Números 23:1-30
23 Tasaá ni̱ka̱ʼa̱n ta̱ Balaam xíʼin ta̱ Balac: “Keʼé u̱xa̱ altar yóʼo ta kaʼní u̱xa̱ si̱ndi̱ki̱ xíʼin u̱xa̱ ndikachi* che̱e tí kuniñúʼi̱”.
2 Ta ndi̱ku̱n ke̱ʼé ta̱ Balac nda̱a̱ táki̱ʼva ni̱ka̱ʼa̱n ta̱ Balaam xíʼinra. Ta ta̱ Balac xíʼin ta̱ Balaam ni̱so̱kóna* iin si̱ndi̱ki̱ xíʼin iin ndikachi che̱e nu̱ú iin tá iin altar yóʼo.
3 Tándi̱ʼi, ta̱ Balaam ni̱ka̱ʼa̱nra xíʼin ta̱ Balac: “Yóʼo kindo̱ún xíʼin kití tí ni̱so̱kóún tí ni̱xi̱xi̱,* ta ná ku̱ʼi̱n. Chi sana ka̱ʼa̱n Jehová xíʼi̱n, ta nda̱a̱ ndáaka ña̱ ná ka̱ʼa̱nra xíʼi̱n, ka̱ʼi̱nña xíʼún”. Tasaá nda̱kiʼinra ku̱a̱ʼa̱nra chí xi̱ní iin xi̱kí.
4 Tasaá ni̱ka̱ʼa̱n Ndióxi̱ xíʼin ta̱ Balaam, ta ta̱ Balaam ni̱ka̱ʼa̱nra ña̱yóʼo xíʼinra: “Iin yiku̱n ka̱tai̱ u̱xa̱ altar, ta ni̱so̱kói̱ iin si̱ndi̱ki̱ xíʼin iin ndikachi che̱e nu̱ú iin tá iin ña̱yóʼo”.
5 Jehová ni̱ka̱ʼa̱nra xíʼin ta̱ Balaam ndáaña ka̱ʼa̱nra, ta ka̱chira: “Ndikó nu̱ú ta̱ Balac, ta ña̱yóʼo kúú ña̱ xíniñúʼu ka̱ʼún”.
6 Tasaá ndi̱kóra ta xi̱nira ña̱ níndichi ta̱ Balac xíʼin ndiʼi na̱ ta̱a na̱ ndáyáʼvi na̱ ñuu Moab, yatin nu̱ú ni̱xi̱xi̱ kití* tí ni̱so̱kóna.
7 Tasaá ta̱ Balaam ni̱ka̱ʼa̱nra tu̱ʼun yóʼo:
“Nda̱a̱ chí Aram ta̱vá ta̱ Balac ta̱ rey ñuu Moab yi̱ʼi̱ va̱xii̱ xíʼinra,nda̱a̱ chí nu̱ú íyo yuku̱ nu̱ú kíta ñu̱ʼu*
ta̱vára yi̱ʼi̱ va̱xii̱ ta ni̱ka̱ʼa̱nra ña̱yóʼo xíʼi̱n:
‘Naʼa ta sakúisochiʼñaún* ta̱ Jacob xa̱ʼíi̱.
Naʼa ta sakúisochiʼñaún na̱ ñuu Israel’.
8 Yi̱ʼi̱ va̱ása kivi sakúisochiʼñai̱ na̱ va̱ása nísakúisochiʼña Ndióxi̱.
Va̱ása kivi sakúisochiʼñai̱ na̱ va̱ása nísakúisochiʼña Jehová.
9 Nda̱a̱ chí sa̱tá yu̱u̱ níndichii̱ xítoi̱na,ta nda̱a̱ chí xi̱ní xi̱kí níndichii̱ xítoi̱na.
Iin ñuu na̱ ndóo mitúʼun kúúna,ta xa̱a̱ síín íyona nu̱ú na̱ inka ñuu.
10 ¿Ndáana kuchiñu ndakaʼvi na̱ se̱ʼe ta̱ Jacob?Chi ku̱a̱ʼání kúúna, nda̱a̱ táki̱ʼva ku̱a̱ʼání kúú yáká* ña̱ íyo nu̱ú ñuʼú.
¿Ndáana kuchiñuví ndakaʼvi iin táʼví loʼo na̱ ñuu Israel?Taxi ná kuvii̱ nda̱a̱ táki̱ʼva xíʼi̱ na̱ kéʼé ña̱ nda̱kú,
ta nda̱a̱ táki̱ʼva kuvi na̱kán saá ná kuvii̱”.
11 Tasaá ni̱ka̱ʼa̱n ta̱ Balac xíʼin ta̱ Balaam: “¿Nda̱chun ke̱ʼún ña̱yóʼo xíʼi̱n? Ka̱nai̱ yóʼó ña̱ va̱ʼa sakúisochiʼñaún na̱ sáa̱-inii̱ xínii̱, soo nu̱úka ña̱ keʼún ña̱yóʼo, bendiciónva ta̱xiún ndaʼa̱na”.
12 Tasaá nda̱kuiinra: “Xa̱a̱ ni̱ka̱ʼi̱n xíʼún ña̱ ka̱ʼa̱n kuitíi̱ ña̱ ka̱ʼa̱n Jehová xíʼi̱n”.
13 Ta̱ Balac ni̱ka̱ʼa̱nra xíʼinra: “Ixaún ña̱ ma̱ní, ná ku̱ʼu̱nyó inka táʼví nu̱ú kivi kuniúnna. Su̱ví ndiʼivína kuniún chi loʼo kuitívana kuniún, ta kán kundichiún sakúisochiʼñaúnna xa̱ʼíi̱”.
14 Ña̱kán ni̱xa̱ʼa̱nra xíʼinra chí yuku̱ ña̱ Zofim, ña̱ kíndo̱o chí si̱kí ña̱ Pisgá, tasaá ke̱ʼéra u̱xa̱ altar ta ni̱so̱kóra iin si̱ndi̱ki̱ xíʼin iin ndikachi che̱e nu̱ú iin tá iin ña̱yóʼo.
15 Ta ta̱ Balaam ni̱ka̱ʼa̱nra xíʼin ta̱ Balac: “Yóʼo kindo̱ún xíʼin kití tí ni̱so̱kóún tí ni̱xi̱xi̱, ta ná ku̱ʼi̱n chí káa ña̱ ka̱ʼi̱n xíʼin Ndióxi̱”.
16 Jehová ni̱ka̱ʼa̱nra xíʼin ta̱ Balaam ndáaña ka̱ʼa̱nra, ta ka̱chira: “Ndikó nu̱ú íyo ta̱ Balac ta ña̱yóʼo ka̱ʼún xíʼinra”.
17 Tasaá ndi̱kóra nu̱ú ta̱ Balac ta xi̱nira ña̱ níndichira ndátura nu̱ú ni̱so̱kóra kití tí ni̱xi̱xi̱,* ta saátu ndíta na̱ ta̱a na̱ ndáyáʼvi na̱ ñuu Moab xíʼinra. Ta ta̱ Balac ni̱nda̱ka̱tu̱ʼunrara: “¿Ndáaña ni̱ka̱ʼa̱n Jehová xíʼún?”.
18 Tasaá ni̱ka̱ʼa̱nra ña̱yóʼo xíʼinra:
“Ndakundichi Balac ta kuniso̱ʼo ña̱ ka̱ʼi̱n xíʼún.
Kuniso̱ʼo ña̱ ka̱ʼi̱n xíʼún, yóʼó se̱ʼe ta̱ Zipor.
19 Su̱ví táki̱ʼva íyo miíyó na̱ yiví saá íyo Ndióxi̱ ta va̱ása káʼa̱nra ña̱ vatá.Va̱ása násamara ña̱ káʼa̱nra nda̱a̱ táki̱ʼva kéʼé na̱ yiví.
Tá káʼa̱nra keʼéra iin ña̱ʼa, kéʼévaraña.
Ta tá kíndo̱ora keʼéra iin ña̱ʼa, sáxi̱nuvaraña.
20 Kotondó chi ta̱ ki̱xaa̱ chikaa̱ bendición kúi̱,Ndióxi̱ chi̱kaa̱ra bendición na̱ ñuura ta yi̱ʼi̱ va̱ása kivi nasamai̱ña.
21 Ta̱kán va̱ása táxira kuniñúʼuna magia contra ta̱ Jacob,ta va̱ása táxira kundoʼo na̱ ñuu Israel nda̱a̱ ni iin ña̱ va̱ása va̱ʼa.
Jehová Ndióxi̱na íyora xíʼinna,ta na̱yóʼo káʼa̱nna ña̱ kúúra rey nu̱úna.
22 Ndióxi̱ ta̱várana ti̱xin ñuu Egipto.
Xíʼin ndee̱ra chíndeétáʼanra xíʼinna,
ta ña̱yóʼo íyoña nda̱a̱ táki̱ʼva íyo ndiki̱ si̱ndi̱ki̱ yukú.
23 Saáchi nda̱a̱ ni iinna va̱ása kivi ka̱ʼa̱nnaña̱ kundoʼo ta̱ Jacob iin ña̱ va̱ása va̱ʼa,
ta nda̱a̱ ni iin na̱ tási va̱ása kivi keʼéna iin ña̱ va̱ása va̱ʼa xíʼin na̱ ñuu Israel.
Ta vitin kivi ka̱ʼa̱nna ña̱yóʼo xa̱ʼa̱ ta̱ Jacob ta saátu xa̱ʼa̱ na̱ ñuu Israel:
‘Kotondó ña̱ ke̱ʼé Ndióxi̱ xa̱ʼa̱na’.
24 Na̱ ñuu yóʼo ndako̱ona nda̱a̱ táki̱ʼva ndáko̱o iin ndikaʼa,*ta nda̱a̱ táki̱ʼva ndáku̱ndichi iin ndikaʼa saá ndakundichina.
Nda̱a̱ táki̱ʼva kéʼé tí ndikaʼa ña̱ va̱ása ndákandúʼurí*nda̱a̱ tá ndi̱ʼi xa̱xírí kití tí xa̱ʼnírí saá keʼé na̱yóʼo,
ta nda̱a̱ táki̱ʼva xíʼirí ni̱i̱ kití tí xa̱ʼnírí saá keʼé na̱yóʼo”.
25 Tasaá ni̱ka̱ʼa̱n ta̱ Balac xíʼin ta̱ Balaam: “Tá va̱ása kívi sakúisochiʼñaúnna, va̱ása taxiún bendición ndaʼa̱na”.
26 Tasaá nda̱kuiin ta̱ Balaam yuʼú ta̱ Balac: “¿Á su̱ví xa̱a̱ ni̱ka̱ʼa̱nvai̱ xíʼún ña̱ ndiʼi ña̱ ni̱ka̱ʼa̱n Jehová xíʼi̱n kúú ña̱ ka̱ʼi̱n?”.
27 Tasaá ni̱ka̱ʼa̱n ta̱ Balac xíʼin ta̱ Balaam: “Ixaún ña̱ ma̱ní, ná ku̱ʼu̱nyó xíʼi̱n inkaka lugar. Sana kandíxava Ndióxi̱ ta̱ nda̱a̱ ña̱ sakúisochiʼñaúnna xa̱ʼíi̱”.
28 Tasaá ni̱xa̱ʼa̱n ta̱ Balac xíʼin ta̱ Balaam nda̱a̱ chí xi̱ní yuku̱ ña̱ Peor ña̱ xítondaa chí Jesimón.*
29 Tasaá ni̱ka̱ʼa̱n ta̱ Balaam xíʼin ta̱ Balac: “Keʼé u̱xa̱ altar yóʼo ta kaʼníún u̱xa̱ si̱ndi̱ki̱ xíʼin u̱xa̱ ndikachi che̱e tí kuniñúʼi̱”.
30 Tasaá ke̱ʼé ta̱ Balac nda̱a̱ táki̱ʼva ni̱ka̱ʼa̱n ta̱ Balaam xíʼinra, ta ni̱so̱kóra iin si̱ndi̱ki̱ xíʼin iin ndikachi che̱e nu̱ú iin tá iin altar.
Nota
^ Inka variante “levo”.
^ Inka variante “ta̱xina”.
^ Koto glosario, kití tí xi̱sokóna ta xi̱xaʼminarí.
^ Koto glosario, kití tí xi̱sokóna ta xi̱xaʼminarí.
^ Inka variante “ña̱ ka̱ndii”.
^ Inka variante “chika̱ún chiʼña”, “satávi̱chiʼñaún”.
^ Inka variante “ya̱a̱”.
^ Koto glosario, kití tí xi̱sokóna ta xi̱xaʼminarí.
^ Á “león”.
^ Inka variante “ndákundúʼurí”, “xíkondúʼú síi̱nrí”.
^ Á sana “chí ñuʼú yi̱chí”.
