa”.
^ Inka variante “ni̱ki̱kuna”.
^ Inka variante “luku ndaʼa̱ra”, “nduku ndaʼára”.
^ Inka variante “sa̱ʼan”.
^ Inka variante “ku̱iʼnindaara”, “ko̱ʼnindaara”.
^ Á “xa̱ʼan ña̱ íyo sa̱tá nduchu̱ inirí”.
^ Inka variante “luku xa̱ʼa̱”, “nduku xa̱ʼá”.
^ Inka variante “ndoʼórí”.
^ Inka variante “ti̱vi̱”, “ti̱ka̱ta̱”, “chi̱ka̱ta̱”.
^ Inka variante “yáxín”.
^ Inka variante “sávikóraña”.
^ Inka variante “ka̱yu̱ña”.
^ Á “canasta ña̱ xi̱niñúʼi̱ tá nda̱kaxii̱n ndóʼó ña̱ koondó su̱tu̱”.
^ Inka variante “ndiví ñuú”.
TRADUCCIÓN DEL NUEVO MUNDO DE LAS SANTAS ESCRITURAS
Levítico 8
tu’un sâví
Kaʼvi Biblia ña̱ va̱xi nu̱ú internet
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt