Números 9:1-23
9 Tá xa̱a̱ ni̱ya̱ʼa u̱vi̱ ku̱i̱ya̱ ña̱ ke̱e na̱ ñuu Israel chí Egipto tá yo̱o̱ nu̱ú, Jehová ni̱ka̱ʼa̱nra xíʼin ta̱ Moisés chí nu̱ú ñuʼú yi̱chí ña̱ Sinaí ta ka̱chira:
2 “Na̱ israelita xíniñúʼu ixatu̱ʼvana kití tí kaʼnína tá ná kixaa̱ ki̱vi̱ ña̱ xíniñúʼu koo ña̱ Pascua.
3 Xíniñúʼu ixatu̱ʼvanarí mií ki̱vi̱ ña̱ xa̱a̱ ni̱ka̱ʼi̱n xíʼinna, ki̱vi̱ 14 tí yo̱o̱ yóʼo tá xa̱a̱ ku̱ñuú. Xíniñúʼu ixatu̱ʼvana tíyóʼo nda̱a̱ táki̱ʼva ni̱ka̱ʼi̱n xíʼinna, nda̱a̱ táki̱ʼva káʼa̱n ley”.
4 Tasaá, ta̱ Moisés ni̱ka̱ʼa̱nra xíʼin na̱ israelita ná ixatu̱ʼvana kití tí so̱kóna* vikó ña̱ Pascua.
5 Tasaá na̱ israelita i̱xatu̱ʼvana kití tí so̱kóna vikó ña̱ Pascua ki̱vi̱ 14 tí yo̱o̱ nu̱ú tá xa̱a̱ ku̱ñuú chí nu̱ú ñuʼú yi̱chí ña̱ Sinaí. Ta nda̱a̱ táki̱ʼva ni̱ka̱ʼa̱n Jehová xíʼin ta̱ Moisés saá ke̱ʼé na̱ israelita.
6 Soo mií ki̱vi̱ ña̱ koo vikó ña̱ Pascua, sava na̱ ta̱a va̱ása níkivi ixatu̱ʼvana kití tí so̱kóna, saáchi ku̱yaku̱a̱na* xa̱ʼa̱ ña̱ ti̱inna iin na̱ ni̱xi̱ʼi̱. Ña̱kán ni̱xa̱ʼa̱nna nu̱ú ta̱ Moisés xíʼin ta̱ Aarón,
7 ta ni̱ka̱ʼa̱nna xíʼinna: “Ku̱yaku̱a̱ndi̱ xa̱ʼa̱ ña̱ ti̱inndi̱ iin na̱ ni̱xi̱ʼi̱. ¿Nda̱chun va̱ása kívi so̱kóndi̱ kití nu̱ú Jehová mií ki̱vi̱ ña̱ so̱kó ndiʼi na̱ israelita tíyóʼo?”.
8 Ta̱ Moisés ni̱ka̱ʼa̱nra xíʼinna: “Yóʼo kundatundó, ta ná ku̱ʼi̱n nda̱ka̱tu̱ʼíi̱n Jehová ndáaña ka̱ʼa̱nra xíʼi̱n xa̱ʼa̱ndó”.
9 Tasaá Jehová ni̱ka̱ʼa̱nra xíʼin ta̱ Moisés:
10 “Ña̱yóʼo ka̱ʼún xíʼin na̱ israelita: ‘Tá iin ndóʼó á iin na̱ se̱ʼendó na̱ kaku chí nu̱únínu ná kuyaku̱a̱na xa̱ʼa̱ ña̱ ti̱inna iin na̱ ni̱xi̱ʼi̱ á tá ku̱a̱ʼa̱n xíkána xíniñúʼu ixatu̱ʼvana kití tí so̱kóna nu̱ú yi̱ʼi̱ Jehová tá ná koo vikó ña̱ Pascua.
11 Na̱yóʼo xíniñúʼu ixatu̱ʼvanarí ki̱vi̱ 14 tí yo̱o̱ u̱vi̱ tá xa̱a̱ ku̱ñuú. Xíniñúʼu kuxunarí xíʼin si̱ta̱váʼa ña̱ kǒo yuxa̱n iyá* kúúmií xíʼin yiva ña̱ o̱va̱.
12 Va̱ása xíniñúʼu sandákoondó ku̱ñurí ña̱ va̱ʼa kuxundóña nda̱a̱ inka ki̱vi̱ ni va̱ása xíniñúʼu ka̱ʼnu̱ndó lekerí. Xíniñúʼu ixatu̱ʼvandó tíyóʼo nda̱a̱ táki̱ʼva káʼa̱n ley ña̱ ta̱xii̱ ndaʼa̱ndó xa̱ʼa̱ vikó ña̱ Pascua.
13 Soo tá iin na̱ yiví va̱ása níkuyaku̱a̱na* á va̱ása ku̱a̱ʼa̱n xíkána ta va̱ása ní ixatu̱ʼvana kití tí so̱kóna vikó ña̱ Pascua, na̱ yiví yóʼo xíniñúʼu kuvina saáchi va̱ása níso̱kóna kití nu̱ú yi̱ʼi̱ Jehová, ki̱vi̱ ña̱ xi̱niñúʼu so̱kónarí. Na̱ yiví yóʼo xíniñúʼu ndakuiinna xa̱ʼa̱ ku̱a̱china.
14 ”’Soo tá ki̱xaa̱ na̱ inka ñuu ndóona xíʼinndó saátu na̱yóʼo xíniñúʼu ixatu̱ʼvana kití tí so̱kóna nu̱ú yi̱ʼi̱ Jehová tá ná koo vikó ña̱ Pascua. Xíniñúʼu ixatu̱ʼvana tíyóʼo nda̱a̱ táki̱ʼva ni̱ka̱ʼi̱n xíʼinndó, nda̱a̱ táki̱ʼva káʼa̱n ley. Iin kuití kúú ley ña̱ xíniñúʼu kundiku̱n ndiʼindó ta saátu na̱ inka ñuu na̱ ki̱xaa̱ ndóo xíʼinndó’”.
15 Ta ki̱vi̱ ña̱ nda̱chitáʼanna tabernáculo, iin vi̱kó nda̱kasiña sa̱tá tabernáculo nu̱ú ndíkaa̱ Arca ña̱ trato, soo tá ku̱ñuú iin ña̱ náʼa̱ nda̱a̱ táki̱ʼva náʼa̱ iin ñuʼu̱ xi̱núuña sa̱táña nda̱a̱ tá ni̱tu̱vi.
16 Ta ña̱yóʼo kúú ña̱ xi̱kuu ndiʼi ki̱vi̱: tá káʼñu,* iin vi̱kó xi̱ndakasiña sa̱táña, ta tá ñuú iin ña̱ náʼa̱ nda̱a̱ táki̱ʼva náʼa̱ ñuʼu̱ xi̱núuña sa̱táña.
17 Ndiʼi yichi̱ ña̱ xi̱ndako̱o vi̱kó sa̱tá tabernáculo na̱ israelita xi̱ndiku̱nna sa̱tá ña̱yóʼo, ta nu̱ú xi̱xaa̱ña kán xi̱xaa̱na xi̱kundoona.
18 Mií Jehová kúú ta̱ xi̱kaʼa̱n ama kúú ña̱ ndakiʼin na̱ israelita ku̱ʼu̱nna, ta mií Jehová kúú ta̱ xi̱kaʼa̱n ndáa míí kundoona. Tá xi̱núu vi̱kó sa̱tá tabernáculo, kán xi̱kindo̱o na̱ israelita.
19 Tá ku̱a̱ʼá ki̱vi̱ xi̱núu vi̱kó sa̱tá tabernáculo, na̱ israelita xi̱ndiku̱nna ña̱ xi̱kaʼa̱n Jehová xíʼinna ta va̱ása níxixaʼa̱nna inka lugar.
20 Sava yichi̱ ku̱a̱ʼá ki̱vi̱ xi̱núu vi̱kó sa̱tá tabernáculo. Mií Jehová kúú ta̱ xi̱kaʼa̱n ama kúú ña̱ ndakiʼin na̱ israelita ku̱ʼu̱nna, ta mií Jehová kúú ta̱ xi̱kaʼa̱n ndáa míí kundoona.
21 Sava yichi̱, iníí ñuú va̱ása níxi̱kanda̱ vi̱kó yóʼo soo tá xi̱ta̱a̱n* xi̱ndako̱oña sa̱tá tabernáculo ta na̱ israelita xi̱xaʼa̱nna inka lugar. Tá xi̱ndako̱o vi̱kó yóʼo sa̱tá tabernáculo, ni kúúña káʼñu á ñuú na̱yóʼo xi̱xiniñúʼu ku̱ʼu̱nna.
22 Ni u̱vi̱ ki̱vi̱, iin yo̱o̱ á ku̱a̱ʼáka ki̱vi̱ va̱ása níxi̱kanda̱ vi̱kó sa̱tá tabernáculo, na̱ israelita xi̱kindo̱ona kán ta va̱ása níxixaʼa̱nna inka lugar soo tá xi̱ndako̱oña sa̱tá tabernáculo saá kúú ña̱ xi̱xaʼa̱nna inka lugar.
23 Mií Jehová kúú ta̱ xi̱kaʼa̱n ama kúú ña̱ ndakiʼin na̱ israelita ku̱ʼu̱nna, ta mií Jehová kúú ta̱ xi̱kaʼa̱n ndáa míí kundoona. Na̱yóʼo xi̱saxínuna ña̱ ki̱ndoona xíʼin Jehová nda̱a̱ táki̱ʼva ni̱ka̱ʼa̱n Jehová xíʼin ta̱ Moisés.
Nota
^ Inka variante “taxina”.
^ Koto glosario, ña̱ yaku̱a̱.
^ Á “levadura”.
^ Koto glosario, ña̱ va̱ása yaku̱a̱.
^ Inka variante “ndiví”.
^ Inka variante “ñaʼa”.
