Números 24:1-25
24 Tá xi̱ni ta̱ Balaam ña̱ nina bendición xi̱taxi Jehová ndaʼa̱ na̱ ñuu Israel, va̱ása níxa̱ʼa̱nkara nu̱ú na̱ tási ña̱ va̱ʼa kunda̱a̱-inira á ña̱ va̱ása va̱ʼa kúú ña̱ kundoʼo na̱ ñuu Israel, ta va̱ʼaka nda̱kotora chí nu̱ú ñuʼú yi̱chí.
2 Nda̱niʼira nu̱úra ta xi̱nira ña̱ xa̱a̱ tribu ta tribu ndóo na̱ ñuu Israel. Tasaá nda̱kiʼinra espíritu santo Ndióxi̱.
3 Tándi̱ʼi, ni̱ka̱ʼa̱nra tu̱ʼun yóʼo:
“Ña̱yóʼo kúú ña̱ káʼa̱n ta̱ Balaam se̱ʼe ta̱ Beor,ña̱yóʼo kúú ña̱ káʼa̱n iin ta̱a ta̱ nda̱kunána nduchúnu̱ú,
4 ña̱yóʼo kúú ña̱ káʼa̱n ta̱ xíniso̱ʼo ña̱ káʼa̱n Ndióxi̱,ta̱ xi̱ni iin visión Ndióxi̱ ta̱ kúúmií ndiʼi ndee̱,ta̱ nda̱kava nu̱ú ñuʼú ta va̱ása ndási nduchúnu̱úra:
5 Liviní veʼe válí nu̱ú ndóo ndóʼó na̱ se̱ʼe ta̱ Jacob.Liviní tabernáculo ña̱ kúúmií ndóʼó na̱ ñuu Israel.
6 Nda̱a̱ táki̱ʼva ndákaa̱ yoso̱ ku̱a̱ʼa̱nña saá ndákaa̱ ña̱yóʼo,íyoña nda̱a̱ táki̱ʼva íyo ñuʼú ña̱ íyo yatin yuʼú yu̱ta,íyoña nda̱a̱ táki̱ʼva íyo yitu̱n tú naní áloe* tú chi̱ʼi Jehová,íyoña nda̱a̱ táki̱ʼva íyo yitu̱n tú naní cedro tú ndíta yatin yuʼú ti̱kui̱í.
7 Tóoka ti̱kui̱í yuʼú u̱vi̱ saá cubetana,yatin nu̱ú íyo ti̱kui̱í chíʼina si̱ʼva̱na.
Kundayáʼvika rey na̱yóʼo nu̱ú ta̱ Agag,ta ndakúníka koo ña̱ kaʼndachíñu ta̱yóʼo.
8 Ndióxi̱ ta̱várana ti̱xin ñuu Egipto.Xíʼin ndee̱ra chíndeétáʼanra xíʼinna,
ta ña̱yóʼo íyoña nda̱a̱ táki̱ʼva íyo ndiki̱ si̱ndi̱ki̱ yukú.Sandíʼi-xa̱ʼa̱ra na̱ ñuu na̱ íxandi̱va̱ʼa xíʼin na̱yóʼo,
Kaxíndaara lekena ta sandíʼi-xa̱ʼa̱rana xíʼin kuxu̱nra.*
9 Ta̱yóʼo ndáku̱ndeera* ta ndákandúʼura* táki̱ʼva ndákandúʼu iin tí ndikaʼa,*¿á íyo iin na̱ kúni̱ sasáa̱ra?
Na̱ táxi bendición ndaʼa̱ndó ná ndakiʼinna bendición,na̱ sákuisochiʼña* ndóʼó ná ndakiʼinna chiʼña”.
10 Tasaá ta̱ Balac ni̱sa̱a̱níra xíʼin ta̱ Balaam. Ta ta̱ Balac ka̱ni ndaʼa̱ra chi ndeéní ni̱sa̱a̱ra ta ni̱ka̱ʼa̱nra ña̱yóʼo xíʼin ta̱ Balaam: “Ka̱nai̱ yóʼó ña̱ va̱ʼa sakúisochiʼñaún na̱ sáa̱-inii̱ xínii̱, soo nu̱úka ña̱ keʼún ña̱yóʼo, nda̱a̱ u̱ni̱ yichi̱ ta̱xiún bendición ndaʼa̱na.
11 Ndi̱ku̱n ndikóún veʼún. Xi̱kuni̱kavíi̱ taxii̱ ku̱a̱ʼá ña̱ʼa ndaʼún, soo va̱ása nítaxi Jehová ndakiʼúnña”.
12 Ta nda̱kuiin ta̱ Balaam yuʼú ta̱ Balac: “¿Á va̱ása níka̱ʼa̱nvai̱ xíʼin na̱ ta̱a na̱ chi̱ndaʼún ni̱xa̱a̱ nu̱úi̱
13 ‘Ni ná taxi ta̱ Balac veʼera ndaʼíi̱ ta ná kutú plata xíʼin oro iniña, va̱ása kivi keʼíi̱ nda̱a̱ ni iin ña̱ʼa chi iinlá ña̱ káʼa̱n Jehová kúú ña̱ kivi keʼíi̱’? ¿Á va̱ása níka̱ʼi̱n xíʼinna, ‘Iinlá ña̱ ná ka̱ʼa̱n Jehová xíʼi̱n kúú ña̱ kivi ka̱ʼi̱n’?
14 Ndikóvai̱ ñui̱, soo naʼa ta ná ka̱ʼi̱n xíʼún ndáaña keʼé na̱ ñuu yóʼo xíʼin na̱ ñuún chí nu̱únínu”.
15 Tasaá ni̱ka̱ʼa̱nra ña̱yóʼo:
“Ña̱yóʼo kúú ña̱ káʼa̱n ta̱ Balaam se̱ʼe ta̱ Beor,ña̱yóʼo kúú ña̱ káʼa̱n iin ta̱a ta̱ nda̱kunána nduchúnu̱ú,
16 ña̱yóʼo kúú ña̱ káʼa̱n ta̱ xíniso̱ʼo ña̱ káʼa̱n Ndióxi̱,ta̱ nda̱kiʼin ña̱ ndíchi ña̱ kúúmií ta̱ káʼnuní,ta̱ xi̱ni iin visión Ndióxi̱ ta̱ kúúmií ndiʼi ndee̱,ta̱ nda̱kava nu̱ú ñuʼú ta va̱ása ndási nduchúnu̱úra:
17 Kunivai̱ra soo su̱ví vitin kunii̱ra,kotovai̱ra soo su̱ví tikáʼanví.
Ti̱xin na̱ veʼe ta̱ Jacob kita iin ki̱mi,ti̱xin na̱ ñuu Israel kita iin yitu̱n tú xíniñúʼu na̱ xáʼndachíñu.
Ta̱kán taʼvíra ta̱ʼya̱* na̱ ñuu Moab,ta taʼvíra xi̱ní se̱ʼe ndiʼi na̱ kútóoní kanitáʼan.
18 Na̱ ñuu Israel ndakiʼinna ñuu Edom,ta na̱ sáa̱-ini xíni ñuu Seír ndakiʼinnaña,ta na̱ ñuu Israel na̱ʼa̱na ña̱ ndakúní-inina.
19 Iin na̱ veʼe ta̱ Jacob kaʼndachíñuna nu̱ú inkanata kaʼnína ndiʼi na̱ ki̱ndoo tá ndi̱ʼi-xa̱ʼa̱ ñuu kán”.
20 Tá xi̱ni ta̱ Balaam ta̱ Amalec, ni̱ka̱ʼa̱nkara ña̱yóʼo:
“Na̱ ñuu Amalec xi̱kuu na̱ nu̱ú,soo kuvivana”.
21 Tá xi̱nira na̱ quenita, ni̱ka̱ʼa̱nkara ña̱yóʼo:
“Kútu̱níva veʼún ta sa̱tá yu̱u̱ kánuuña.
22 Soo iin na̱ yiví kaʼmina na̱ Cayín.
¿Nda̱saaka kúma̱ní ña̱ kixi na̱ ñuu Asiria ndakiʼinna ndóʼó ku̱ʼu̱n xíʼinna?”.
23 Ta ni̱ka̱ʼa̱nkara ña̱yóʼo:
“¿Ndáana ka̱kuví tá ná keʼé Ndióxi̱ ña̱yóʼo?
24 Nda̱a̱ chí mar ña̱ Kitim kee barco kixaa̱nú,saxóʼvi̱na* na̱ ñuu Asiriata saxóʼvi̱na na̱ ndóo chí Éber.
Soo na̱ ndiʼi-xa̱ʼa̱ va̱ʼa kúútu miívana”.*
25 Tasaá nda̱kiʼin ta̱ Balaam ku̱a̱ʼa̱nra chí nu̱ú ni̱xi̱yora. Ta nda̱kiʼintu ta̱ Balac ku̱a̱ʼa̱nra, soo xa̱a̱ síín nu̱ú ku̱a̱ʼa̱nra.
Nota
^ Ña̱yóʼo kúú ki̱vi̱ iin yitu̱n tú tává nduta̱ tá xáʼa̱n támi.
^ Inka variante “koxi̱ra”.
^ Inka variante “nákundayira”, “ndákandiera”.
^ Inka variante “ndákundúʼura”, “xíkondúʼú síi̱nra”.
^ Á “león”.
^ Inka variante “chíkaa̱ chiʼña”, “sáta̱vi̱chiʼña”.
^ Inka variante “tie̱ʼé”, “taan”.
^ Inka variante “sandóʼona-ini”.
^ Tu̱ʼun ña̱ ni̱ka̱ʼyi̱ña káchiña “Soo ta̱ ndiʼi-xa̱ʼa̱ va̱ʼa kúútu miívara”.
