Números 3:1-51
3 Na̱yóʼo xi̱kuu na̱ se̱ʼe ta̱ Aarón xíʼin ta̱ Moisés, tá ni̱ka̱ʼa̱n Jehová xíʼin ta̱ Moisés chí yuku̱ Sinaí.
2 Na̱yóʼo xi̱kuu na̱ se̱ʼe ta̱ Aarón: ta̱ Abihú, ta̱ Eleazar, ta̱ Itamar xíʼin ta̱ Nadab ta̱ xi̱kuu se̱ʼenu̱úra.
3 Na̱yóʼo xi̱kuu na̱ se̱ʼe ta̱ Aarón, ta nda̱kaxinna na̱yóʼo ña̱ va̱ʼa koona su̱tu̱.
4 Soo ta̱ Nadab xíʼin ta̱ Abihú ni̱xi̱ʼi̱na nu̱ú Jehová, saáchi ni̱so̱kóna* ña̱ kǒo xíniñúʼu so̱kóna* nu̱ú Jehová chí ñuʼú yi̱chí ña̱ Sinaí, ta kǒo se̱ʼena níxi̱yo. Soo ta̱ Eleazar xíʼin ta̱ Itamar xi̱kuumiíkavana chiñu ña̱ koona su̱tu̱ xíʼin yivána ta̱ Aarón.
5 Tasaá, Jehová ni̱ka̱ʼa̱nra xíʼin ta̱ Moisés:
6 “Ka̱ʼa̱n xíʼin na̱ tribu ta̱ Leví ná kuyatinna nu̱ú ta̱ su̱tu̱ Aarón, ta na̱yóʼo kachíñuna nu̱úra.
7 Ta xíniñúʼu saxínuna chiñu ña̱ kúúmiína nu̱ú ta̱yóʼo ta saátu nu̱ú na̱ ñuu, ta keʼéna chiñu ña̱ xíniñúʼu keʼéna ini tabernáculo.
8 Xíniñúʼu kiʼinna kuenta xíʼin ndiʼi ña̱ʼa ña̱ kúúmií tabernáculo, tasaá keʼéna chiñuna ini tabernáculo, ta saátu saxínuna chiñu ña̱ kúúmiína nu̱ú na̱ israelita.
9 Xíniñúʼu ndataxiún na̱ levita ndaʼa̱ ta̱ Aarón ta saátu ndaʼa̱ na̱ se̱ʼera. Na̱yóʼo kúú na̱ nda̱kaxinna ti̱xin na̱ veʼe na̱ israelita ña̱ va̱ʼa chindeétáʼanna xíʼinra.
10 Xíniñúʼu ndaka̱xiún ta̱ Aarón xíʼin na̱ se̱ʼera ña̱ va̱ʼa keʼéna chiñu ña̱ koona su̱tu̱, nda̱a̱ ndáaka na̱ ná keʼé chiñu yóʼo ta su̱ví chiñuna kúúña,* xíniñúʼu kuvina”.
11 Ta ni̱ka̱ʼa̱nka Jehová xíʼin ta̱ Moisés:
12 “Nu̱úka ña̱ ndakiʼi̱n ndiʼi se̱ʼenu̱ú na̱ israelita, na̱ levita kúú na̱ ndakiʼi̱n, na̱yóʼo kúú na̱ koo kuenta miíi̱.
13 Saáchi ndiʼi se̱ʼenu̱úndó kuenta miíi̱ kúúna ta saátu ndiʼi se̱ʼenu̱ú kití sa̱na̱ndó. Tá xa̱ʼníi̱ ndiʼi se̱ʼenu̱ú na̱ ñuu Egipto ta saátu tá xa̱ʼníi̱ ndiʼi se̱ʼenu̱ú kití sa̱na̱na, nda̱sayi̱íi̱ ndiʼi na̱ se̱ʼenu̱ú na̱ ñuu Israel ña̱ va̱ʼa xa̱a̱na koona kuenta miíi̱, ta saátu ndiʼi se̱ʼenu̱ú kití sa̱na̱na ña̱ va̱ʼa xa̱a̱rí koorí kuenta miíi̱. Kuenta miíi̱ koo ndiʼi na̱yóʼo. Yi̱ʼi̱ kúú Jehová”.
14 Tuku ni̱ka̱ʼa̱n Jehová xíʼin ta̱ Moisés chí ñuʼú yi̱chí ña̱ Sinaí, ta ña̱yóʼo ni̱ka̱ʼa̱nra xíʼinra:
15 “Ndakaʼyi ki̱vi̱ na̱ se̱ʼe ta̱ Leví, nda̱a̱ táki̱ʼva íyo ki̱vi̱ na̱ veʼena xíʼin na̱ táʼanna na̱ xi̱ndoo xi̱naʼá. Xíniñúʼu kaʼyiún ki̱vi̱ ndiʼi na̱ ta̱a, ni kúúna na̱ ta̱a válí na̱ kúúmií iin yo̱o̱ á na̱ kúúmií ku̱a̱ʼáka ku̱i̱ya̱”.
16 Tasaá ta̱ Moisés ka̱ʼyira ki̱vi̱na nda̱a̱ táki̱ʼva ni̱ka̱ʼa̱n Jehová xíʼinra.
17 Na̱yóʼo xi̱kuu na̱ se̱ʼe ta̱ Leví: ta̱ Guersón, ta̱ Cohat xíʼin ta̱ Merarí.
18 Ta na̱yóʼo xi̱kuu na̱ se̱ʼe ta̱ Guersón xíʼin na̱ veʼera: ta̱ Libní xíʼin ta̱ Simeí.
19 Na̱ se̱ʼe ta̱ Cohat xíʼin na̱ veʼera xi̱kuu: ta̱ Amram, ta̱ Izhar, ta̱ Hebrón xíʼin ta̱ Uziel.
20 Na̱ se̱ʼe ta̱ Merarí xíʼin na̱ veʼera xi̱kuu: ta̱ Mahlí xíʼin ta̱ Musí.
Na̱yóʼo xi̱kuu na̱ veʼe na̱ levita xíʼin na̱ táʼanna na̱ xi̱ndoo xi̱naʼá.
21 Na̱ veʼe ta̱ Guersón xi̱kuu: na̱ libnita xíʼin na̱ simeíta. Na̱yóʼo xi̱kuu na̱ veʼe na̱ guersonita.
22 Ndiʼi na̱ ta̱a na̱ ni̱ka̱ʼyi̱ ki̱vi̱ xi̱kuuna 7,500, ni kúúmiína iin yo̱o̱ á ku̱a̱ʼáka ku̱i̱ya̱.
23 Na̱ veʼe na̱ guersonita xi̱ndoona chí sa̱tá tabernáculo, chí nu̱ú kíʼvi ñu̱ʼu.*
24 Ta̱ xi̱niʼi yichi̱ nu̱ú na̱ guersonita xi̱kuu ta̱ Eliasaf se̱ʼe ta̱ Lael.
25 Chiñu ña̱ xi̱kuumií na̱ se̱ʼe ta̱ Guersón kúú ña̱ xi̱ndaana tabernáculo xíʼin ndiʼi ña̱ʼa ña̱ xi̱ndasi sa̱táña, cortina ña̱ tíkaa chí yéʼé tabernáculo,
26 cortina ña̱ tíkaa chí patio, cortina ña̱ tíkaa chí yéʼé patio ña̱ káva̱nduu sa̱tá tabernáculo xíʼin altar, yoʼo̱ xíʼin ndiʼi ña̱ʼa ña̱ xíniñúʼuna ini tabernáculo.
27 Na̱ veʼe ta̱ Cohat xi̱kuu na̱ amramita, na̱ izharita, na̱ hebronita xíʼin na̱ uzielita. Na̱yóʼo xi̱kuu na̱ veʼe na̱ cohatita.
28 Ndiʼi na̱ ta̱a na̱ ni̱ka̱ʼyi̱ ki̱vi̱ xi̱kuuna 8,600, ni kúúmiína iin yo̱o̱ á ku̱a̱ʼáka ku̱i̱ya̱. Na̱yóʼo kúú na̱ xi̱kuumií chiñu ña̱ kundaana lugar ña̱ yi̱i̱.
29 Na̱ veʼe na̱ se̱ʼe ta̱ Cohat xi̱ndoona chí táʼví sur, nu̱ú íyo tabernáculo.
30 Ta̱ xi̱niʼi yichi̱ nu̱ú na̱ cohatita xi̱kuu ta̱ Elizafán se̱ʼe ta̱ Uziel.
31 Chiñu ña̱ xi̱kuumiína kúú ña̱ xi̱ndaana tú Arca, mesa, candelabro, altar, ndiʼi ña̱ʼa ña̱ xi̱xiniñúʼuna nu̱ú lugar ña̱ yi̱i̱, cortina ña̱ xi̱ndataʼví lugar ña̱ yi̱i̱ nu̱ú ña̱ yi̱i̱ní xíʼin ndiʼika ña̱ʼa ña̱ xíniñúʼuna ña̱ keʼéna chiñu yóʼo.
32 Ta̱ xi̱kiʼin kuenta xíʼin na̱ levita xi̱kuu ta̱ Eleazar se̱ʼe ta̱ su̱tu̱ Aarón, ta̱yóʼo kúú ta̱ xi̱kiʼin kuenta ña̱ vií ná keʼéna chiñu nu̱ú lugar ña̱ yi̱i̱.
33 Na̱ veʼe ta̱ Merarí xi̱kuu na̱ mahlita xíʼin na̱ musita. Na̱yóʼo xi̱kuu na̱ veʼe ta̱ Merarí.
34 Ndiʼi na̱ ta̱a na̱ ni̱ka̱ʼyi̱ ki̱vi̱ xi̱kuuna 6,200, ni kúúmiína iin yo̱o̱ á ku̱a̱ʼáka ku̱i̱ya̱.
35 Ta̱ xi̱niʼi yichi̱ nu̱ú na̱ veʼe ta̱ Merarí xi̱kuu ta̱ Zuriel se̱ʼe ta̱ Abihail. Na̱yóʼo xi̱ndoona chí táʼví norte nu̱ú ni̱xi̱yo tabernáculo.
36 Na̱ se̱ʼe ta̱ Merarí kúú na̱ xi̱kiʼin kuenta xíʼin yitu̱n tú ni̱xi̱yo síi̱n* tabernáculo, yitu̱n tú xi̱tiinña, poste tú xi̱kuumiíña, xa̱ʼa̱nú xíʼin ndiʼi ña̱ʼa ña̱ xi̱xiniñúʼuna ña̱ keʼéna chiñu yóʼo,
37 poste tú xi̱ndita sa̱tá patio xíʼin xa̱ʼa̱nú, ka̱a ña̱ xi̱ndita nu̱ú ñuʼú xíʼin yoʼo̱.
38 Yatin nu̱ú ni̱xi̱yo tabernáculo chí nu̱ú kíta ñu̱ʼu kúú nu̱ú ni̱xi̱yo ta̱ Moisés xíʼin ta̱ Aarón ta saátu na̱ se̱ʼera. Na̱yóʼo kúú na̱ xi̱kuumií chiñu ña̱ kundaana lugar ña̱ yi̱i̱ nu̱úka ña̱ keʼé na̱ israelita ña̱yóʼo. Nda̱a̱ ndáaka na̱ ná keʼé chiñu yóʼo ta su̱ví chiñuna kúúña,* xíniñúʼu kuvina.
39 Ta ndiʼi na̱ ta̱a na̱ levita na̱ xi̱kuumií iin yo̱o̱ á ku̱a̱ʼáka ku̱i̱ya̱, na̱ ka̱ʼyi ta̱ Moisés xíʼin ta̱ Aarón ki̱vi̱, nda̱a̱ táki̱ʼva ni̱xi̱yo ki̱vi̱ na̱ veʼena na̱ xi̱ndoo xi̱naʼá xi̱kuuna 22,000, ta ke̱ʼéna ña̱yóʼo nda̱a̱ táki̱ʼva ni̱ka̱ʼa̱n Jehová xíʼinna.
40 Tasaá Jehová ni̱ka̱ʼa̱nra xíʼin ta̱ Moisés: “Kaʼyi ki̱vi̱ ndiʼi na̱ ta̱a na̱ kúú se̱ʼenu̱ú na̱ ñuu Israel na̱ kúúmií iin yo̱o̱ á ku̱a̱ʼáka ku̱i̱ya̱, ndakaʼvina ta keʼé iin lista xíʼin ki̱vi̱na.
41 Ta nu̱úka ña̱ ndakiʼi̱n ndiʼi se̱ʼenu̱ú na̱ ñuu Israel, na̱ ndakiʼi̱n kúú na̱ levita. Yi̱ʼi̱ kúú Jehová. Ta nu̱úka ña̱ ndakiʼi̱n ndiʼi se̱ʼenu̱ú kití sa̱na̱ na̱ israelita, ndakiʼi̱n kití sa̱na̱ na̱ levita”.
42 Tasaá ta̱ Moisés ka̱ʼyíra ndiʼi ki̱vi̱ se̱ʼenu̱ú na̱ israelita, nda̱a̱ táki̱ʼva ni̱ka̱ʼa̱n Jehová xíʼinra.
43 Ndiʼi na̱ ta̱a se̱ʼenu̱ú na̱ israelita na̱ xi̱kuumií iin yo̱o̱ á ku̱a̱ʼáka ku̱i̱ya̱ na̱ ni̱ka̱ʼyi̱ ki̱vi̱, xi̱kuuna 22,273.
44 Ta ni̱ka̱ʼa̱nka Jehová xíʼin ta̱ Moisés. Ta ka̱chira:
45 “Nu̱úka ña̱ ndakiʼi̱n ndiʼi se̱ʼenu̱ú na̱ ñuu Israel, na̱ ndakiʼi̱n kúú na̱ levita. Ta nu̱úka ña̱ ndakiʼi̱n ndiʼi se̱ʼenu̱ú kití sa̱na̱ na̱ israelita, ndakiʼi̱n kití sa̱na̱ na̱ levita. Kuenta miíi̱ xíniñúʼu koo na̱ levita. Yi̱ʼi̱ kúú Jehová.
46 Xa̱ʼa̱ ña̱ ku̱a̱ʼáka kúú se̱ʼenu̱ú na̱ israelita, chi 273 kúú na̱ yóso nu̱ú na̱ levita, xíniñúʼu ndachaʼvína xa̱ʼa̱ na̱yóʼo, chi loʼoka kúú na̱ levita.
47 Xíniñúʼu chaʼvina 5 xu̱ʼún ña̱ plata* xa̱ʼa̱ iin tá iin na̱yóʼo, ta katanaña nda̱a̱ táki̱ʼva kátana plata nu̱ú lugar ña̱ yi̱i̱. Iin xu̱ʼún ña̱ plata ve̱eña 12 gramo.*
48 Xíniñúʼu taxiún xu̱ʼún yóʼo ndaʼa̱ ta̱ Aarón xíʼin na̱ se̱ʼera, ña̱yóʼo kúú ya̱ʼvi ña̱ ndachaʼvína xa̱ʼa̱ ña̱ ku̱a̱ʼáka kúú se̱ʼenu̱ú na̱ israelita nu̱úka na̱ levita”.
49 Ña̱kán ta̱ Moisés nda̱kiʼinra xu̱ʼún ña̱ cha̱ʼvi na̱ israelita xa̱ʼa̱ ña̱ ku̱a̱ʼáka xi̱kuu se̱ʼenu̱úna nu̱úka na̱ levita.
50 Nda̱kiʼinra xu̱ʼún xa̱ʼa̱ se̱ʼenu̱ú na̱ israelita, 1,365 xu̱ʼún ña̱ plata xi̱kuuña, ta ka̱tanaña nda̱a̱ táki̱ʼva kátana plata lugar ña̱ yi̱i̱.
51 Tasaá ta̱ Moisés ta̱xira xu̱ʼún ña̱ cha̱ʼvi na̱yóʼo ndaʼa̱ ta̱ Aarón xíʼin na̱ se̱ʼera, nda̱a̱ táki̱ʼva ni̱ka̱ʼa̱n mií Jehová, ta ta̱ Moisés ke̱ʼéra nda̱a̱ táki̱ʼva ni̱ka̱ʼa̱n Jehová xíʼinra.
Nota
^ Inka variante “ta̱xina”.
^ Tu̱ʼun ña̱ ni̱ka̱ʼyi̱ña káchiña “ñuʼu̱”.
^ Ña̱yóʼo káʼa̱nña xa̱ʼa̱, na̱ va̱ása níkixi ti̱xin na̱ veʼe ta̱ Aarón.
^ Inka variante “ña̱ ka̱ndii”.
^ Inka variante “xiín”.
^ Ña̱yóʼo káʼa̱nña xa̱ʼa̱, na̱ va̱ása kúú levita.
^ Tu̱ʼun ña̱ ni̱ka̱ʼyi̱ña káchiña “5 siclo”. Koto apéndice B14.
^ Tu̱ʼun ña̱ ni̱ka̱ʼyi̱ña káchiña “iin siclo ve̱eña 20 guerás”. Koto apéndice B14.
