Deuteronomio 33:1-29
33 Tasaá ta̱ Moisés, ta̱ káchíñu nu̱ú Ndióxi̱ ta̱ nda̱a̱, ni̱ka̱ʼa̱nra xa̱ʼa̱ bendición ña̱ ndakiʼin na̱ israelita tá ná kuvira.
2 Ka̱chira:
“Nda̱a̱ chí Sinaí ki̱xi Jehováta nda̱a̱ chí Seír nda̱ye̱ʼe̱ra sa̱tána.
Nda̱a̱ táki̱ʼva ndáye̱ʼe̱ ñu̱ʼu,* saá nda̱ye̱ʼe̱ra chí yuku̱ Parán,ta ni̱xi̱yo ku̱a̱ʼání na̱ ángel na̱ íyoní ndee̱ xíʼinra,ta chí ndaʼa̱ kúaʼara ni̱xi̱yo na̱ xáʼa̱n kánitáʼan nu̱ú ku̱a̱chi.
3 Xi̱kuʼvi̱-inira xi̱xinira na̱ ñuura.Ndiʼi na̱ ñuu na̱ yi̱i̱, ndaʼún íyona.
Xa̱ʼún ni̱xi̱yona;ta ki̱xáʼana xíniso̱ʼona tu̱ʼún.
4 (Ta̱ Moisés xa̱ʼndara iin chiñu nu̱úndó ta ta̱xira iin ley ndaʼa̱ndó,xa̱ʼa̱ ña̱ kúúndó na̱ ñuu ta̱ Jacob).
5 Ta ndu̱ura rey chí Jesurún,*tá nda̱kutáʼan ndiʼi na̱ xi̱niʼi yichi̱ nu̱ú na̱ ñuuta saátu ndiʼi na̱ tribu na̱ ñuu Israel.
6 Ná kutaku ta̱ Rubén ta ná va̱ása kuvira,ta na̱ ta̱a na̱ veʼera, ku̱a̱ʼání ná xa̱a̱na koona”.
7 Ta ña̱yóʼo ni̱ka̱ʼa̱nra xa̱ʼa̱ ta̱ Judá:
“Jehová, kuniso̱ʼo ña̱ káʼa̱n ta̱ Judáta chindeétáʼan xíʼinra ña̱ ndikóra ñuura.
Xíʼin ndee̱ra kánitáʼanra xa̱ʼa̱ ña̱ xíniñúʼu ndakiʼinra,ta chindeétáʼan xíʼinra ña̱ kuchiñura nu̱ú na̱ sáa̱-ini xíni miíra”.
8 Xa̱ʼa̱ ta̱ Leví ka̱chira:
“Ña̱ Tumim xíʼin ña̱ Urim* kúúña kuentaún,*ta kúúña kuenta ta̱a ta̱ nda̱kúní-ini xíʼún,
ta̱ xi̱tondosóún chí Masá.
Yóʼó ki̱xáʼún kánitáʼún xíʼinra chí nu̱ú xi̱ndikaa̱ ti̱kui̱í chí Meribá,
9 ta ni̱ka̱ʼa̱nra ña̱yóʼo xíʼin yivára ta saátu xíʼin siʼíra: ‘Kǒo níxi̱ndaa-inii̱ ndóʼó’.
Ta nda̱a̱ na̱ ñanira kǒo níndakunirana ña̱ kúúna ñanirata va̱ása níkandíxara ña̱ ni̱ka̱ʼa̱n na̱ se̱ʼera.
Saáchi na̱yóʼo ka̱ndíxana tu̱ʼúnta sa̱xínuna trato ña̱ ki̱ndoún xíʼinna.
10 Ná sanáʼa̱na ta̱ Jacob xa̱ʼa̱ ley ña̱ ta̱xiúnta ná sanáʼa̱na na̱ ñuu Israel xa̱ʼa̱ Ley ña̱ kúúmiíún.
Ná so̱kóna* ña̱ʼa ña̱ xáʼa̱n támi ña̱ chíʼmána nu̱únta ná va̱ása so̱kó ñáʼñuna ña̱ʼa nu̱ú altar ña̱ kúúmiíún.
11 Jehová, taxi bendición ndaʼa̱ra ta taxi ná ndakiʼinra ndee̱,kusi̱í-iniún ndakiʼún ña̱ táxira ndaʼún, ña̱ i̱xava̱ʼara xíʼin ndaʼa̱ra.
Ka̱ʼnu̱ xa̱ʼa̱-si̱ʼin na̱ kúni̱ kanitáʼan xíʼinra,tasaá na̱ sáa̱-ini xíniñaʼá va̱ása ndakunditakana”.
12 Xa̱ʼa̱ ta̱ Benjamín ka̱chira:
“Ta̱ kúʼvi̱ní-ini Jehová xínira, viíní ná koora ta yatin ná koora xíʼinra;tá ná kundaarara iníísaá ki̱vi̱,ma̱ʼñú so̱ko̱ra koora”.
13 Xa̱ʼa̱ ta̱ José ka̱chira:
“Ná taxi Jehová bendición sa̱tá ñuʼúra,xíʼin ña̱ʼa ña̱ íyo chí ndiví,xíʼin yúyú xíʼin ti̱kui̱í tá kána nu̱ú ñuʼú yóʼo,
14 xíʼin ña̱ʼa ña̱ va̱ʼa ña̱ sákuaʼnu ñu̱ʼuxíʼin ña̱ʼa ña̱ va̱ʼa ña̱ ndákiʼinra yo̱o̱ tá yo̱o̱,
15 xíʼin ña̱ʼa ña̱ va̱ʼaní ña̱ íyo chí yuku̱ yatá,*ta saátu ña̱ʼa ña̱ va̱ʼaní ña̱ íyo chí xi̱kí ña̱ va̱ása ndíʼi-xa̱ʼa̱,
16 ña̱ʼa ña̱ va̱ʼaní ña̱ íyo nu̱ú ñuʼú xíʼin ndiʼi ña̱ xáʼnu nu̱úña,xíʼin bendición ta̱ ki̱ta ma̱ʼñú tú iñú.
Ná ndakiʼin ta̱ José ndiʼi ña̱yóʼo,*xa̱ʼñu ta̱ nda̱kaxinna nu̱ú ndiʼika na̱ ñanira.
17 Ndee̱ra íyoña nda̱a̱ táki̱ʼva íyo ndee̱ iin si̱ndi̱ki̱ loʼo tí sa̱kán ka̱ku,ta ndiki̱ra íyoña nda̱a̱ táki̱ʼva íyo ndiki̱ iin si̱ndi̱ki̱ yukú.
Xíʼin ña̱yóʼo chindaʼára inka ñuu,xíkání chindaʼára ndiʼina.
Yáʼaka u̱xu̱ mil kúú na̱yóʼo, ta soldado ta̱ Efraín kúúna,saátu yáʼaka mil kúú na̱ soldado ta̱ Manasés”.
18 Xa̱ʼa̱ ta̱ Zabulón ka̱chira:
“Kusi̱í-iniún Zabulón tá ná kitaún ku̱ʼún kachíñún,ta yóʼó Isacar, kusi̱í-iniún tá íyoún ti̱xin veʼe loʼún.
19 Chí yuku̱ kana na̱yóʼo na̱ ñuu.
Ta kán so̱kó na̱ kéʼé ña̱ nda̱kú ña̱ʼa nu̱ú Ndióxi̱.
Saáchi tavána ku̱a̱ʼání ña̱ va̱ʼa ña̱ ñúʼu ini tá marta saátu ña̱ va̱ʼa ña̱ ñúʼu ti̱xin yu̱ti”.
20 Xa̱ʼa̱ ta̱ Gad ka̱chira:
“Na̱ táxika ñuʼú ndaʼa̱ ta̱ Gad, ná ndakiʼinna bendición.
Ta̱yóʼo, ndáku̱ndeera* nda̱a̱ táki̱ʼva kéʼé iin tí ndikaʼa*tí íyo tu̱ʼva ña̱ kindaarí ndaʼa̱na xíʼin xa̱ʼñuna.
21 Ñuʼú ña̱ va̱ʼaka ndaka̱xinra koo kuentara,ña̱yóʼo kúú táʼví ña̱ ndakiʼinra ndaʼa̱ ta̱ táxi ley.
Na̱ níʼi yichi̱ nu̱ú na̱ ñuu, ndatakana.
Jehová kúú ta̱ taxi chiñu ndaʼa̱ra ña̱ nda̱kúní ndatiinra ku̱a̱chi,ta saátu ña̱ xa̱a̱ nda̱kaxin Ndióxi̱ keʼéra xíʼin na̱ ñuu Israel”.
22 Xa̱ʼa̱ ta̱ Dan ka̱chira:
“Ta̱ Dan íyora nda̱a̱ táki̱ʼva íyo se̱ʼe iin tí ndikaʼa.
Nda̱a̱ chí Basán kitara kanitáʼanra”.
23 Xa̱ʼa̱ ta̱ Neftalí ka̱chira:
“Ta̱ Neftalí kúsi̱í-inira xa̱ʼa̱ ndiʼi bendición ña̱ táxi Jehová ndaʼa̱ra.Ndakiʼinra ñuʼú ña̱ ndíkaa̱ chí nu̱ú kíʼvi ñu̱ʼu ta saátu ña̱ ndíkaa̱ chí sur”.
24 Xa̱ʼa̱ ta̱ Aser ka̱chira:
“Bendición ña̱ nda̱kiʼin ta̱ Aser kúú ña̱ íyo ku̱a̱ʼání se̱ʼera.
Ná kusi̱í-ini na̱ ñanira xíʼinrata ná sandáxira xa̱ʼa̱ra xíʼin aceite.
25 Xíʼin hierro ta saátu xíʼin cobre ku̱vaʼa ña̱ ndási yéʼún,ta va̱ása kundi̱ʼi-iniún nda̱a̱ ni iin ki̱vi̱.
26 Kǒo na̱ íyo nda̱a̱ táki̱ʼva íyo Ndióxi̱ ta̱ nda̱a̱, Ndióxi̱ na̱ Jesurún,ta̱ yáʼa ma̱ʼñú ndiví ña̱ va̱ʼa xa̱a̱ra chindeétáʼanra xíʼúnta̱ kánuu sa̱tá vi̱kó, ta̱ káʼnuní.
27 Nda̱a̱ tá tiempo xi̱naʼáví ndáa Ndióxi̱ yóʼó;chindeétáʼanra xíʼún ta kundaara yóʼó ndiʼi tiempo.
Tavára na̱ sáa̱-ini xíni yóʼóta kachira: ‘Sandíʼi-xa̱ʼa̱ndóna’.
28 Va̱ʼaní kundoo na̱ ñuu Israel,na̱ se̱ʼe ta̱ Jacob kundoo síínnanu̱ú iin ñuʼú nu̱ú íyoní trigo* ta saátu nu̱ú íyoní vino xa̱áta chí ndiví ko̱yo yúyú.
29 Si̱íní íyo ndóʼó na̱ ñuu Israel.
¿Ndáana íyo nda̱a̱ táki̱ʼva íyo ndóʼóchi kúúndó iin ñuu ña̱ sa̱kǎku Jehová?Ta̱yóʼo kúú ta̱ ndáa ndóʼótáki̱ʼva íyo iin espadandó ña̱ káʼnuní, saá íyora.
Na̱ sáa̱-ini xíni yóʼó, kañuuna* miína ku̱ʼu̱nna nu̱únta ku̱a̱ñi̱ún* sa̱tána”.
Nota
^ Inka variante “ña̱ ka̱ndii”.
^ Ña̱ kúni̱ kachi ‘na̱ yiví na̱ kéʼé ña̱ nda̱kú’. Ña̱yóʼo kúú inka ki̱ʼva ña̱ xi̱kaʼa̱nna xíʼin na̱ ñuu Israel.
^ Koto glosario, ña̱ Urim xíʼin ña̱ Tumim.
^ Xa̱ʼa̱ Ndióxi̱ káʼa̱n ña̱yóʼo.
^ Inka variante “taxina”.
^ Á sana, “yuku̱ ña̱ íyo chí nu̱ú kíta ñu̱ʼu”.
^ Tu̱ʼun ña̱ ni̱ka̱ʼyi̱ña káchiña “Ná kixi ndiʼi ña̱yóʼo xi̱ní ta̱ José”.
^ Inka variante “nákundayira”, “ndákandiera”.
^ Á “león”.
^ Á “cebada”.
^ Inka variante “kañuʼuna”.
^ Inka variante “ku̱niʼniún”, “ku̱a̱ʼniún”.
