Deuteronomio 5:1-33
5 Tasaá sa̱ndátaka ta̱ Moisés ndiʼi na̱ ñuu Israel ta ni̱ka̱ʼa̱nra ña̱yóʼo xíʼinna: “Ndóʼó na̱ ñuu Israel, kuniso̱ʼondó ña̱ káʼa̱n Ndióxi̱ xíʼinndó keʼéndó ta kundiku̱nndó ley ña̱ táxira ndaʼa̱ndó, ña̱ káʼi̱n xíʼinndó vitin, ta xíniñúʼu sakúaʼandó ña̱yóʼo ta viíní kundiku̱nndó ndiʼi ña̱ káʼa̱nña.
2 Jehová Ndióxi̱yó ke̱ʼéra iin trato xíʼinyó chí Horeb.
3 Jehová va̱ása níkeʼéra trato yóʼo xíʼin na̱ xi̱ndoo xi̱naʼá, chi xíʼin miíyó na̱ táku ndóo vitin kúú ña̱ ke̱ʼéra trato yóʼo.
4 Jehová ni̱ka̱ʼa̱n yuʼúra xíʼinndó chí yuku̱, ti̱xin iin ñuʼu̱.
5 Ki̱vi̱ saá, yi̱ʼi̱ xi̱ndichii̱ ma̱ʼñú miíndó xíʼin Jehová, ña̱ va̱ʼa ka̱ʼi̱n xíʼinndó xa̱ʼa̱ ña̱ xi̱kaʼa̱n Jehová, saáchi xi̱yiʼvíndó xi̱xinindó ñuʼu̱ kán ta va̱ása níxiinndó ndaandó yuku̱. Ta̱kán ka̱chira:
6 ”‘Yi̱ʼi̱ kúú Jehová Ndióxi̱ún, ta̱ ta̱vá yóʼó ñuu Egipto nu̱ú xi̱kachíñundáʼviún.
7 Va̱ása ndasakáʼnún inka ndióxi̱, chi iinlá yi̱ʼi̱ xíniñúʼu ndasakáʼnún.
8 ”’Va̱ása xíniñúʼu ixava̱ʼún nda̱a̱ ni iin ña̱ʼa ña̱ náʼa̱ nda̱a̱ táki̱ʼva náʼa̱ ña̱ íyo chí ndiví, ña̱ íyo nu̱ú ñuʼú á ña̱ íyo ti̱xin ti̱kui̱í.
9 Va̱ása kuxítíún nu̱úña ta ni va̱ása taxiún saxínu̱na-iniún ña̱ ndasakáʼnúnña, saáchi yi̱ʼi̱ Jehová Ndióxi̱ún kúni̱i̱ ña̱ iinlá miíi̱ ná ndasakáʼnún. Chi na̱ ku̱a̱kiʼvi ku̱a̱chi nu̱úi̱ ta sáa̱-inina xínina yi̱ʼi̱, taxii̱ castigo ndaʼa̱ se̱ʼena, se̱ʼeñánina xíʼin se̱ʼexíkúána,*
10 soo na̱ kúʼvi̱-ini xíni yi̱ʼi̱ ta ndíku̱nna ndiʼi chiñu ña̱ xáʼndai̱ nu̱úna, ku̱a̱ʼání ku̱i̱ya̱ na̱ʼi̱ ña̱ ndixaní kúʼvi̱-inii̱* xínii̱na xíʼin ndiʼi se̱ʼena.
11 ”’Ixato̱ʼóníún ki̱vi̱ Jehová Ndióxi̱ún, saáchi ndiʼi na̱ kǒo íxato̱ʼó ki̱vi̱ Jehová, taxira castigo ndaʼa̱na.
12 ”’Ndakaʼán ña̱ iin ki̱vi̱ yi̱i̱ kúú sábado, nda̱a̱ táki̱ʼva ni̱ka̱ʼa̱n Jehová Ndióxi̱ún xíʼún.
13 Kúúmiíún i̱ñu̱ ki̱vi̱ ña̱ kachíñún ta keʼún ndiʼi chiñu ña̱ íyo nu̱ún,
14 soo ki̱vi̱ u̱xa̱ va̱ása xíniñúʼu keʼún nda̱a̱ ni iin chiñu, chi ki̱vi̱ sábado iin ki̱vi̱ ña̱ ixato̱ʼún Jehová Ndióxi̱ún kúú ña̱yóʼo. Ni miíún, ni se̱ʼeta̱ún, ni se̱ʼe-síʼún, ni ta̱ káchíñundáʼvi nu̱ún, ni ñá káchíñundáʼvi nu̱ún, ni si̱ndi̱ki̱ sa̱na̱ún, ni burro sa̱na̱ún, ni nda̱a̱ ni iin kití sa̱na̱ún, ni na̱ inka ñuu na̱ ki̱xaa̱ íyo xíʼún, va̱ása xíniñúʼu kachíñuna, ña̱ va̱ʼa ndakindee̱ ta̱ káchíñu nu̱ún xíʼin ñá káchíñu nu̱ún nda̱a̱ táki̱ʼva ndákindee̱ miíún.
15 Ndakaʼán chi xi̱kachíñundáʼvitu miívaún chí Egipto, ta Jehová Ndióxi̱ún ta̱vára yóʼó xíʼin ndee̱ra. Ña̱kán ni̱ka̱ʼa̱n Jehová Ndióxi̱ún xíʼún ña̱ va̱ása keʼún nda̱a̱ ni iin chiñu ki̱vi̱ sábado.
16 ”’Ixato̱ʼó yiváún xíʼin siʼún, nda̱a̱ táki̱ʼva ni̱ka̱ʼa̱n Jehová Ndióxi̱ún xíʼún, ña̱ va̱ʼa ku̱a̱ʼání ku̱i̱ya̱ koún ta vií koún nu̱ú ñuʼú ña̱ taxi Jehová Ndióxi̱ún ndaʼún.
17 ”’Va̱ása kaʼníún.
18 ”’Va̱ása ku̱su̱ún xíʼin na̱ kǒo nítindaʼa̱ xíʼún.
19 ”’Va̱ása ixakuíʼnaún.
20 ”’Va̱ása ka̱ʼún ña̱ vatá xa̱ʼa̱ inkana.
21 ”’Va̱ása kuni̱ún kindaún ñá síʼi inkana. Saátu va̱ása kuni̱ún kindaún veʼe inkana, ni ñuʼúna, ni ta̱ káchíñundáʼvi nu̱úna, ni ñá káchíñundáʼvi nu̱úna, ni si̱ndi̱ki̱ sa̱na̱na, ni burro sa̱na̱na, ni nda̱a̱ ni iin ña̱ʼa ña̱ kúúmiína’.
22 ”Ndeéní ni̱ka̱ʼa̱n Jehová ley yóʼo tá ta̱xiraña ndaʼa̱ndó chí yuku̱, nda̱a̱ ma̱ʼñú ñuʼu̱ xíʼin ma̱ʼñú vi̱kó ña̱ ndáá ka̱na tu̱ʼunra tá ni̱ka̱ʼa̱nra xíʼinndó ta kǒoka ña̱ níchinúura. Tasaá ka̱ʼyiraña nu̱ú u̱vi̱ yu̱u̱ ta ta̱xiraña ndaʼíi̱.
23 ”Soo tá xi̱niso̱ʼondó tu̱ʼunra ma̱ʼñú vi̱kó ña̱ ndáá, tá ndeéní xíxi̱ yuku̱ kán, ndiʼi na̱ níʼi yichi̱ nu̱ú na̱ tribundó xíʼin na̱ níʼi yichi̱ nu̱ú na̱ ñuundó,* ku̱yatinna nu̱úi̱.
24 Ta ni̱ka̱ʼa̱nndó ña̱yóʼo xíʼi̱n: ‘Jehová Ndióxi̱yó ni̱na̱ʼa̱ra nu̱úndi̱ ña̱ íyoní ndee̱ra ta káʼnuníra, ta saátu xi̱niso̱ʼondi̱ tu̱ʼunra ti̱xin ñuʼu̱. Vitin xi̱nindi̱ ña̱ va̱ʼava káʼa̱n Ndióxi̱ xíʼin na̱ yiví ta tákuvana.
25 Soo ndi̱ʼi̱ yíʼviníndi̱ kuvindi̱ saáchi ñuʼu̱ yóʼo kivi kaʼmivaña ndi̱ʼi̱. Tá ná kuniso̱ʼokandi̱ tu̱ʼun Jehová Ndióxi̱ndi̱, kuvivandi̱.
26 Saáchi, ¿á íyo iin na̱ xa̱a̱ xíniso̱ʼo tu̱ʼun Ndióxi̱ ta̱ nda̱a̱, ti̱xin iin ñuʼu̱ ta tákuna nda̱a̱ vitin nda̱a̱ táki̱ʼva táku ndi̱ʼi̱?
27 Kuyatin ña̱ va̱ʼa kuniso̱ʼún ña̱ ka̱ʼa̱n Jehová Ndióxi̱yó, ta yóʼó kúú ta̱ natúʼun xíʼinndi̱ ndiʼi ña̱ ná ka̱ʼa̱n Jehová Ndióxi̱yó. Ta kuniso̱ʼovandi̱ ta kandíxandi̱’.
28 ”Ta xi̱niso̱ʼova Jehová tá ni̱ka̱ʼa̱nndó xíʼi̱n, tasaá ni̱ka̱ʼa̱n Jehová xíʼi̱n: ‘Xi̱niso̱ʼovai̱ ña̱ ni̱ka̱ʼa̱n na̱ ñuu yóʼo xíʼún. Ta ndiʼi ña̱ ni̱ka̱ʼa̱nna, va̱ʼavaña.
29 Á va̱ʼaví xíʼin ndiʼi níma̱na ná ixato̱ʼóna yi̱ʼi̱ ta ná kandíxana ndiʼi ña̱ xáʼndai̱ nu̱úna. Chi saá kúú ña̱ va̱ʼaní koo miína ta saátu na̱ se̱ʼena.
30 Kúáʼan ta ka̱ʼún ña̱yóʼo xíʼinna: “Ndandikóndó veʼe válíndó”.
31 Soo yóʼo kindo̱o miíún xíʼi̱n ta ná ka̱ʼi̱n xíʼún ndáaña kúú ña̱ xíniñúʼu keʼéna ta ndáa ley kúú ña̱ xíniñúʼu kundiku̱nna ta sanáʼúnñana. Ta xíniñúʼu kundiku̱nnaña nu̱ú ñuʼú ña̱ ki̱ʼvina, ña̱ taxii̱ ndaʼa̱na’.
32 Ta vitin, ndóʼó kiʼinníndó kuenta ña̱ va̱ʼa keʼéndó nda̱a̱ táki̱ʼva ni̱ka̱ʼa̱n Jehová xíʼinndó. Ta va̱ása ku̱ʼu̱nndó ni chí ndaʼa̱ kúáʼa ni chí ndaʼa̱ yitin.
33 Xíniñúʼu kundiku̱nndó ndiʼi ña̱ ni̱ka̱ʼa̱n Jehová Ndióxi̱ndó xíʼinndó keʼéndó, ña̱ va̱ʼa viíní kundoondó ta ku̱a̱ʼání tiempo kutakundó nu̱ú ñuʼú ña̱ ndakiʼinndó.
