Deuteronomio 12:1-32

KUNISO̱ʼOÑA TU̱ʼUN

Ndasakáʼnuna Ndióxi̱ lugar ña̱ ndaka̱xin miíra (1-14)
Kivi kuxuna ku̱ñu kití soo va̱ása kuxuna ni̱i̱rí (15-28)
Va̱ása xíniñúʼu ndasakáʼnuna inka ndióxi̱ (29-32)

12 ”Ña̱yóʼo kúú chiñu ña̱ xáʼnda Ndióxi̱ nu̱úndó xíʼin ley ña̱ táxira kundiku̱nndó, ta xíniñúʼu kiʼinndó kuenta ña̱ viíní kundiku̱nndó ña̱yóʼo ndiʼi tiempo ña̱ kutakundó nu̱ú ñuʼú ña̱ taxi Jehová ndaʼa̱ndó, ta̱ kúú Ndióxi̱ na̱ táʼanndó na̱ xi̱ndoo xi̱naʼá. ² Ta nu̱ú ñuʼú ña̱ ndakiʼinndó, xíniñúʼu sandíʼi-xa̱ʼa̱ndó nu̱ú xi̱ndasakáʼnu na̱ inka ñuu ndióxi̱na, ña̱ íyo yuku̱ ña̱ súkun, ña̱ íyo xi̱kí á ña̱ íyo xa̱ʼa̱ yitu̱n náʼnu. ³ Xíniñúʼu sandíʼi-xa̱ʼa̱ndó altar nu̱ú ndásakáʼnuna ndióxi̱na, nama̱ ña̱ xíniñúʼuna tá ndasakáʼnuna ña̱yóʼo, xíniñúʼu kaʼmindó yitu̱n tú ndásakáʼnuna,* ta sandíʼi-xa̱ʼa̱ndó ña̱ʼa ña̱ i̱xava̱ʼana ña̱ ndasakáʼnuna chi saá kúú ña̱ va̱ása ndakaʼánkana xa̱ʼa̱ ki̱vi̱ ña̱yóʼo. ⁴ ”Va̱ása ndasakáʼnundó Jehová Ndióxi̱ndó nda̱a̱ táki̱ʼva ndásakáʼnu na̱yóʼo ndióxi̱na. ⁵ Nu̱úka ña̱ keʼéndó ña̱yóʼo, va̱ʼaka nandukúndó Jehová Ndióxi̱ndó nu̱ú ndaka̱xinra ndukáʼnu ki̱vi̱ra ta kúáʼanndó nu̱ú ndaka̱xinra ña̱ koora xíʼin ndiʼi na̱ tribundó. ⁶ Kán kúú nu̱ú ku̱ʼu̱nndó xíʼin kití tí kaʼmindó* tí so̱kóndó,* ta saátu kuniʼindó ndiʼi ña̱ʼa ña̱ so̱kóndó nu̱úra, iin táʼví loʼo* ña̱ taxindó ndaʼa̱ra xíʼin nda̱a̱ ndáaka ña̱ kúni̱ndó taxindó ndaʼa̱ra, ña̱ so̱kóndó xa̱ʼa̱ ña̱ ki̱ndoondó keʼéndó iin ña̱ʼa, ña̱ so̱kóndó xa̱ʼa̱ ña̱ kúni̱ miíndó ta saátu ku̱ʼu̱n se̱ʼenu̱ú si̱ndi̱ki̱ sa̱na̱ndó xíʼinndó, se̱ʼenu̱ú ndikachi* sa̱na̱ndó xíʼin se̱ʼenu̱ú ti̱xúʼú* sa̱na̱ndó. ⁷ Ta yóʼo kuxundó xíʼin ndiʼi na̱ veʼendó nu̱ú Jehová Ndióxi̱ndó ta kusi̱í-inindó xa̱ʼa̱ ndiʼi ña̱ kéʼéndó saáchi Jehová Ndióxi̱ndó ku̱a̱ʼání ña̱ va̱ʼa taxira ndaʼa̱ndó. ⁸ ”Va̱ása keʼéndó táʼan ña̱ kéʼéyó vitin, chi iin tá iinyó kéʼéyó ña̱ kúni̱ miíyó, ⁹ saáchi ndóʼó ta̱ʼán ki̱ʼvindó nu̱ú ñuʼú ña̱ taxi Jehová Ndióxi̱ndó ndaʼa̱ndó nu̱ú ndakindee̱ndó. ¹⁰ Tá ná ya̱ʼandó nu̱ú yu̱ta Jordán ta kundoondó nu̱ú ñuʼú ña̱ taxi Jehová Ndióxi̱ndó ndaʼa̱ndó, ta̱kán taxira ndakindee̱ndó ta va̱ása taxira kanitáʼanndó xíʼin na̱ sáa̱-ini xíni ndóʼó ta va̱ʼaní kundoondó. ¹¹ Ndiʼi ña̱ʼa ña̱ káʼi̱n xíʼinndó yóʼo, xíniñúʼu ku̱ʼu̱nña xíʼinndó nu̱ú ndaka̱xin Jehová Ndióxi̱ndó ndukáʼnu ki̱vi̱ra: kití tí kaʼmindó* ta so̱kóndórí nu̱úra, ndiʼi ña̱ʼa ña̱ so̱kóndó nu̱úra, iin táʼví loʼo* ña̱ taxindó ndaʼa̱ra xíʼin nda̱a̱ ndáaka ña̱ kúni̱ndó taxindó ndaʼa̱ra, saátu ndiʼi ña̱ so̱kóndó xa̱ʼa̱ ña̱ ki̱ndoondó keʼéndó iin ña̱ʼa nu̱ú Jehová. ¹² Kusi̱íní-inindó nu̱ú Jehová Ndióxi̱ndó, miíndó, se̱ʼeta̱andó, se̱ʼe-síʼindó, na̱ káchíñundáʼvi nu̱úndó xíʼin na̱ levita na̱ ndóo ñuundó, saáchi na̱ levita kǒo herencia níndakiʼinna xíʼinndó. ¹³ Kiʼinníndó kuenta ña̱ va̱ása so̱kóndó kití tí kaʼmindó* inkaka lugar nu̱ú kúni̱ miíndó. ¹⁴ Chi xíniñúʼu so̱kóndó kití tí kaʼmindó nu̱ú ndaka̱xin mií Jehová nu̱ú ndóo na̱ tribundó, ta kán keʼéndó ndiʼi chiñu ña̱ xáʼndai̱ nu̱úndó. ¹⁵ ”Ama kúni̱ miíndó kivi kaʼníndó iin kití ta kuxundó ku̱ñurí nda̱a̱ ndáaka ñuu nu̱ú ndóondó, ta kusi̱í-inindó saáchi bendición ña̱ taxi Jehová Ndióxi̱ndó ndaʼa̱ndó kúú ña̱yóʼo. Na̱ yiví na̱ yaku̱a̱* xíʼin na̱ yiví na̱ ndii* kivi kuxuna ku̱ñu yóʼo nda̱a̱ táki̱ʼva xíxina yusu. ¹⁶ Soo va̱ása xíniñúʼu kuxundó ni̱i̱rí; chi xíniñúʼu katandó ni̱i̱rí nu̱ú ñuʼú nda̱a̱ táki̱ʼva kéʼéndó xíʼin ti̱kui̱í. ¹⁷ Ñuu nu̱ú ndóondó va̱ása kivi kuxundó iin táʼví loʼo* ña̱ʼa ña̱ kúúmiíndó, ni vino xa̱á, ni aceite, ni se̱ʼenu̱ú si̱ndi̱ki̱, ni se̱ʼenu̱ú ndikachi á se̱ʼenu̱ú ti̱xúʼú sa̱na̱ndó, ni ña̱ so̱kóndó xa̱ʼa̱ ña̱ ki̱ndoondó keʼéndó iin ña̱ʼa nu̱ú Ndióxi̱ á nda̱a̱ ndáaka ña̱ kúni̱ndó taxindó ndaʼa̱ra á ña̱ so̱kóndó xa̱ʼa̱ ña̱ kúni̱ miíndó. ¹⁸ Miíndó, se̱ʼeta̱andó, se̱ʼe-síʼindó, na̱ káchíñundáʼvi nu̱úndó xíʼin na̱ levita na̱ ndóo ñuu nu̱ú ndóondó, xíniñúʼu kuxundó ndiʼi ña̱ʼa yóʼo nu̱ú Jehová Ndióxi̱ndó nu̱ú ndaka̱xin Jehová Ndióxi̱ndó, ta kusi̱í-inindó nu̱ú Jehová Ndióxi̱ndó xa̱ʼa̱ ndiʼi ña̱ keʼéndó. ¹⁹ Kiʼinníndó kuenta ña̱ va̱ása sandákoondaʼa̱ndó na̱ levita tá ná kundoondó nu̱ú ñuʼúndó. ²⁰ ”Tá chéeka ná ndasa Jehová Ndióxi̱ndó ñuʼú nu̱ú kundoondó nda̱a̱ táki̱ʼva ni̱ka̱ʼa̱nra xíʼinndó, ta tá ná ka̱ʼa̱nndó ña̱yóʼo: ‘Kúni̱i̱ kuxui̱ ku̱ñu’ saáchi kúni̱ndó kuxundóña, kiviva kuxundóña nda̱saaka yichi̱ kúni̱ miíndó. ²¹ Tá xíkání kíndo̱o nu̱ú nda̱kaxin Jehová Ndióxi̱ndó nu̱ú ndukáʼnu ki̱vi̱ra, kiviva kaʼníndó iin si̱ndi̱ki̱, iin ndikachi á iin ti̱xúʼú tí ta̱xi Jehová ndaʼa̱ndó, nda̱a̱ táki̱ʼva xa̱a̱ ni̱ka̱ʼi̱n xíʼinndó ta kuxundórí ñuu nu̱ú ndóondó amaka kúni̱ miíndó. ²² Kivi kuxundó ku̱ñu yóʼo nda̱a̱ táki̱ʼva xíxindó yusu. Na̱ yiví na̱ yaku̱a̱ xíʼin na̱ yiví na̱ ndii kivi kuxuna ku̱ñu yóʼo. ²³ Nda̱kúní koo inindó ta chikaa̱-inindó ña̱ va̱ása kuxundó ni̱i̱, saáchi ni̱i̱ kúú ña̱ táxi ña̱ táku tí kití yóʼo, ta va̱ása xíniñúʼu kuxundó ku̱ñu yóʼo tá kúúmiíña ni̱i̱. ²⁴ Va̱ása kuxundó ni̱i̱. Xíniñúʼu katandóña nu̱ú ñuʼú nda̱a̱ táki̱ʼva kéʼéndó xíʼin ti̱kui̱í. ²⁵ Va̱ása kuxundóña ña̱ va̱ʼa vií kundoondó xíʼin se̱ʼendó chi ña̱ va̱ʼava kúúña nu̱ú Jehová tá saá ná keʼéndó. ²⁶ Tá ná ku̱ʼu̱nndó nu̱ú ndaka̱xin Jehová, ña̱ ku̱ʼu̱n kuití xíʼinndó kúú ña̱ʼa ña̱ yi̱i̱ ña̱ kúú kuentandó ta saátu ña̱ʼa ña̱ so̱kóndó xa̱ʼa̱ ña̱ ki̱ndoondó keʼéndó iin ña̱ʼa. ²⁷ Ta kán taxindó ku̱ñu xíʼin ni̱i̱ kití tí so̱kóndó tí kaʼmindó* nu̱ú altar Jehová Ndióxi̱ndó, ni̱i̱ kití tí so̱kóndó xíniñúʼu katandóña xa̱ʼa̱ altar Jehová Ndióxi̱ndó soo kiviva kuxundó ku̱ñurí. ²⁸ ”Kiʼinníndó kuenta ña̱ viíní kundiku̱nndó ndiʼi chiñu ña̱ xáʼndai̱ nu̱úndó ña̱ va̱ʼa vií kundoondó xíʼin se̱ʼendó chi ña̱ va̱ʼava kúúña nu̱ú Jehová Ndióxi̱ndó tá saá ná keʼéndó. ²⁹ ”Tá ná sandíʼi-xa̱ʼa̱ Jehová na̱ yiví na̱ ndóo nu̱ú ñuu ña̱ ndakiʼinndó ta tá ná kundoondó ñuu kán, ³⁰ kiʼinndó kuenta ña̱ va̱ása ki̱ʼvindó ku̱a̱chi tá ná ndiʼi-xa̱ʼa̱ na̱ yiví yóʼo, ta va̱ása nda̱ka̱tu̱ʼunndó ndáa ki̱ʼva xi̱ndasakáʼnu na̱yóʼo ndióxi̱na chi ko̱to̱ka̱ kixáʼatu miíndó keʼéndó ña̱yóʼo. ³¹ Va̱ása ndasakáʼnundó Jehová Ndióxi̱ndó nda̱a̱ táki̱ʼva kéʼé na̱yóʼo chi tá ndásakáʼnuna ndióxi̱na kéʼéna ña̱ʼa ña̱ kini ña̱ sáa̱-ini Jehová xínira. Nda̱a̱ xáʼmina se̱ʼeta̱ana xíʼin se̱ʼe-síʼina nu̱ú ndióxi̱na. ³² Kiʼinníndó kuenta ña̱ viíní saxínundó ndiʼi chiñu ña̱ xáʼndai̱ nu̱úndó. Va̱ása xíniñúʼu ndachinúukandó ña̱ káʼi̱n xíʼinndó ta ni va̱ása xíniñúʼu kindaandó táʼanña.