Judas 1:1-25
1 Yi̱ʼi̱ ta̱ Judas, káchíñui̱ nu̱ú ta̱ Jesucristo ta kúi̱ ñani ta̱ Santiago, káʼyíi̱ tu̱ʼun yóʼo ku̱xa̱a̱ña nu̱ú ndóʼó na̱ nda̱kaxin yiváyó Ndióxi̱, na̱ kúʼvi̱-inira xínira, na̱ nda̱kaxinra ña̱ koona xíʼin ta̱ Jesucristo.
2 Káʼi̱n xíʼin Ndióxi̱ ña̱ ná kundáʼvika-inira kunira ndóʼó ta ná kuʼvi̱ka-inira kunira ndóʼó ta saátu ña̱ viíní ná kutáʼanndó xíʼinra.
3 Ñaniyó xíʼin ku̱ʼvayó, ña̱ xi̱kuni̱i̱ keʼíi̱ kúú ña̱ ka̱ʼi̱n xíʼinndó xa̱ʼa̱ ña̱ ndátuyó ka̱kuyó. Soo va̱ʼaka káʼyíi̱ tutu yóʼo nu̱úndó ña̱ va̱ʼa ná chika̱a̱kandó ndee̱ ña̱ kandíxakandó Ndióxi̱ nda̱a̱ táki̱ʼva ke̱ʼé na̱ nda̱kaxinra, chi iin kuití yichi̱ ni̱xa̱a̱na ka̱ndíxanara ta ndiʼi tiempo kandíxanara.
4 Káʼi̱n ña̱yóʼo xíʼinndó saáchi xíʼin miíndó ni̱ki̱ʼvi se̱ʼé na̱ yiví na̱ xa̱a̱ ku̱a̱ʼání tiempo ni̱ka̱ʼa̱n tu̱ʼun Ndióxi̱ xa̱ʼa̱ ña̱ ndatiinra ku̱a̱chi xíʼinna. Na̱yóʼo kǒo ña̱ to̱ʼóna, ta xa̱ʼa̱ ña̱ va̱ʼaní-ini Ndióxi̱ ndákanixi̱nína ña̱ kivi keʼéna ña̱ kini ña̱ kǒo kúkaʼan nu̱úna xíʼin,* ta ni va̱ása nda̱kú íyo inina xíʼin tátayó Jesucristo ta̱ nda̱satá* miíyó.
5 Ni xa̱a̱ xíni̱ va̱ʼandó xa̱ʼa̱ ña̱yóʼo, kúni̱i̱ sandákaʼíi̱n ndóʼó xa̱ʼa̱ ña̱ ke̱ʼé Jehová* tá sa̱kǎkura na̱ ñuura nu̱ú na̱ ñuu Egipto, soo tándi̱ʼi sa̱ndíʼi-xa̱ʼa̱ra na̱ kǒo níkandíxañaʼá.
6 Ta na̱ ángel na̱ kǒo níxiin koo nu̱ú ta̱xi Ndióxi̱ koona chi sa̱ndákoona nu̱ú ni̱xi̱yona, ka̱túnrana ña̱ íyona nu̱ú naá nda̱a̱ ná kixaa̱ ki̱vi̱ káʼnu ña̱ ndatiinra ku̱a̱chi xíʼinna.
7 Ta saátu na̱ ñuu Sodoma xíʼin na̱ ñuu Gomorra xíʼin ñuu ña̱ íyo yatin xíʼinna xi̱kiʼvina ku̱a̱chi kini* ta xi̱kutóonína keʼéna ña̱ kúni̱ ku̱ñuna. Xa̱ʼa̱ ña̱yóʼo ndi̱ʼi-xa̱ʼa̱na xíʼin ñuʼu̱ ña̱ xíxi̱ ndiʼi tiempo, ta ña̱yóʼo náʼa̱ña nu̱úyó ndáaña kundoʼo na̱ kéʼé ña̱ kini.
8 Ta ni saá ku̱u, na̱ yiví yóʼo ndákundeéna ndákanixi̱nína xa̱ʼa̱ ña̱ kúni̱ miína keʼéna, íxayaku̱a̱na ku̱ñuna, ta kúndasína xínina na̱ xáʼndachíñu nu̱úna ta káʼa̱n-ndi̱va̱ʼana xa̱ʼa̱ na̱ ndu̱káʼnu i̱xaa Ndióxi̱.
9 Tá ki̱vi̱ na̱túʼun kúáchi ta̱ arcángel Miguel xíʼin ta̱ Ndi̱va̱ʼa xa̱ʼa̱ ku̱ñu ta̱ Moisés, kǒo nítiinra ku̱a̱chi xíʼinra ña̱ ka̱ʼa̱n-ndi̱va̱ʼara xíʼinra, chi va̱ʼaka ni̱ka̱ʼa̱nra: “Jehová* ná ndatiin ku̱a̱chi xíʼún”.
10 Soo na̱ yiví yóʼo káʼa̱n-ndi̱va̱ʼana xa̱ʼa̱ ku̱a̱ʼání ña̱ʼa ña̱ kǒo kúnda̱a̱-inina xa̱ʼa̱. Ta na̱yóʼo nda̱a̱ táki̱ʼva íyo kití tí kǒo ña̱ xínitúni̱ saá íyona ta kéʼéna ndiʼi ña̱ʼa nda̱a̱ táki̱ʼva kéʼé tíyóʼo, ta na̱kán na̱ ku̱a̱ʼa̱n ndíʼi-xa̱ʼa̱kava kúúna.
11 Ndáʼviní na̱yóʼo chi ndíku̱nna yichi̱ ta̱ Caín, ta xa̱ʼa̱ ña̱ kúni̱na ndakiʼinna iin ña̱ va̱ʼa ndíku̱nna yichi̱ kíʼvi ta̱ Balaam, ta ndiʼi-xa̱ʼa̱na chi káʼa̱n kúáchina xa̱ʼa̱ inkana nda̱a̱ táki̱ʼva ke̱ʼé ta̱ Coré.
12 Na̱ ta̱a yóʼo íyona xíʼinndó tá kéʼéndó vikó ña̱ va̱ʼa na̱ʼa̱ndó ña̱ kúʼvi̱-inindó xínindó na̱ hermano, soo na̱yóʼo nda̱a̱ táki̱ʼva íyo yu̱u̱ ña̱ ñúʼu se̱ʼé ti̱xin ti̱kui̱í saá íyona, na̱yóʼo kúúna pastor na̱ ndíʼi̱-ini xa̱ʼa̱ ña̱ kuxu mií kuitína ta va̱ása yíʼvina; na̱yóʼo íyona nda̱a̱ táki̱ʼva íyo vi̱kó ña̱ kǒo ti̱kui̱í kúúmií ta ku̱a̱ʼa̱nña chóʼo ta ku̱a̱ʼa̱nña chí káa xíʼin ta̱chí; íyona nda̱a̱ táki̱ʼva íyo yitu̱n tú kǒo táxi ku̱i̱ʼi tiempo ña̱ xíniñúʼu taxinú ku̱i̱ʼi, tú ndi̱ʼi-xa̱ʼa̱ ta nda̱a̱ ti̱oʼonú* tu̱ʼunna;
13 Na̱ ta̱a yóʼo íyona nda̱a̱ táki̱ʼva íyo ti̱kui̱í tá kininí ndáku̱i̱ta nu̱ú mar ta távárá ña̱ yaku̱a̱ ña̱ kéʼéna ña̱ sákukaʼan nu̱úna; íyona nda̱a̱ táki̱ʼva íyo tí ki̱mi tí ku̱a̱ʼa̱n chóʼo ta ku̱a̱ʼa̱nrí chí káa, na̱yóʼo ku̱ʼu̱nna nu̱ú naá* nu̱ú koona ndiʼi tiempo.
14 Saátu ta̱ Enoc, ta̱ ki̱xi ti̱xin na̱ veʼe ta̱ Adán* ni̱ka̱ʼa̱nra xa̱ʼa̱ na̱yóʼo ta ka̱chira: “Kotondó, Jehová* va̱xira xíʼin ku̱a̱ʼání na̱ ángel na̱ íyoní ndee̱
15 ña̱ va̱ʼa ndatiinra ku̱a̱chi xíʼin ndiʼina, ta saátu na̱ʼa̱ra ña̱ kini ña̱ kéʼéna chi kǒo ní ixato̱ʼónara. Ndióxi̱ ke̱ʼéra ña̱yóʼo saáchi ku̱a̱ʼání ña̱ kini ke̱ʼéna ta ni̱ka̱ʼa̱n-ndi̱va̱ʼana xa̱ʼa̱ra”.
16 Na̱ yiví yóʼo nina nátúʼun kúáchina ta kǒo kúsi̱í-inina xíʼin ña̱ kúúmiína ta kéʼéna ña̱ kúni̱ miína. Ta xíʼin tu̱ʼun yuʼúna ndásakáʼnuna miívana, ta káʼa̱n va̱ʼatuna xa̱ʼa̱ inkana ña̱ va̱ʼa ná keʼé na̱kán ña̱ va̱ʼa xíʼinna.
17 Soo ndóʼó, na̱ kúʼvi̱-inii̱ xínii̱, ndakaʼánndó xa̱ʼa̱ tu̱ʼun ña̱ ni̱ka̱ʼa̱n na̱ apóstol tá ya̱chi̱, na̱ xi̱ndiku̱n sa̱tá tátayó Jesucristo.
18 Na̱kán ku̱a̱ʼá yichi̱ xi̱ka̱ʼa̱nna: “Ki̱vi̱ nu̱ú ndíʼi koo na̱ kusi̱kindaa ndóʼó ta keʼéna ña̱ kini ña̱ kúni̱ miína”.
19 Na̱ yiví yóʼo táʼví-táʼanna, kéʼéna nda̱a̱ táki̱ʼva kéʼé tí kití ta va̱ása kúúmiína espíritu santo Ndióxi̱.
20 Soo ndóʼó, na̱ kúʼvi̱-inii̱ xínii̱, xa̱ʼa̱ ña̱ ndáaní-inindó Ndióxi̱ chika̱a̱ndó ndee̱ xíʼin táʼanndó, ta kuniñúʼundó espíritu santo Ndióxi̱ ña̱ ka̱ʼa̱nndó xíʼinra,
21 ndakundeéndó keʼéndó ña̱ʼa ña̱ chindeétáʼan xíʼinndó ña̱ va̱ʼa kuʼvi̱ka-ini Ndióxi̱ kunira ndóʼó, nani ndátundó ña̱ taxi tátayó Jesucristo ña̱ kooyó ndiʼi tiempo chi kúndáʼvi-inira xínira miíyó.
22 Saátu kundáʼvi-inindó kunindó na̱ xíka-ini xa̱ʼa̱ ña̱ kándíxana,
23 sakǎkundóna ña̱ va̱ása ndiʼi-xa̱ʼa̱na.* Tasaá kundáʼvitu-inindó kunindó inkana, soo kuentaní koondó ta kundasíndó ña̱ kéʼéna chi na̱ xa̱a̱ ku̱yaku̱a̱ kúúna xíʼin ku̱a̱chi ña̱ kéʼéna.
24 Ta vitin, Ndióxi̱ ta̱ káʼnuní, ta̱ kuchiñu sakǎku ndóʼó ña̱ va̱ása ndakavandó ndaʼa̱ ku̱a̱chi, ta̱ chindeétáʼan xíʼinndó ña̱ kǒo ku̱a̱chi kuumiíndó kunditandó nu̱úra ta kusi̱íní-inindó,
25 iinlá ta̱yóʼo kúú Ndióxi̱ ta xi̱niñúʼura tátayó Jesucristo ña̱ sa̱kǎkura miíyó. Ta̱yóʼo kúú ta̱ xíniñúʼu ndukáʼnu ta xíniñúʼu ixato̱ʼónara, ta̱yóʼo kúú ta̱ kúúmií ndee̱ ta kaʼndachíñura ndiʼi tiempo: saá ni̱xi̱yoña tiempo xi̱naʼá, saá íyoña tiempo vitin, ta saá kooña ndiʼi tiempo. Saá koo.
Nota
^ Inka variante “xe̱en”.
^ Inka variante “yoʼo̱ró”.
^ Ña̱yóʼo káʼa̱nña xa̱ʼa̱, ña̱ ndiʼi-xa̱ʼa̱ va̱ʼana.
^ Ta̱ Adán ni̱xi̱yo iin se̱ʼexíkúára ta ta̱yóʼo ni̱xi̱yotu se̱ʼexíkúára ta̱ xi̱naní Enoc. Ña̱yóʼo kúni̱ kachiña ña̱ u̱xa̱ familia ni̱xi̱yo ta saá ka̱ku ta̱ Enoc.
^ Tu̱ʼun ña̱ ni̱ka̱ʼyi̱ña káchiña “nu̱ú ñuʼu̱”.
